1 Korinica 2
2
Na i Tukutuku kei Karisito ena Kauveilatai
1Ena gauna ka'u a lako yani kina vei kemuni na veiwekani me'u vunautaka na i tukutuku vuni ni Kalou, au a sega ni vakayagataka na vosa lelevu ka dredre me kilai, se na vosa vakavuku. 2Ena noqu tiko vata kei kemuni, au a vakadeitaka sara ki lomaqu me'u guilecava na ka kecega ka vakavo duadua ga o Jisu Karisito, ka vakabibi na nona mate ena kauveilatai. 3Ni'u sa yaco mai kina vei kemuni, sa tarai au tiko na malumalumu kei na rere levu,#Caka 18.9 4ka sa sega ni vakadewataki na noqu i tukutuku kei na veika au vakatavulica ena vosa matau sa yavutaki mai na vuku vakatamata, ia sa tau ga ena vosa sa vakadinadinataki votu kina na kaukauwa ni Yalo ni Kalou. 5Ni sa sega ni yavutaki na nomuni vakabauta ena vuku vakatamata, ia ena kaukauwa ga ni Kalou.
Na Vuku ni Kalou
6Au sa dau vunautaka talega na vosa ni vuku vei ira sa matua vakayalo, ia sa sega ni vuku ni vuravura oqo se nodra vuku na daunilewa ni vuravura oqo, o ira era sa lesi oti tu me ra vakarusai. 7Ia keitou sa tukuna ga na vuku ni Kalou, e dua na ka lo ka vunitaki tu, na vuku ka sa digitaka oti tu na Kalou me da vakalougatataki kina ni se bera ni buli na vuravura. 8Sa sega ni dua vei ira na i liuliu ni vuravura oqo sa kila rawa na vuku oqo. Kevaka me ra kila taumada, ke ra a sega ni vakota ki na kauveilatai na Turaga vakaiukuuku.#Br 3.14-17 9Ia me vaka ga sa volai ena i Vola Tabu:
“Sa sega ni dua e bau rogoca se raica,
Na veika sa sega ni nanuma rawa e dua me na yaco,
Sa i koya na veika sa vakarautaka na Kalou me nodra era sa lomani koya.”#Aisea 64.4; Sr 1.9,10
10Sa vakatakila na Kalou na veika vuni oqo vei keda ena Yalo Tabu; ni sa dikeva na veika kecega na Yalo Tabu, ka vakakina na veika vuni ka titobu ni Kalou. 11Na yalo ni tamata sa kila na veika me baleta na tamata. Sa vaka talega kina na Kalou, ni sa kila duadua ga na veika kecega me baleta na Kalou na Yalo Tabu ni Kalou. 12Eda sa sega ni ciqoma me noda na yalo ni vuravura oqo, ia eda sa ciqoma ga na Yalo sa mai vua na Kalou, me da kila rawa kina na veika kece sa solia mai vei keda na Kalou.
13Keitou sa sega kina ni tukuna na veika oqo ena vosa sa vakatavulici mai na vuku vakatamata, ia ena veivosa ga sa vakatavuvulitaka na Yalo Tabu, ka sa vakamacalataki kina na veika vakayalo vei ira sa tiko vei ira na Yalo Tabu. 14O koya ka sega ni tiko vua na Yalo Tabu sa sega ni rawa ni ciqoma na veisolisoli sa mai vua na Yalo ni Kalou. Sa ka lialia vua na veika vakayalo oqo, ka sa sega ni kila rawa, baleta ni sa kilai vakayalo ga na veisolisoli vakayalo. 15Ia na tamata sa tiko vua na Yalo Tabu sa dikeva ka vakalewa na yaga ni veika kecega, ia sa sega ni dua e rawa ni dikeva ka vakalewa na lomana. 16Me vaka sa kaya na i Vola Tabu,
“O cei sa kila na loma ni Turaga?
O cei sa rawa ni vakavulici koya?”
Ia sa tikoga vei keda na loma i Karisito.#Aisea 40.13 (LXX)
Currently Selected:
1 Korinica 2: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.