Tiko Voli mai na Lekutu 27
27
O Iratou na Luve i Silovati Yalewa
1E ratou a lako voleka mai na luve i Silovati yalewa; o Silofa na luve i Eferi, na luve i Kiliati, na luve i Mekiri, na luve i Manasa, ena mataqali Manasa na luve o Iosefo, ia oqo na yacadratou na yalewa na luve i Silovati: o Mala, o Noa, o Okila, o Milika kei Tirisa. 2E ratou a tu e matadrau o Mosese, kei Iliesa na bete, kei ira na i liuliu, kei na lewenivanua taucoko, ena katuba ni Vale ni Veitavaki, ka kaya, 3A sa mate na tama i keitou ena vanua lala; ia sa sega ni wili vata kei ira ka ra soqoni vata kei Kora me ra vorati Jiova; ia sa mate ga o koya ena vuku ni nona i valavala ca; ka sa sega na luvena tagane. 4Na cava me kau laivi kina na yaca ni tama i keitou mai na nona mataqali, baleta wale ga ni sega na luvena tagane? Mo ni solia vei keitou e dua na i votavota mai vei ira na weka i tama i keitou.
5Sa qai kauta cake na ka me baleti iratou, o Mosese, me vakatulewa kina o Jiova. 6A sa qai vosa vei Mosese o Jiova, ka kaya, 7E ratou sa dodonu na luve i Silovati; mo ni solia vei iratou e dua na i votavota me ratou taukena mai vei ira na weka i tamadratou: ia mo ni solia vei iratou na i votavota i tamadratou.#Tiko 36.2 8Ia mo vosa vei ira na Isireli, ka kaya, ‘Kevaka sa mate e dua na tamata, ka sa sega na luvena tagane, mo ni qai solia na nona i votavota vua na luvena yalewa. 9Kevaka sa sega na luvena yalewa, mo solia na nona i votavota vei ira na tuakana kei na tacina. 10Kevaka sa sega na tuakana se tacina, mo ni qai solia na nona i votavota vei ira na tamadra lalai. 11Ia kevaka sa sega na tamana lailai, ni solia na nona i votavota vua na wekana voleka sara ena nona mataqali, me taukena. Oqo sai vakaro, ka i lesilesi talega me ra vakayacora na Isireli, me vaka sa vakarota vei Mosese o Jiova.
Digitaki o Josua me Sosomitaki Mosese
(Vrua 31.1-8)
12Sa qai kaya vei Mosese o Jiova, “Mo cabe cake ki na ulunivanua oqo o Aparimi, ka raica na vanua ka'u sa solia vei ira na Isireli.#Vrua 3.23-27; 32.48-52 13Ia ni o sa raica oti, o na qai toki talega vei ira na nomu qase, me vaka a sa toki yani kina o Eroni na tuakamu, 14ena vuku ni nomudrau a talaidredre ki na noqu vosa ni ra a vosa kudrukudru na lewenivanua ena vanua lala o Sini, mo drau vakarokorokotaki au ena wai e matadra na lewenivanua.” (Oqo ena wai o Meripa kei Katesi ena vanua lala o Sini.)
15Sa vosa vei Jiova o Mosese, ka kaya, 16Me lesia mada o Jiova, na Kalou ni yalodra na tamata kecega, e dua na tamata me lewai ira na lewenivanua, 17o koya me liu e matadra ni ra curu yani, ka me liu talega ni ra curu lesu mai; me tuberi ira yani ka tuberi ira mai; me ra kakua kina ni vaka na sipi sa sega na kedra i vakatawa, o ira na lewenivanua i Jiova.#1Tui 22.17; Isi 34.5; Maciu 9.36; Mari 6.34
18Sa qai kaya vei Mosese o Jiova, “Mo kauti Josua na luve i Nuni na tamata sa tiko vua na Yalo Tabu, ka tabaki koya ena ligamu;#Lako 24.13 19ka vakaturi koya ena mata i Iliesa na bete, kei na matadra na lewenivanua taucoko ka lesi koya me kemu i sosomi e matadra. 20Mo wasea vua eso na kaukauwa me rawa ni vakataulewa, me ra talairawarawa kina vua na lewenivanua taucoko ni Isireli. 21Ia ena vakararavi o koya vei Iliesa na bete, o koya sa lesi me dau vakataroga na lewa vakalou mai na vakayagataki ni Urimi kei na Cumimi.#27.21 Urimi kei na Cumimi: E rua na i yaya tabu ni sokalou ka vakayagataka na bete me kila kina na loma ni Kalou; ka sega ni se kilai vakamatata na kedrau i vakavakayagataki. Ena sala oqo, ena vakatakila kina o Iliesa vei Josua kei na lewenivanua e Isireli na veika kece sara me baleti ira.”#Lako 28.30; 1Samu 14.41; 28.6
22A sa kitaka o Mosese me vaka sa vakarota vua o Jiova; ka sa kauti Josua ka vakatura ena mata i Iliesa na bete, kei ira kece na lewenivanua. 23Me vaka na i vakaro i Jiova, sa tabaka na ulu i Josua e ligana o Mosese ka lesi koya me veisosomitaki ena vukuna.#Vrua 31.23
Currently Selected:
Tiko Voli mai na Lekutu 27: FNVDC12
Highlight
Copy
Compare
Share
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.