YouVersion Logo
Search Icon

Maciu 4

4
Na Veretaki i Jisu
(Mari 1.12-13; Luke 4.1-13)
1Sa qai kauti Jisu cake na Yalo Tabu ki na vanua lala me veretaki koya kina na tevoro.#Ipe 2.18; 4.15
2Ia ni sa oti e 40 na siga kei na bogi na nona lolo tiko, a sa viakana. 3Sa qai lako yani na dauvere ka kaya vua, “Kevaka o sa Luve ni Kalou, kaya mada ki na veivatu oqo me ra vuki me ra i buli madrai.”
4Ia sa sauma o Jisu ka kaya, “Sa volai tu, ‘Ena sega ni bula na tamata ena madrai duadua ga; ia sa bula ga ena vosa kecega sa lako mai na gusu ni Kalou.’ ”#Vrua 8.3
5Sa qai kauti koya na tevoro ki na koro tabu o Jerusalemi ka vakaturi koya ena dela ni Valenisoro, 6ka kaya vua, “Kevaka o sa Luve ni Kalou, mo rika sobu; ni sa volai tu,
‘Ena vakaroti ira na nona agilosi o koya ena vukumu:
Ka ra na tabei iko cake e ligadra,
De tavutu na yavamu ena dua na vatu.’ ”#Same 91.11,12
7Sa qai kaya vua o Jisu, “Sa volai talega, ‘Mo kakua ni veretaka na Turaga na nomu Kalou.’ ”#Vrua 6.16
8Sa qai kauti koya tale na tevoro ki na dua na ulunivanua cecere sara, ka vakaraitaka vua na veimatanitu kecega e vuravura, kei na kedra lagilagi; 9ka qai kaya, “Au na solia vei iko na veika kecega oqo kevaka o cuva sobu ka vakarokoroko vei au.”
10Sa qai kaya vua o Jisu, “Lako tani, Setani! Ni sa volai tu, ‘Mo vakarokoroko vua na Turaga na nomu Kalou, ka mo qaravi koya duadua ga.’ ”#Vrua 6.13
11Sa qai biuti koya na tevoro, ka ratou sa qai lako mai eso na agilosi ka mai qaravi koya.
Sa Tekivutaka na Nona Cakacaka e Kalili o Jisu
(Mari 1.14-15; Luke 4.14-15)
12Ia ni sa rogoca o Jisu ni sa biu ki na vale ni veivesu o Joni, sa suka tale ki Kalili;#Maciu 14.3; Mari 6.17; Luke 3.19,20 13ka sa biuti Nasareci ka sa la'ki tiko mai Kapenaumi e baravi, ena i yalayala kei Sevuloni kei Nafitalai;#Joni 2.12 14Me vakayacori sara kina na vosa i Aisea na parofita, ni a kaya,
15“Na vanua o Sevuloni kei na vanua o Nafitalai,
Ena sala vaka ki wasawasa, ena tai kadua ni Joritani,
O Kalili, na nodra vanua na kai matanitu tani!#Aisea 9.1,2
16O ira era tiko ena butobuto,
Era na raica e dua na rarama levu.
Vei ira era tiko ena vanua ni yaloyalo ni mate
Ena cila kina na rarama.”
17Mai na gauna koya, a sa vakatekivu me vunautaka voli kina o Jisu na nona i tukutuku oqo: “Mo ni veivutuni mai na nomuni i valavala ca, ni sa voleka mai na matanitu vakalomalagi!”#Maciu 3.2
Sa Kacivi Iratou e Lewe Va na Gonedau o Jisu
(Mari 1.16-20; Luke 5.1-11)
18Ni sa lako voli ena baravi mai Kalili o Jisu, sa mani raica e lewe rua na veitacini, o Saimoni o koya e vakatokai o Pita kei Adriu na tacina e rau biu lawa tiko ki wai, ka ni rau sa gonedau. 19Sa qai kaya vei rau o koya, “Drau muri au mai, ka'u na vakavulici kemudrau mo drau gonedau ni tamata.” 20A rau sa biuta sara tu na nodrau lawa ka muri koya.
21Sa qai toso tale vakalailai ki liu o koya, ka raica e lewe rua tale na veitacini, o Jemesa na luve i Sepeti kei Joni na tacina, ni ratou tiko vata kei Sepeti na tamadrau ena waqa, ka ratou vakarautaka tiko na nodratou lawa ni qoli. A sa kacivi rau o Jisu, 22ka rau sa biuta sara na waqa kei tamadrau, ka muri koya.
Sa Veivakatavulici, Vunau, ka Veivakabulai o Jisu
(Luke 6.17-19)
23Sa qai veilakoyaki voli e Kalili taucoko o Jisu, ka veivakatavulici ena nodra veivalenilotu, ka vunautaka na i Tukutuku Vinaka ni matanitu, ka vakabulai ira na tamata mai na veimate kecega kei na malumalumu kecega.#Maciu 9.35; Mari 1.39 24Sa qai rogovaki yani na kena i rogorogo ki Siria taucoko, ka ra sa kau vua na tamata kecega era tauvimate ka vakaleqai tu ena veimataqali mate se yaluma, kei ira na curumi tevoro, na lialia, kei ira na paralasi; ka sa vakabulai ira kece o koya. 25Era sa muri koya e lewe vuqa sara mai Kalili kei na Koro e Tini, mai Jerusalemi, kei Jutia, kei na tai kadua ni Joritani.

Currently Selected:

Maciu 4: FNVDC12

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy