Jeremaia 2
2
Sa Kauwaitaki Isireli na Kalou
1A sa kaya tale vei au o Jiova
2Me'u tukuna vei ira yadua mai Jerusalemi
Na nona vosa oqo:
“Au sa nanuma tiko na nomu yalodina
Ni o a se gone,
Ena nomu daulomani au
Ni daru a se qai vakawati;
O a muri au ena loma ni vanua dravuisiga,
Ki na dua na vanua e se sega ni bau teivaki.
3I Isireli, o sa vakatabui mo noqu taudua ga,
O sai sevu uasivi duadua ni noqu vuata.
Au na vakararawataki ira era vakararawataki iko,
Ka'u na vakavuna na nodra leqa,”
Sa kaya ga o Jiova.
A Nodra Cala na Tubudra na Isireli
4Ni vakarorogo mada ki na vosa i Jiova
Na kawa i Jekope,
Na veivuvale kece sara e Isireli.
5Sa kaya o Jiova:
“A cava era raica na nomuni qase ni'u cala kina,
Ka vakavuna me ra biuti au?
Era qarava na veimatakau tawa yaga
Me vaka na tamata yalo wai
Ka ra sa mani yaco kina me ra ucui ira.
6Era sa sega ni bau kauwaitaki au,
Era sega ni bau vakataroga,
Sa e vei o Jiova ka a kauti keimami tani
Ka liutaki ira mai ena loma ni vanua dravuisiga,
Ena vanua veidelana ka sukusukura,
Ena vanua dravuisiga, vakadomobula,
Na vanua e sega ni bau dau lakovi,
Ka sega ni bau dua e tiko kina.
7Au a kauti ira ki na dua na vanua bulabula
Me ra matalau ena kania na kena vuata
Kei na kena veika vinaka e vuqa.
La ni ra sa lako mai
Era sa vakacacana na noqu vanua;
Ka vakadukadukalitaka na vanua au solia vei ira.
8Era sega sara mada ga ni bau taroga na bete,
“E vei o Jiova?”
Ka ra sa sega ni kilai au na nodra turaganilewa.
Era sa vorati au na nodra i liuliu;
Na parofita era parofisai ena yaca i Peali;
Ka ra qarava na veikalou tani.
Na Veibeitaki i Jiova vei Isireli
9Ia oqo oi au o Jiova
Au sa beitaki ira tale na noqu tamata;
Au sa beitaki ira talega na luvedra na luvemudou.
10Lako vaka ki na ra
Ki na veiyanuyanu o Saipurusi ka raica;
Talatala mada ki na tokalau ka vakaraica vakavinaka:
E sa bau yaco kina e dua na ka vakaoqo e liu?
11E bau dua li na matanitu sa veisautaka na nona kalou,
Ka dina ga ni ra kalou lasu era sa qarava?
Ia era sa vakaisosomitaki au na noqu tamata,
Mai na Kalou ka sa vakarogoi ira,
Ki na veikalou sa sega ni vukei ira rawa.
12Mo kidroa o iko na lomalagi,
Ka ririkotaka na veika oqo;
Sa kaya ga o Jiova.
13Era sa vakayacora e rua na ka ca
O ira na noqu tamata sa biuti au:
Era sa vuki tani mai vei au,
Na i vurevure ni wai bula,
Ka ra sa kelia eso na taqeniwai,
Na taqaniwai cicila sa sega ni tawa rawa.
Na i Sau ni Tawa Yalodina i Isireli
14E bobula li o Isireli?
Sa sucu beka ga mai me veiqaravi?
Ia ena vuku ni cava ga
Era sa vakasasataki koya kina na kena meca?
15Era sa tagi vaka na laione ki vua;
Era sa cakava na nona vanua me dravuisiga.
Sa vakacacani sara vakaca nona veikoro,
Ka sa lala tu.
16Io, o ira na kai Mefisi kei Tapanesi
Era sa voroka na nona qavokavoka.
17Sa baleti iko ga na ka oqo, Isireli!
Ni o sa biuti Jiova na nomu Kalou,
Ena noqu a tuberi iko voli ena sala.
18A cava o a vakasaqara lako i Ijipita?
Mo la'ki gunuva na wai mai na uciwai na Naile?
A cava o a vakasaqara ena nomu lako ki Asiria?
Mo la'ki gunuva na wai mai na Uferetisi?
19Na nomu i valavala ca ga ena sauti iko;
Kei na nomu gole tani vei au ena vakarusai iko.
O na kila vakataki iko na kena gaga kei na kena ca
Na nomu vakanadakui Jiova na nomu Kalou,
Ka sega ni rerevaki koya.”
Sa kaya ga o Jiova na Kalou ni lewevuqa.
Sa Bese ni Qaravi Jiova o Isireli
20“Isireli, o a sa besetaka makawa sara na noqu lewa;
O cata na muri au, ni o sa kaya,
Au na bese ni qarava!
Ia ena veidelana cecere
Kei na ruku ni veivunikau drokadroka,
O a sega ni yalodina vei au
Me vaka na yalewa dautagane.
21Au a tei iko me vaka na vaini digitaki,
Ka mo vaka talega na sorenikau vinaka sara.
Ia raica mada na kemu i rairai!
O sa vaka na vaini ni veikau
Au sa sega tale ni taleitaka.
22Kevaka o na savai iko ena lase,
Ka sisili vakalevu ena sovu,
Au na raica tikoga na dukadukali ni nomu i valavala ca.
Sa kaya ga o Jiova
23O kaya rawa vakacava
Ni o sega ni vakadukadukalitaki iko,
Ni o a sa sega ni bau qaravi Peali?
Raica mada na i valavala ca o a cakava ena qakilo,
Ena kemu i rairai
Sa vaka e dua na kameli yalewa sa sega ni vakacegui rawa
Ena nona garova na tagane,
Sa veiciciyaki ki na veiyasana kece ni sa tasere,
Me vakaceguya na gagadre ni lomana.
24O sa vaka e dua na asa kila
Ni vanua dravuisiga e sinai ena gagano.
La ni sa yacovi koya na gagano,
O cei ena tarova rawa?
E sega na tagane e vinakati koya me na suka wale;
O sa dau kune ga ena gauna ni veidauci.
25Me vakaivava na yavamu Isireli,
Mo kakua talega ni karamaca mai.
Ia o sa qai kaya, sega, a cava na kena yaga?
Au sa vinakati ira na kalou ni kai tani,
Ka'u sa na muri ira ga!”
Rauta Vinaka me Totogi o Isireli
26Me vaka na nona vakamaduataki e dua na daubutako ni sa vesu, ena vakakina na nomuni vakamaduataki na Isireli; oi kemuni kece, na nomuni tui, na luvedra na tui, na nomuni bete kei ira na parofita. 27O cei e kaya ki na dua na vunikau, o iko na tamaqu, ki na dua na vatu, o iko na tinaqu? E yaco na ka oqo baleta ni o ni sa vakanadakui au ka sega ni vakanamata mai. Ia ena gauna ga ni nomuni leqa, o ni sa qai kerei au me'u vakabulai kemuni.
28Era sa lako kivei na kalou o ni cakava me nomuni? Ni o ni sa leqa, laiva me ra vakabulai kemuni kevaka era rawata. Juta sa rui levu na nomu kalou, me vakataka na levu ni nomu veikoro.
29A sa kaya o Jiova, “A cava o ni sa beitaki au kina? O ni a biuti au kece sara. 30Au a totogitaki ira na luvemuni, ia sa sega ni yaga, era sa sega ni vulica rawa e dua na ka. O ni sa vakamatei ira na nomuni parofita ena i seleiwau me vaka na laioni cudrucudru. 31Ni rogoca vinaka kece sara na Isireli na vosa ni Turaga. Au a vaka li na vanua dravuisiga vei iko, se vaka e dua na vanua rerevaki? A cava o ni kaya kina na noqu tamata keimami sa lewai keimami ga, keimami na cakava ga na ka keimami vinakata, ni keimami sa galala ka keimami sa na sega ni lesu tale yani vei iko? 32Ena guilecava li e dua na gone yalewa na nona i ukuuku, se na yalewa vakarau vakamau na nona i sulu ni vakamau? Ia o ira na noqu tamata era sa guilecavi au, ena vuqa na siga ka sa sega ni wiliki rawa. 33O sa rui matai dina ena vakasaqarai ira mai o sa domona, ka sa tuberi ira talega na yalewa i vakarau vakasisila ena nomu sala. 34Sa dukadukali tu na nomu i sulu ena nodra dra na dravudravua kei na yalododonu, na nodra dra era sega ni bau mai butako ena nomu vale.
Ia, e veitalia ga na veika kece sara oqo, o sa kaya tikoga, 35‘Au na sega ni cala, ena sega ni cudruvi au o Jiova!’ Ia, sa kaya o Jiova, ‘Au na vakaitotogitaki iko, baleta ni o sa kaya, Sa sega na nomu cala.’ 36A cava sa rui rawarawa kina na nomu veisautaka na lomamu? Era vakamaduataki iko o Ijipita, me vaka e a cakava o Asiria. 37O na gole tani talega mai Ijipita ka vakacuva na ulumu ena madua. Ni sai au o au sa cati ira o sa vakadinata. O na sega sara ni rawata e dua na ka mai vei ira.”
Currently Selected:
Jeremaia 2: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.