Aisea 66
66
Sa Vakataulewa ki na Veimatanitu o Jiova
1 #
Maciu 5.34; 23.22;
Maciu 5.35
#Caka 7.49,50A sa kaya o Jiova,
“Sa noqu i dabedabe vakatui na lomalagi
Ka sai tutu ni yavaqu na vuravura.
Na mataqali vale vakacava me'u tiko kina?
2Oi au ga au a bulia na veika kece!
Ka sa noqu na veika kece oqo.
Au sa vinakati ira era yalo malumalumu ka veivutuni,
O ira era rerevaki au ka talairawarawa vei au.
3Era sa cakava na tamata na veika ga era dui vinakata.
Era vakamatea e dua na bulumakau me i soro
Se cabo e dua na tamata;
Era vakacabora e dua na lami,
Se musuka e dua na domo ni koli.
Era vakacabora na ka boi vinaka,
Se masu ki na matakau,
Ka taleitaka na mataqali sokalou vakasisila.
4Oi au talega au sa digitaka me ra sota kei na veika ni leqa
Na veika sara ga era rerevaka,
Baleta ni'u a kacivi ira
A qai sega ni dua e rogo mai.
Era sa digitaka me ra talaidredre vei au
Ka vakayacora na veika ca.”
5Ni rogoca mada na veika a kaya o Jiova,
‘Oi kemuni kece o ni rerevaka ka talairawarawa vua.
Baleta na nomuni yalodina vei au
Ena so vei kemuni era na cati kemuni.’
Era na vakalialiai kemuni, ka kaya,
‘Keimami vinakata me keimami raica mo ni marau,
Ia me vakaraitaka o Jiova na nona kaukauwa
Ka vakabulai kemuni.’
6Ni rogoca mada na rorogo levu o ya mai na koro!
E rorogo mai na Valenisoro,
Na domo ni nona vakatotogitaki ira
Na nona meca o Jiova!
7 #
Vtaki 12.5
“Na noqu koro tabu e vaka e dua na tina ni gone
E vakasucuma vakasauri e dua na luvena gone tagane,
Ka sega mada ni bau taratara.
8Sa bau dua mada e rogoca
Se raica e dua na ka vaka o ya.
E bau dua li na matanitu e a sucu ga ena dua na siga?
Ena sega so ni rarawa vakadede o Saioni
Ni bera ni sucu mai na matanitu.”
9A sa kaya o Jiova.
“Ni kakua ni nanuma au na kauti ira mai na noqu tamata
Ki na gauna me ra sucu kina,
Ka qai sega ni laiva me ra sucu.
10Ni marau vata kei Jerusalemi, ka reki ena vukuna
Oi kemuni kece o ni lomana na koro oqo!
Ni marau vata kaya oqo
Oi kemuni kece o ni a tagicaka!
11O ni na marautaka na nona tubu cake,
Me vaka e dua na gone ena lomaserei tinana.”
12A sa kaya o Jiova.
“Au na kauta mai vei iko na sautu me tawa mudu.
Ena drodro mai vei iko na i yau ni veimatanitu
Me vaka e dua na uciwai e sega ni maca rawa.
O na vaka e dua na gone e qarava na tinana,
E roqota ena ligana ka qaravi ena yalololoma.
13Au na vakacegui kemuni e Jerusalemi
Me vaka na nona vakaceguya na luvena e dua na tina.
14Ni o ni raica ni sa na yaco na ka oqo
O ni sa na qai marau;
Ka na vakavuna mo ni bulabula ka kaukauwa.
Ia o ni sa na qai kila ni sai au o Jiova,
Au sa dau vukei ira era talairawarawa vei au
Ka vakaraitaka na noqu cudru vei ira na kequ meca.”
15Ena lako mai o Jiova ena buka.
Ena vodo mai ena bati ni cagi kaukauwa
Me mai totogitaki ira sa cudruvi ira o koya.
16Ena totogitaki ira kece na tamata e vuravura era sa cala
Ena nona i seleiwau kei na bukawaqa,
Ka ra na lewe vuqa sara era na mate.
17A sa kaya o Jiova, “O ira kece era vakasavasavataki ira me baleta na qaravi kalou tani ka dau lako vakaiyatu yani ki na veicabocabo ni soro ni veiwere, o ira era dau kana vuaka, kalavo kei na kakana tawa savasava sa voleka na gauna me ra mate kina. 18Au sa kila na nodra vakasama kei na nodra i valavala. Au sa lako mai me'u soqoni ira vata na lewe ni veimatanitu kecega. Ni ra na lako vata mai era na qai raica na noqu lagilagi, 19au na qai cakava e dua na ka veivakurabuitaki ena kedra maliwa. Ia au na qai vakabula eso vei ira ka'u na qai talai ira yani ki na veimatanitu era sa sega ni bau rogoca na kequ i rogorogo se raica na noqu kaukauwa kei na noqu i ukuuku! Au na talai ira yani ki Sipeini Libiya vata kei ira na kena dauvana ena dakaititi, ki Tupali vata kei Kirisi. Era na la'ki tukuna ki na veimatanitu oqo na noqu qaqa: 20Era na kauti ira lesu mai na wekamuni mai na veimatanitu oqori me i loloma vei au. Era na kauti ira mai ki na noqu ulunivanua tabu ena ose, meuli, kameli, kareti, qiqi me vaka na nodra kauta mai na Isireli na i soro sila ki na vale ni Soro ena veiyaya savasava. 21Au na qai lesia eso me bete ka so me ra Livai.”
22 #
Aisea 65.17; 2Pita 3.13; Vtaki 21.1 A sa kaya o Jiova, “Ia me vaka na nodrau tudei tu e mataqu na vuravura vou kei na lomalagi vou; ena tudei vakakina na nomuni kawa kei na yacamuni. 23Ena Solevu ni Vulavou kece kei na Siga ni Vakacecegu kece, era na lako mai na tamata kece ki mataqu me ra qaravi au. 24#Ud 16.17; Mari 9.48Ia ni ra sa na lesu, era na raica na yago ni tamata mate era sa dau talaidredre vei au. Ena sega ni mate na kedra baca, ka na sega talega ni bokoci rawa na kedra buka; ka ra na ka vakasisila vei ira na tamata kecega.”
Currently Selected:
Aisea 66: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.