Popular Bible Verses from Roma 16

Share

Romhutu na 'Re ihâimana u'âsi mono, rowẽ tede'wa hã te za Satanasi su pese, aipara zahâpâb za'ra wa'aba. Wanhib'apito Zezusihi nhimizawizé, ai'ãma 're ihâimana u'âsi za'ra wa'aba mono da si, iwẽ hã!

Ĩsisãnawã norĩ, ma'ãpé 're asipibui pese za'ra wa'aba mono, ni'wam norĩ da'ãma 're isipo'o za'ra mono norĩ wi, Wanhib'apito zazei'wa norĩ wi te te 're iro'wa'rutu za'ra mono norĩ wi hã. Ta norĩ hã Rowasu'uwẽ asima 're iwaibui wa'aba mono zada, te 're hâimana za'ra. Tahawa, ma'ãpé ta norĩ wi 're ai'ré za'ra wa'aba mono!

E marĩ wa. Ta norĩ hã ãne te te 're i'manharĩ za'ra mono norĩ hã, Wanhib'apito Cristuhu ma, te te 're romhuri za'ra mono õ wa. Tazahã, 'râwi sima si te te 're romhuri za'ra mono wa. Ta norĩ hã tinhimirobzanhamri zasi õ na duré sena newa da'ãma 're iwata za'ra mono na te te 're rob'rãmi za'ra, waptu na i'uwaibaba newa te te da'ãma 're isasõmri za'ra mono norĩ ma hã.

'Re ihâimana u'âsi mono ãma si 're wawata u'âsi za'ra wa'aba mono! E marĩ wa. Õhõ si te te aima 'manharĩ waihu'u pese za'ra wa'aba wa, asina 're i'umnhasi za'ra wa'aba mono zém na asiptete sina ãma 're aihâimana u'âsi za'ra wa'aba mono da hã, Rowasu'uwẽ Zezu Cristuhu wasu'u te 're i'mahârâ mono u'âbâmhã. Ã hã Rowasu'uwẽ hã tô sena uptabi te 're hâimana, duréihã simi'uri na aré 're ihâimana mono hã. Tane nherẽ, ãhã na hã sõ'awi ma oto hâi'ré, 'Re ihâimana u'âsi mono hã, isadawa 'mahârâ'wa norĩ te te ãma irob'ui'éré za'ra zéb zarina. Duré 'Re ihâimana u'âsi mono isi'utõrĩ waihu'u'õ te te i'ruzéb zarina, ma tô oto dapoto mono bâ waihu'u za'ra ni, uburé da te 're saze za'ra mono da, duré da te 're 'madâ'â pese za'ra mono da zama. 'Re ihâimana u'âsi mono misire 're ihâimana mono ãma, duré rowaihu'u'wai uptabi ãma wa za ãma 're wawata u'âsi za'ra, Zezu Cristu te te i'manharĩzéb zarina! Tane tô!