Roma 16

Paulu hã, tisiwaihu'u norĩ te te i'azawizé

1Ãne, wa za ãma aima wasu'u wẽ za'ra wa'wa, wahidiba Febi hã. Ta hã Sẽcréia ãma te isazei'wa norĩ hã te te 're apawapto. 2Ma'ãpé ã hã wahidiba hã asiwi âri wẽ wa'aba Wanhib'apito nhisi na, 'Re ihâimana u'âsi mono nhib'a'uwẽ norĩ, tô i'ru zahi zarina te te 're i'manharĩ za'ra mono ne. Ma'ãpé duré ãma ana wa'aba, marĩ zô tiwi rowaptâ'â wamhã, ta hã da'ãma sime za'ẽtẽ wa, duré ĩ'ãma zama isimei ré wa.

3Ma'ãpé duré ĩma sawi za'ra wa'aba, Prisila hã duré imro Aquilaha zama, ta norĩ hã ĩsiré romhuri'wa Cristu Zezusihi ma. 4Ta norĩ ma, romnhimimnhasi nherẽ, ma tô ĩnho'reptu zahuré. Tahawa, te te ĩnho'reptu zahuré zém na wa te te 're sawi zahuré. Tazahã ĩwétési õ di. Uburé isazei'wa norĩ siré 're isi'rã'õtõ mono norĩ Zudeu'õ norĩ zama te te siwi 're sawi zahuré. 5Ma'ãpé duré, ĩma sawi za'ra wa'aba, isazei'wa norĩ Prisila norĩ nhorõwa ãma, siré 're isi'rã'õtõ mono norĩ hã.

Duré ĩsiwaihu ĩma isawi Epenetu hã ĩma sawi za'ra wa'aba. Ta hã ma tô imorĩ'rata na saze Cristu hã, Azia na danhipti'a nho'õmo nhisi 'remhã. 6Duré Maria hã ĩma sawi za'ra wa'aba. Ta hã ma tô te te ai'ãma 're romhuri pese za'ra wa'wa. 7Duré ĩma sawi za'ra wa'aba, Ãdronicu hã Zuniaha me. Ta norĩ hã ĩsiré Zudeu, ma tô ĩsiré aima'wa, dazazéb 're. Ta norĩ hã Cristuhu zadawa wasu'u'wa zahuré, dama iwaihu'u pese zahuré, duré ĩwana te te isaze zahuré.

8Ma'ãpé, duré ĩma sawi za'ra wa'aba Ãpliatu hã, ta hã ĩsisãnawã ĩma isawi Wanhib'apito zazei'wai wa. 9Duré Urbanuhu zama ĩma sawi za'ra wa'aba. Ta hã Cristuhu ma romhuri na wasiré romhuri'wa. Duré ĩsiwaihu ĩma isawi, Estaquihi zama ĩma sawi za'ra wa'aba. 10Duré ĩma sawi za'ra wa'aba, Apéli hã. Ta hã Cristu ma tô wẽsã, te te sina 're i'umnhasi mono zém na ipibuzé tãma ihâimanazém na te te ro'razâri wẽ wa. Duré ĩma sawi za'ra wa'aba, Aristobuluhu nhorõwa ãma a'uwẽ norĩ hã. 11Duré Erodiã hã ĩma sawi za'ra wa'aba, ta hã ĩsiré Zudeu. Duré wasisãnawã norĩ Narsizuhu nhorõwa ãma a'uwẽ norĩ hã ĩma sawi za'ra wa'aba.

12Duré ĩma sawi za'ra wa'aba, Trifena hã duré Trifozaha zama. Ta norĩ hã wahidiba Wanhib'apito ma romhuri'wa zahuré. Duré ĩsiwaihu ĩma isawi pe Pérsidi hã, ĩma sawi za'ra wa'aba. Ta hã te te duré 're romhuri pese, Wanhib'apito ma. 13Ma'ãpé duré ĩma sawi za'ra wa'aba, Rufu hã. Ta hã Wanhib'apito ma, te te 're romhuri pese. Ina zama ĩma sawi za'ra wa'aba. Ta hã ĩna ne, te ĩma 're hâimana. 14Duré ĩma sawi za'ra wa'aba, wasisãnawã norĩ Asĩcritu norĩ hã, duré Flegõti hã, duré Ermes hã, duré Patrobas hã, Ermas hã, duré wasisãnawã norĩ isiré ihâimana za'ra norĩ zama. 15Ma'ãpé duré ĩma sawi za'ra wa'aba Filologu hã, duré Zulia hã, duré Nereu hã, duré ihidiba zama, duré Olĩpa hã, duré uburé 'Re ihâimana u'âsi mono nhib'a'uwẽ norĩ isiré ihâimana za'ra norĩ zama.

16Ma'ãpé atob'rata hârâ na asisawi za'ra wa'aba aihâiba mono bâ, asiré isazei'wai wa.

Ãmemhã uburé Cristuhu zazei'wa norĩ, siré 're isi'rã'õtõ mono hã te ãma asawi za'ra wa'wa.

Paulu hã, roti te te i'rãsutuzé

17Ĩsisãnawã norĩ, ma'ãpé 're asipibui pese za'ra wa'aba mono, ni'wam norĩ da'ãma 're isipo'o za'ra mono norĩ wi, Wanhib'apito zazei'wa norĩ wi te te 're iro'wa'rutu za'ra mono norĩ wi hã. Ta norĩ hã Rowasu'uwẽ asima 're iwaibui wa'aba mono zada, te 're hâimana za'ra. Tahawa, ma'ãpé ta norĩ wi 're ai'ré za'ra wa'aba mono! 18E marĩ wa. Ta norĩ hã ãne te te 're i'manharĩ za'ra mono norĩ hã, Wanhib'apito Cristuhu ma, te te 're romhuri za'ra mono õ wa. Tazahã, 'râwi sima si te te 're romhuri za'ra mono wa. Ta norĩ hã tinhimirobzanhamri zasi õ na duré sena newa da'ãma 're iwata za'ra mono na te te 're rob'rãmi za'ra, waptu na i'uwaibaba newa te te da'ãma 're isasõmri za'ra mono norĩ ma hã. 19Tane nherẽ, a norĩ wa'wa hã, uburé da te aiwasu'u waihu'u pese za'ra wa'aba di, Rowasu'uwẽ 're iwapari pese za'ra wa'aba mono na. Tahawa, wa te ĩsima te 're rowẽ, ai'ãma za'ra wa'aba. Wa ĩsima wẽ upta, ai'rãnhimiza'rese sina 're aihâimana za'ra wa'aba mono da, uburé marĩ iwẽ na, uburé marĩ iwasédé te te 're ai'rãpizari za'ra wa'aba mono ãna. 20Romhutu na 'Re ihâimana u'âsi mono, rowẽ tede'wa hã te za Satanasi su pese, aipara zahâpâb za'ra wa'aba.

Wanhib'apito Zezusihi nhimizawizé, ai'ãma 're ihâimana u'âsi za'ra wa'aba mono da si, iwẽ hã!

21Timotiu hã, ĩsiré romhuri'wa hã, te ãma asawi za'ra wa'wa. Lusiu hã, duré Zasã hã, duré Sozipatru hã, ta norĩ hã ĩsiré Zudeu, te duré ãma asawi za'ra wa'wa.

22Wa hã Térsiu, ã hã Pauluhu mreme na te ãma irob'ui'éré, wa ãma asawi za'ra wa'wa.

23Gaiu hã te duré ãma asawi za'ra wa'wa. Taha nhorõwa ãma wa nhamra. Duré tô ãme te isazei'wa norĩ hã 're si'rã'õtõ. Erastu hã te duré ãma asawi za'ra wa'wa. Ta hã ã hã 'ri nho'õmo te, rob'uiprazé ubumroi'wa. Duré wasisãnawã Quartu hã te ãma asawi za'ra wa'wa. 24[Wanhib'apito Zezu Cristuhu nhimizawizé asiré 're ihâimana u'âsi za'ra wa'aba mono da si, iwẽ hã. Tane tô.]

Paulu hã, 'Re ihâimana u'âsi mono ãma iwatazé

25'Re ihâimana u'âsi mono ãma si 're wawata u'âsi za'ra wa'aba mono! E marĩ wa. Õhõ si te te aima 'manharĩ waihu'u pese za'ra wa'aba wa, asina 're i'umnhasi za'ra wa'aba mono zém na asiptete sina ãma 're aihâimana u'âsi za'ra wa'aba mono da hã, Rowasu'uwẽ Zezu Cristuhu wasu'u te 're i'mahârâ mono u'âbâmhã. Ã hã Rowasu'uwẽ hã tô sena uptabi te 're hâimana, duréihã simi'uri na aré 're ihâimana mono hã. 26Tane nherẽ, ãhã na hã sõ'awi ma oto hâi'ré, 'Re ihâimana u'âsi mono hã, isadawa 'mahârâ'wa norĩ te te ãma irob'ui'éré za'ra zéb zarina. Duré 'Re ihâimana u'âsi mono isi'utõrĩ waihu'u'õ te te i'ruzéb zarina, ma tô oto dapoto mono bâ waihu'u za'ra ni, uburé da te 're saze za'ra mono da, duré da te 're 'madâ'â pese za'ra mono da zama.

27'Re ihâimana u'âsi mono misire 're ihâimana mono ãma, duré rowaihu'u'wai uptabi ãma wa za ãma 're wawata u'âsi za'ra, Zezu Cristu te te i'manharĩzéb zarina! Tane tô!

Currently Selected:

Roma 16: xavBP

Highlight

Copy