Jeremaia Na i Vakamacala Taumada
Na i Vakamacala Taumada
A sa bula voli o Jeremaia na parofita ena i otioti ni kavitu ni senitiuri se yabaki drau kei na i tekivu ni kaono ni senitiuri. A sa vakasalataki ira na tamata ni Kalou ena gauna balavu ni nona vunau voli ni ra na sotava na leqa levu baleta na nodra sa qarava na kalou tani kei na nodra i valavala ca. A sa bula tiko ka raica ni sa yaco na veika oqori: a sa bale o Jerusalemi ki na liga i Nepukanesa na tui Papiloni, a sa vakarusai na koro kei na Valenisoro, ka sa kau vakabobula na tui Juta kei na vuqa na tamata ki Papilonia. A sa parofisaitaka talega ni ra na vakalesui tale mai na tamata ka na vakabulai tale na nodra vanua.
Na i Vola i Jeremaia e rawa ni wasewasei me vakaoqo: (1) Na kacivi nei Jeremaia; (2) Na i tukutuku ni Kalou eso ki na vanua o Juta kei ira na kena dauveiliutaki ena gauna ni veiliutaki vakatui nei Josaia, kei Jo-akimi, kei Jo-akini, vata kei Setekaia; (3) Na veika eso mai na i tukutuku i Baruki na vunivola i Jeremaia, ka okati talega kina na parofisai eso kei na veika bibi a bula donumaka o Jeremaia; (4) Na i tukutuku eso mai vei Jiova me baleta na veimatanitu tani eso; (5) E dua na i kuri ni tukutuku, ka sa tukuni kina na rusa i Jerusalemi kei na nodra kau vakabobula ki Papilonia.
A sa tamata dauveikauwataki o Jeremaia ka sa daulomani ira vakalevu na kai nona, ka sa cata vakaukauwa sara me dau vakadewataka na i tukutuku ni veicudruvi vei ira. E vuqa na tikina ena i vola oqo, sa dau tukuna o koya ena yalobibi na veika dredre ka mosimosi e curuma na nona bula ena vuku ni nona sa kacivi mai vua na Kalou me parofita. A sa vaka na bukawaqa e lomana na vosa ni Turaga, ka sa sega ni rawa vua me tarova.
Eso na vosa talei dina ena i vola oqo sa dusia na veika sa tu mai na taudaku ni gauna dredre ka bula donuya o Jeremaia ena kena yacovi yani na siga sa vakataudeitaki kina na veiyalayalati vou, e dua na veiyalayalati me ra na maroroya na tamata ni Kalou ka segai tale ni ra vakananumi kina, baleta ni sa na volai sara tu ga e vu ni yalodra (31.31-34).
Na Lewe ni Vola
Na kacivi nei Jeremaia 1.1-19
Na veiparofisai ena dela ni gauna i Josaia, Jo-akimi, Jo-akini kei Setekaia 2.1–25.38
Na veika eso ka yaco ena bula i Jeremaia 26.1–45.5
Na veiparofisai eso era vunauci kina na veivanua 46.1–51.64
Na bale nei Jerusalemi 52.1-34
Currently Selected:
Jeremaia Na i Vakamacala Taumada: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.