1 Korinica 3
3
O Ira na i Talai ni Kalou
1Kemuni na veiwekani, au na sega ni rawa ni vosa vei kemuni me vaka au vosa tiko vei ira na tamata sa tiko vei ira na Yalo Tabu; au sa vosa ga vei kemuni me vaka ni o ni se tamata vakavuravura tikoga, me vaka na gone lalai ena vakabauta Vakarisito. 2Au sa vagunuvi kemuni ena sucu, ka sega ni vakani kemuni ena kakana dina, baleta ni o ni sega ni rawata. Ia oqo, o ni se sega tikoga ni rawata#Ipe 5.12,13 3baleta ni o ni se bula tikoga me vakataki ira na tamata vakavuravura. Me vaka ni kune tiko ena kemuni maliwa na veivuvutaki kei na veileti, e sega li ni dusimaka o ya ni o ni se tamata vakavuravura tikoga, ka bula voli ena kena i tovo? 4Ni sa kaya tiko e dua vei kemuni, “Oi au sa muri Paula,” ka dua tale, “Oi au sa muri Apolosa,” e sega li ni o ni se vakarautaka tikoga na i vakarau vakavuravura?#1Kori 1.12
5O cei sara mada o Apolosa? Se o cei o Paula? Keirau sa nona dauveiqaravi walega na Kalou, ka keirau a vakayagataki mo ni vakabauta kina, me vaka sa lesi keirau kina na Turaga. 6Au sa tea oi au na i tei, a sa vakasuasuataka o Apolosa, ia na Kalou ga sa qai vakatubura. #Caka 18.4-11; Caka 18.24-28 7Sa ka walega kina o koya sa tea kei koya sa vakasuasuataka, ia sa ka bibi duadua ga na Kalou, o koya sa vakatubura. 8Sa tautauvata ga na nodrau i naki o koya sa tea kei koya sa vakasuasuataka, ka rau na dui taura na kedrau i sau me vaka na nodrau dui cakacaka. 9Ni da sa dau cakacaka vata kei na Kalou, ka o ni sa nona i teitei na Kalou.
O ni sa vale ni Kalou vakakina. 10Ena noqu vakayagataka na i solisoli sa solia vei au na Kalou, au sa vakayacora kina na nona cakacaka e dua na daunitaravale maqosa ni ka'u sa virikotora kina na yavu ni vale, ka sa dua tale na tamata sa qai tara cake na vale. Ia na tamata yadua e dodonu me qarauna vinaka na i valavala ni nona tara vale. 11Ni sai Jisu Karisito ga na yavu e duabulu sa virikotora oti tu na Kalou, ka sa sega tale ni dua na yavu e rawa ni virikotori. 12Eso era na tara cake na yavu ena koula, se na siliva, se na vatu talei; eso tale era na vakayagataka na kau, se na co malai, se na vu ni witi. 13Ena qai vakaraitaki ga mai na cakacaka ni tamata yadua ni sa vakatakilai ena Siga i Karisito. Ena vakatakila na bukawaqa ena siga o ya na cakacaka ni tamata yadua; ena vakatovolea na bukawaqa ka vakatakila na kena dina. 14Kevaka sa curuma rawa na bukawaqa na ka sa tara e dua na tamata ena yavu o ya, ena qai soli vua na kena i sau. 15Ia kevaka sa kama yavu na nona cakacaka, sa qai vakayalia sara kina o koya; ena vakabulai ga o koya, ia ena vaka ga ni sa dro bula mai na kama. 16O ni sega beka ni kila ni o ni sa vale tabu ni Kalou ka sa bula tiko e lomamuni na Yalo ni Kalou?#1Kori 6.19; 2Kori 6.16 17Kevaka e dua na tamata sa vakarusa na vale tabu ni Kalou, ena vakarusai koya na Kalou. Ni sa savasava na vale ni Kalou, ka sai kemuni sara ga na vale o ya.
18Me kakua ni dua me vakaisini koya vakai koya. Kevaka e dua vei kemuni sa nanuma ni sa vuku ena vuravura oqo, e dodonu me lialia taumada, me rawa kina vua me qai vuku dina. 19Ni sa ka lialia vua na Kalou na vuku ni vuravura oqo. Ni sa volai ena i Vola Tabu, “Sa vesuki ira na vuku o koya ena nodra i lawaki.”#Jope 5.13 20Sa volai talega vakaoqo ena i Vola Tabu, “Sa kila na Kalou ni sa tawayaga walega na nodra vakasama na vuku.”#Same 94.11 21Me kakua kina ni dua me sakitaka na veika sa rawata na tamata. Ni sa nomuni na ka kecega, 22o Paula, kei Apolosa, kei Pita; na vuravura oqo, na bula kei na mate, na gauna oqo kei na gauna sa bera mai — a veika kece oqo sa nomuni, 23ka o ni sa nei Karisito, ka sa nona na Kalou na Karisito.
Currently Selected:
1 Korinica 3: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.