Jeremaia 3
3
Sega ni Yalodina o Isireli
1A sa kaya o Jiova, “Kevaka e dua na tagane sa veisere kei na watina yalewa, ka sa biuti koya talega na watina yalewa ka la'ki watina tale e dua, e dodonu li me tauri koya tale na tagane watina e liu? Sa vakadukadukalitaki na vanua ena nomu veidauci kei ira na tagane o sa domona, ia ka'u sa sureti iko ga mo lesu tale mai vei au, sa kaya o Jiova. 2Rai cake mada ki na veidelana. E sega li ni dua na vanua o a sega ni vakayacora kina na i valavala sa vaka na yalewa dautagane? Ni o dau waraki ira o domona ena bati ni gaunisala, me vaka e dua na kai Arapea ena vanua dravuisiga. O sa vakadukadukalitaka na vanua ena nomu i tovo ca ni dautagane. 3O ya na vuna sa tarovi kina na uca, ka sa sega ni tau na uca ni vula i tubutubu. Io, o sa vaka na i rairai ni yalewa dautagane; o sa sega ni bau madua.
4Ia oqo o sa kaya vei au, “Oi kemuni na tamaqu o a sa dau lomani au me tekivu mai na gauna ka'u a gone kina. 5O ni cudru tiko li ka tawa mudu, ka na sega ni oti rawa li na nomuni rarawa? Isireli, sai koya o ya na vakatutusa ni gusumu, ia o sa cakava tikoga na ka ca kecega o cakava rawa.”
E Dodonu me Rau Veivutuni o Isireli kei Juta
6A sa kaya vei au o Jiova ena gauna a tui kina o Josaia, “O sa raica na ka sa cakava o Isireli, na yalewa sega ni yalodina ena nona sa gole tani vei au? Sa kaba cake ki na veidelana cecere kei na ruku ni veivunikau me dautagane kina? 7Au nanuma, ni sa oti na nona cakava na ka kece oqo, sa na lesu dina mai vei au! Ia, sa sega ni lesu mai, ka sa raica na tacina sega ni yalodina o Juta na ka oqo. 8Sa raica talega o Juta ni'u sa veisere kei Isireli ka solia vua na i vola ni veibiu baleta ni sa gole tani mai vei au ka yaco me yalewa dautagane. Ia o Juta na taci Isireli sega ni yalodina sa sega ni rere. Sa yaco talega me dautagane, 9Ka sa sega ni kauwaitaka vakalailai. Sa vakadukadukalitaka na vanua; sa veibutakoci ena nona sa ia ga na sokalou ki na vatu kei na veivunikau. 10Ni oti kece oqo, sa lasutaka wale tikoga na nona lesu mai o Juta na taci Isireli sega ni yalodina; sa sega ni lesu mai ena yalona taucoko” Sa kaya vakaoqo o Jiova.
11Ia a kaya vei au o Jiova, e dina sa gole tani vei au o Isireli, sa vinaka cake mai vei Juta na nona sega ni yalodina. 12Sa tukuna vei au me'u lako cake vaka ki na vualiku ka kaya vei Isireli, “O iko Isireli sa sega ni yalodina, mo lesu mai vei au. Sa Kalou yalololoma oi au, ka'u na sega ni cudru; Au na sega ni cudruvi iko me tawamudu. 13Vakadinadinataka ga ni o sa cala. Ni o sa talaidredre vua na nomu Kalou. Tusanaka nomu cala ena ruku ni veivunikau drokadroka ni o sa la'ki qaravi ira kina na kalou tani, ka ni o sa sega ni muria na noqu vosa. Oi au, o Jiova, sa vosa vakaoqo.
14Oi kemuni na tamata sa sega ni yalodina, mo ni lesu mai vei au; ni o ni sa noqu tamata. Au na kauta e yadua vei kemudou mai na dua na koro, ka yarua mai na dua na mataqali, ka'u na kauti kemuni lesu tale ki na ulunivanua o Saioni. 15Au na solia vei kemuni eso na i liuliu era talairawarawa vei au ka ra na liutaki kemuni ena vuku kei na yalomatua. 16Ia ni o ni sa yaco mo ni lewe vuqa ena vanua oqo, era sa sega tale ni veivosakitaka na tamata na Kato ni Veiyalayalati ni Turaga. Era na sega tale ni vakasamataka se nanuma; era na sega talega ni vinakata, era na sega ni vinakata e dua tale. 17Ia ni sa yaco mai na gauna ena vakatokai kina o Jerusalemi na i tikotiko vakaturaga ni Kalou ka ra na soqoni na veimatanitu kece sara e kea ena yacaqu. Era sa na sega tale ni muria na yalodra ca ka kaukauwa. 18Ena gauna o ya sa na duavata tale o Isireli kei Juta ka rau sa na lako mai na vanua mai na tokalau ki na vanua au a solia vei ira na nodra qase nodra i votavota tawa mudu.”
Nodra Qaravi Kalou Tani na Tamata i Jiova
19A sa kaya o Jiova,
“I Isireli, au a nanuma me'u okati iko
Me vakataki ira na luvequ,
Ka solia vei iko e dua na vanua talei,
Na vanua rairai vinaka duadua ena vuravura taucoko.
Au a nanuma ni o na kacivi au me'u tamamu,
O na sega ni gole tani tale mai vei au.
20Ia me vaka na nona sega ni yalodina
E dua na yalewa vakawati,
O sa sega ni yalodina vakakina vei au.”
Sa kaya ga o Jiova.
21E dua na domo sa rogo ena veidelana;
Na domo ni nodra tagi
Kei na vakamamasu na Isireli,
Baleta ni ra sa kitaka na i valavala ca,
Ka guilecavi Jiova na nodra Kalou.
22Lesu mai,
Oi kemuni kece sa gole tani mai vei Jiova.
Ena vakabulai kemuni,
Ka vakavuna mo ni yalodina.
O Ni sa kaya, “Io, keimami sa lako mai vei Jiova baleta ni sai koya o Jiova na neimami Kalou. 23Sa sega ni dua e veivuke vei keimami mai na veidelana se mai na veivavakoso domo levu mai na veiulunivanua. Na veivuke me baleti Isireli sa taka duadua ga mai vei Jiova na neimami Kalou. 24Ia na qaravi Peali sa vakavuna me keimami vakayalia na veika kece sara era a cakacakataka na neimami qase mai na gauna keimami a gone kina; na qele ni sipi, na qele ni bulumakau, kei ira na luve i keimami tagane kei na yalewa. 25Sa dodonu me keimami davo ena madua ka me ubi keimami na neimami lecaika, keimami sai valavala ca kei ira na neimami qase, me tekivu sara mai na gauna keimami a sa gone kina ka yacova sara mai na gauna oqo, keimami sa talaidredre tikoga vei Jiova na neimami Kalou.”
Currently Selected:
Jeremaia 3: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.