1 Corĩtu 1

Paulu hã te te idazawizé

1Wa hã Paulu, Cristu Zezusi te 're sadawa wasu'u mono da, 'Re ihâimana u'âsi mono te te sima ĩwẽzéb zarina ĩzô ihârâ, wasisãnawã Sostenihi me, wa ãma aima rob'ui'éré za'ra wa'aba ni, 2Corĩtu na 'ri nho'õmo nhisi ãma 'Re ihâimana u'âsi mono nhib'a'uwẽ na 're i'aihâimana za'ra wa'aba mono norĩ ma, Cristu Zezusi te te sima i'aipisutu za'ra wa'wa hã, duré asô ihârâ za'ra wa'wa 'Re ihâimana u'âsi mono nhib'a'uwẽ na aimawi 're aihâimana za'ra wa'aba mono da, duré ropâ Wanhib'apito Cristu Zezusihi ãma 're iwata za'ra mono norĩ ma, õ hã Isib'apito za'ra wate za'ra ãmab zama.

3Wamama 'Re ihâimana u'âsi mono nhimizawizé duré ite datoi u'âsi zé, duré Wanhib'apito Zezu Cristuhu te zama, ai'ãma 're ihâimana u'âsi za'ra wa'aba mono da si, iwẽ hã!

'Re ihâimana u'âsi mono iwẽ te te dama 're i'apisutu mono zé, Cristuhu ãma 're danomro mono wa

4Ĩte 'Re ihâimana u'âsi mono ãma, wa 're ĩwata u'âsi, tinhimizawizé te te aima 're i'anhomri aba mono u'âbâ, Cristu Zezusihi ãma 're i'anomro aba mono zarina. 5Cristu Zezusihi ãma 're i'anomro aba mono zarina, ma tô 'Re ihâimana u'âsi mono hã uburé ã norĩ na ãma asibrob za'ra wa'wa: Rowasu'uwẽ dama 're 'mahârâ za'ra wa'aba mono da hã, duré rowaihu'u wẽ zarina uburé marĩ, ãma 're iwaihu'u za'ra wa'aba mono da hã. 6Cristuhu wasu'uwẽ isaze za'ra wa'wa hã te siptete uptabi na oto aiwa tihâimana za'ra wa'wa. 7Tahawa, 'Re ihâimana u'âsi mono nhoprubzé romhuri imono bâ sipu'u pese na te te dama 're i'anhomri mono, hâiwa hawib zô aiwi 'mairowaptâ'â aba õ di, Wanhib'apito Zezu Cristu apâ we imorĩzéb zô 're asimipari za'ra wa'aba mono ré hã. 8Wanhib'apito Zezu Cristu hã te za te te 're ai'apawapto wẽ wa'wa rob'rãsutu u, aiwasédé da te ai'ãma 'maihiri waihu'u aba tõ da, apâ we imorĩzé bâtâ ãma hã. 9'Re ihâimana u'âsi mono hã umnhasi uptabi di. Ta hã ma tô asô tihârâ za'ra wa'wa, I'ra Zezu Cristuhu siré 're aihâimana za'ra wa'aba mono da, Wanhib'apito siré.

Corĩtu ãma isazei'wa norĩ hã sima isipo'ozé

10Ĩsisãnawã norĩ, Wanhib'apito Zezu Cristu ĩnhimiroti pire te te ĩma isõmri zarina, wa za ãma aiwi waptẽrẽ za'ra wa'wa, ãne: Ma'ãpé aimreme na ãma 're asisazei wẽ za'ra wa'aba mono. Duré asima 're aipo'o wa'aba mono tõ. Ma'ãpé simisutu misi haré 're rosa'rata za'ra wa'aba mono. Duré misi haré marĩ asima 're iwẽ za'ra wa'aba mono zarina 're aihâimana za'ra wa'aba mono. 11Ĩsisãnawã norĩ, e marĩ wa, wa ãne ãma aima nharĩ za'ra wa'wa. Nima norĩ Cloe sipoto hawi a'uwẽ norĩ hã te te ĩma rowasu'u za'ra wa, 're i'asiwasu za'ra wa'aba mono na hã. 12Te aima roti za'ra wa'aba da, wa ĩsima wẽ, ãne na: Aihâiba mono bâ, te sipu'u pese na asina 're inharĩ za'ra wa'aba mono, ãne: “Wa hã Pauluhu niwĩmhã.” Duré niwamhã, ãne: “Wa hã Apoluhu niwĩmhã.” Niwamhã duré, ãne: “Wa hã Pedruhu niwĩmhã.” Duré niwamhã, ãne: “Wa hã Cristuhu niwĩmhã.” 13Ãne wamhã, e Cristu hã wa'õtõ ahâ na da te po'o mono bâ. E duré Paulu hã wedepo'o nhonhi'rãmi na, da te asada sasõmri za'ra wa'aba bâ. E niwamhã Pauluhu nhisi na â dawabzuri hã da te aima 'manharĩ za'ra wa'aba bâ.

14'Re ihâimana u'âsi mono ãma si, wa ĩwata, â dawabzuri te aima i'mai'manharĩ aba õ zém na. Crispu norĩ ma si Gaiuhu me wa tô tãma 'manharĩ zahuré. 15Ãne wamhã, ni'wa hã te te nharĩ waihu'u õ di za, ĩnhisi na â dawabzuri i'manharĩ za'ra wa'aba na hã. 16(Hã! Wa tô ĩsi'ãma po're puru duré, Estéfana hawi a'uwẽ norĩ ma zama â dawabzuri te i'manharĩ na hã. Tane nherẽ, ĩsi'ãma ĩpo're pu'u õ di, ni'wai ma, ã norĩ nhipai u te duré i'manharĩ na hã.) 17E marĩ wa. Cristu hã te te ĩpisutu õ wa, â dawabzuri te dama 're a'manharĩ mono da. Tazahã, Rowasu'uwẽ te 're 'mahârâ mono da si. Ti'ai ãma 're idamreme zusi mono zarina te 're rowasu'u mono õ di, Cristu wedepo'o nhonhi'rãmi na idâ'â nhiptetezé hã simani tõ da.

Cristu hã, dahâimanazém na rowaihu iwẽ, duré 'Re ihâimana u'âsi mono waihu'u pe

18Rowasu'uwẽ wedepo'o nhonhi'rãmi wasu'u hã, tô tarére hã 're isisimini za'ra mono norĩ ma hã. Tazahã, wanho'reptuzé, wa te wasina 're i'uwaimrami za'ra mono norĩ ma hã, 'Re ihâimana u'âsi mono waihu'u pe, te wama 're hâimana za'ra. 19E marĩ wa. Ibaihâ Iwazé pese na rob'ui'éré hã te te nharĩ wa, ãne:

“Wa za te 're a'uprosi, rowaihu'u pese 'wa norĩ nhimirowaihu hã.

Isimiromnhoré ré norĩ nhimirowaihu'u zama wa za duré te tiwi 're a'uprosi.”

20Ãne wamhã, e niha rowaihu'u pese 'wa norĩ hã te te nharĩ za'ra da bâ, duré isimiromnhoré ré norĩ zama. E niha te te duré nharĩ za'ra da bâ, robzanhamri nhipese'wa norĩ zama. 'Re ihâimana u'âsi mono, ma tô te te 're hâi'ré, ti'ai ãma rowaihu hã tarére na.

21'Re ihâimana u'âsi mono hã tinhimirowaihu'u wẽ na te te 'rui õ di, ti'ai ãma a'uwẽ norĩ tinhimirowaihu'u na te te siwi iwaihu'u da hã. Tazahã, ma tô sima pisutu, te te 're isaze za'ra mono norĩ si te te 're anho'reptui mono da. Ãne hã ma tô 'manha, Rowasu'uwẽ, wa te 're i'mahârâ za'ra mono zarina, “rowasu'u tarére” na da te 're iwamri za'ra mono na. 22Zudeu norĩ hã te te siwi 're waptẽrẽ, sena zô iwaihu'uzéb da, marĩ dama i'manharĩ waihu'u õ. Duré Zudeu'õ norĩ hã dahâimanazém na rowaihu'u zô te 're sõpré. 23Tane nherẽ, wa norĩ hã Cristu wedepo'o nhonhi'rãmi na da te isasõmri wasu'u si, wa wa te dama 're 'mahârâ za'ra. Ta hã Rowasu'uwẽ, Zudeu norĩ wi te te 're ro'wa'ré. Duré Zudeu'õ norĩ hã te te sima ãma 're rosa'rata za'ra, tarére na. 24Tazahã, 'Re ihâimana u'âsi mono, sô 're ihârâ za'ra mono norĩ ma, te Cristu hã tãma 're hâimana za'ra, 'Re ihâimana u'âsi mono waihu'u pese na, duré 'Re ihâimana u'âsi mono nhimirowaihu'u wẽ na, Zudeu norĩ ma duré Zudeu'õ norĩ ma zama. 25E marĩ wa. 'Re ihâimana u'âsi mono nhimi'manharĩzé, tarére na da te ãma 're rosa'rata za'ra mono nherẽ, ti'ai ãma danhimirowaihu'u nhipai u pese, te 're hâimana. Duré 'Re ihâimana u'âsi mono nhimi'manharĩzé, isib'uwa na da te ãma 're rosa'rata za'ra mono nherẽ, siptete uptabi di, ti'ai ãma danhiptete nhipai u pese.

26Ĩsisãnawã norĩ, ma'ãpé aihâimanazém na asi'ãma aipo're pu'u za'ra wa'aba, 'Re ihâimana u'âsi mono asô hârâ za'ra wa'aba wamhã. Ti'ai ãma danhimirob'madâ'â na hã, ai'umro na te aré 're aihâimana za'ra wa'aba mo, rowaihu'u wẽ 'wa na, duré dama asiptete na, niwamhã dama i'madâ'â za'ẽtẽ norĩ nhihudu na. 27Tane nherẽ, ti'ai ãma rowaihu'u pese 'wa norĩ hã te te 're anhisém nomri mono da, 'Re ihâimana u'âsi mono hã ma tô te te 're apisutu, ti'ai ãma tarére na da te ãma 're irosa'rata za'ra mono norĩ hã. Duré ti'ai ãma isiptete norĩ hã te te 're anhisém nomri mono da, ma tô te te 're apisutu, sib'uwa na da te ãma 're irosa'rata za'ra mono norĩ hã. 28Duré uburé marĩ ti'ai ãma 're idahâimana za'ra mono norĩ ma, pire na 're ihâimana za'ra mono, te te 're apru mono da, ma tô 'Re ihâimana u'âsi mono hã te te 're apisutu, ti'ai ãma da te 're iwẽ'õ pese za'ra mono hã, duré wapu na da te 're i'madâ'â za'ra mono hã duré uburé marĩ dai ãna da te 're i'madâ'â za'ra mono hã. 29Ãne wamhã, ã hã te te iwasu'u hã, ni'wa hã 're si'madâ'â zei mono tõ da, te te waihu'u pese wa, 'Re ihâimana u'âsi mono nho'a 're ihâimana mono na. 30Tane nherẽ, 'Re ihâimana u'âsi mono hã ma tô aipisutu za'ra wa'wa, Cristu Zezusihi ãma 're aihâimana za'ra wa'aba mono da. Ma tô duré 'manha, Cristu hã wate za'ra rowaihu iwẽ na 're hâimana mono da. Tahawa, tô Cristuhu u'âbâ, te 'Re ihâimana u'âsi mono hã i'uwaibaba na 're iwahâimana za'ra mono na te te 're wa'a'madâ'â oto. Taha u'âbâ, wa duré 'Re ihâimana u'âsi mono nhib'a'uwẽ na oto 're wahâimana za'ra. Taha zarina, wa duré wanho'reptuzé hã wasina uwaimrami za'ra ni. 31Tahawa, Ibaihâ Iwazé pese na rob'ui'éré hã te tinha, ãne: “Ni'wa hã te te sima 're rowẽ mono da wamhã, te te sima 're rowẽ mono, Uburé Danhib'apito marĩ te te 're i'a'manharĩ mono zém na si.”

Currently Selected:

1 Corĩtu 1: xavBP

Highlight

Copy