Maciu 3
3
Na Vunau Voli nei Joni na Dauveipapitaisotaki
(Mari 1.1-8; Luke 3.1-18; Joni 1.19-28)
1Ena gauna o ya, a sa lako voli mai o Joni na Dauveipapitaisotaki ka dau vunau ena loma ni vanua mai Jutia, ka kaya, 2“Ni veivutuni ni sa voleka na matanitu vakalomalagi!”#Maciu 4.17; Mari 1.15 3Ni sai koya ga oqo ka a vosa kina o Aisea na parofita, ka kaya,
“Na domona e dua sa kacikaci voli e loma ni vanua:
Dou caramaka na sala ni Turaga;
Cakava me dodonu na nona gaunisala!”#Aisea 40.3 (LXX)
4Ia sa vakaisulu o Joni ena i sulu vuti ni kameli, ka vau na tolona ena i oro kuli-ni-manumanu, ka kena kakana na vodre kei na oni ni veikau.#2Tui 1.8 5Era sa qai lako yani vua o ira mai Jerusalemi kei Jutia taucoko, kei na yasana kece e volekata na Joritani, 6ka sa papitaisotaki ira o koya ena uciwai na Joritani, ni ra sa vakatusa tiko kina na nodra i valavala ca.
7Ia ni sa raici ira e lewe vuqa na Farisi kei na Setoki ni ra sa lako tiko yani vua me ra papitaisotaki, sa kaya vei ira, “Oi kemuni na kawa ni gata! O cei sa vakasalataki kemuni mo ni dro tani mai na cudru sa lako tiko mai?#Maciu 12.34; 23.33 8Ni vuataka na vua e kilikili kaya na veivutuni, 9ka kakua ni via nanuma mo ni kaya e lomamuni, ‘A tama i keimami o Epara-ama’, ni'u sa kaya vei kemuni, sa rawa vua na Kalou me vakatubura me ra luve i Epara-ama na veivatu oqo.#Joni 8.33 10Sa toka sara ga oqo na matau ena veivunikau me tatalaki sobu kina na kau kecega e sega ni vuataka na vua vinaka, ka ra biu ki na buka.#Maciu 7.19 11Au sa papitaisotaki kemuni ena wai ena nomuni sa veivutuni; ia o koya e muri au mai e levu cake vei keirau, ka sega ni rauti au me'u i kaukau ni nona i vava; ena papitaisotaki kemuni o koya ena Yalo Tabu kei na bukawaqa. 12Sa taura tu e ligana na nona i sivi ni sila me vakasavasavataka kina na nona buturara ni caka sila, ka binia vata na sila ki na nona lololo; ia na qana ena vakama ena buka e sega ni bokoci rawa.”#Ym 5.14,23
Na Papitaisotaki i Jisu
(Mari 1.9-11; Luke 3.21-22)
13Sa qai lako o Jisu mai Kalili ki na Joritani me la'ki papitaisotaki koya o Joni. 14A via tarovi koya o Joni, ka kaya, “E dodonu me'u papitaisotaki mai vei kemuni, ia oqo o ni sa qai lako tale mai vei au!”
15A sa sauma o Jisu, ka kaya vua, “Ia me yaco vakakina mada ga ena gauna oqo, ni daru na vakayacora kina na ka kece sa vinakata na Kalou.” A sa mani vakadonuya kina o Joni.
16Ia ni sa papitaisotaki oti o Jisu sa cabe sara mai wai, ka raica, sa qai tadola mai na lomalagi, ka sa raica sara o koya na Yalo ni Kalou ni sa lako sobu mai me vaka na ruve ka mai ro toka vua. 17Sa qai rogo mai e dua na domo mai lomalagi, ka kaya, “Oqo na Luvequ lomani e duabau ga, ka'u sa dau vinakata vakalevu.”#Vteki 22.2; Same 2.7; Aisea 42.1; Maciu 12.18; 17.5; Mari 1.11; Luke 9.35
Currently Selected:
Maciu 3: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.