Romanos 8

Santu Espïritupa munaynincho kawanansipaq nishqan

1Saymi Jesucristucho kaqkunaqa condenashsu kayanqa. [Jusalikur kawayänanpa trukanqa Espíritu Santu tantiyasishqannömi kawaykäyan.] 2Jusalikuypa munaynincho kashqansipitami Espíritu Santu jorqamashkansi. Jusalikuypa munaynincho wanushno karpis Jesucristo salvamashqami ali kawaytana tarinsi.

3Jusalikuypa munaynincho kaptinsimi Tayta Diospa leyninkuna salvamarqansisu. Sayno kaptinmi Surin Jesucristuta Tayta Dios kachamurqan noqansino runa kananpaq. Paymi sacrificiupaq apayashqan uywano noqansi rayku wanurqan. Saynöpami Tayta Dios salvamashkansi jusalikuypa munaynincho kashqansipita. 4Salvamashpansimi leyninkunata cumpliqtanöna Tayta Dios chaskimansi. Saymi jusalikur kawanansipa trukanqa Espíritu Santu tantiyasimashqansinöna kawaykansi.

5Jusalikuypa munaynincho kawaqkunaqa shonqun yarpashqanta rurakuyänanpaqmi yarpachakuyan. Espíritu Santupa munaynincho kawaqkunami isanqa Espíritu Santu tantiyasishqanno kawayänanpaq yarpachakuyan.

6Jusalikuypa munaynincho kawaqkunaqa manami Tayta Diospa nawpanman imaypis chäyanqasu. Santu Espïritupa munaynincho kawaqkunami isanqa Tayta Diospa nawpancho imayyaqpis kushish kawayanqa.

7Jusalikuypa munaynincho kawaqkunaqa Tayta Diospa contran karmi leyninkuna nishqanno kawayta munayansu ni kamäpakuyanpissu. 8Yapaymi nï: Say runakunaqa manami Tayta Dios munashqanno kawayta kamäpakuyansu.

9Noqansiqa manami jusalikuypa munayninchönasu kawaykansi. Tayta Diospa Espïritun noqansicho kaptinmi paypa munayninchöna kawaykansi. Jesucristupa Espïritun#8.9 Tayta Diospa Espïritunpaq y Jesucristupa Espïritunpaq parlarqa Espíritu Santupaqmi parlaykan. noqansicho mana kaptinqa manami Jesucristupasu kansi.

10Jesucristo noqansicho kaptinmi perdonashna kaykansi. Saymi jusalikushqansipita wanunansipaq kaptinpis Espíritu Santu kawayta qomansi. 11Tayta Diospa Espïritun noqansicho kaptinmi#1Cor. 3.16. wanushqanpita Jesucristuta kawarisimushqanno noqansitapis Tayta Dios kawarisimäshun. Sayno kawarisimäshun noqansicho kaykaq Espíritu Santupa munayninwanmi.

12Wawqi panikuna, sayno kaykaptinqa jusalikuypaq shonqunsi rapipa rapiptinpis ama jusalikushunsu. 13Jusalikuylacho kawashqaqa infiernumanmi Tayta Dios qaykamäshun. Espíritu Santu tantiyasimashqansino jusalikuypaq wanushno karmi isanqa mana ushakaq kawayta tarishun.

14Tayta Diospa Espïritun tantiyasishqanno kawaqkunaqa lapanpis Tayta Diospa wamrankunami kaykäyan. 15Wamran kanansipaqmi Espíritu Santu shuntakamashkansi. Espíritu Santuta chaskikushna karmi patronninta ashmay mansa mansala manakushqannösu Tayta Diosta manakunsi, saypa trukanqa mana mansariypana manakur <<¡Abba, Papä!>> ninsi.#Mar. 14.36; Gál. 4.6.

16Kikin Espíritu Santumi Diospa wamran kashqansita tantiyaykäsimansi. 17Tayta Diospa wamran karmi pay promitishqan herenciata Jesucristo chaskishqanno noqansipis chaskishun. Imano nakarpis Jesucristuman yärakurqa paywanmi gloriacho kawashun.

Lapanpis mushuqman tikrananpaq nishqan

18Kay pasacho nakashqansikunaqa päsaqlami kaykan. Gloriacho kushikunansipaq kashqanmi isanqa imayyaqpis mana ushakaq kanqa. Saytaqa lapan shonqüwanmi criyï. 19Sayno kaptinmi Tayta Dios wamrankunata nawpanman shuntakunanta lapan kamashqankuna shuyaraykäyan.

20Shuyaräyashqanyaqqa pay kamashqankuna maldicionädumi kaykäyan. Manami kikinpitasu maldicionash kaykäyan, sinöqa Tayta Dios maldicionashqanpitami.#Gén. 3.17; Rom. 5.12. Kanan maldicionädu kaptinpis 21wamrankunata mushuqman Tayta Dios tikrasishqannölami lapan kamashqankunatapis mana ushakänanpaq mushuqman tikrasinqa.

22Sayyaqmi Tayta Dios lapan kamashqankunapis warmi wachayta nakar lakikushqanno lakikuykäyan. 23Manami kamashqankunalasu sayno lakikuykäyan, saypa trukanqa Tayta Dios jukla shuntakamänansita munar noqansipis lakikuykansimi. Espíritu Santuta primiciatano chaskikush karmi#8.23 Primiciaqa punta poqumuqkunami kaykan. Punta poqumuqta rikar cosëcha kananpaq kashqanta musyashqansinömi Espíritu Santuta chaskikur musyansi gloriaman chänansipaq kashqanta. shuyakuykansi cuerpunsitapis mushuqmanna tikrasinanpaq.#2Cor. 5.2-4.

24Mushuqman tikrasimänansipaqmi Tayta Dios salvamashkansi. Isanqa say höra manami chämunraqsu. Mushuqman tikrasishna kaykarqa ¿imatanataq shuyarashwan? 25Mushuqman manaraq tikrarmi imano nakarpis shuyaraykänansi.

26Tayta Diosta manakurpis manami shumaqlaqa kamäpakunsisu pay munashqanno manakuyta. Sayno kashqami Espíritu Santu Tayta Diosta waqapaypa favorninsi ruwakun. 27Ruwakurmi Tayta Dios munashqannöla imaypis manakun. Espíritu Santu noqansipaq manakushqankunata Tayta Dios musyaykanmi. Payqa shonqunsi imata yarpashqankunatapis musyaykanmi.

Tayta Dios kuyamashqansita pipis mana michänanpaq nishqan

28Musyansimi ima päsaptinpis Tayta Diosta kuyaqkunapaqqa lapanpis ali kananpaq kashqanta. Paykunataqa Tayta Dios qayarqan kikin munashqanno kananpaqmi. 29Unaypita pasa reqirmi destinarqan Surin Jesucristuno kayänanpaq. Saynöpami Jesucristo kaykan lapan yärakuqkunapa mayor wawqin. 30Destinashqan kaqkunatami Tayta Dios qayarqan. Qayashqan kaqkunatami perdonarqan. Perdonashqan kaqkunatanami gloriaman pushanqa.

31Sayno kaykaptinqa ¿imatanataq munashun? Tayta Dios favorninsi kaykaptinqa ¿pinataq contransi sharkunqa? 32Noqansi rayku wanunanpaq kuyay Surintapis kachaykämurqa ¿manasuraq lapan promitimashqansitapis paywan Tayta Dios cumplinqa?

33Kikin Tayta Dios akraykämash y jusansikunatapis perdonaykämash ¿piraq nawpancho acusamäshun? 34Jesucristo wanushqanpita kawarirkamur Tayta Diospa aluq kaq nawpancho jamashpan favorninsi parlaykaptinqa ¿piraq castigash kanansipaq ninqa?

35Jesucristupa kuyakuyninpita ¿piraq rakimäshun? Payqa kuyamansimi nakashqapis, lakikushqapis, runakuna chikimashqapis, mikanashqapis, mödanaynaq kashqapis, peligrucho kashqapis y runakuna wanusimashqapis.

36Tayta Diospa palabranchöpis kaynömi qelqaraykan:

<<Munashqaykino kawayaptïmi chikiyämashpan imaypis wanusiyäman.

Pishtayänanpaq kaq uyshanömi kaykäyä>>.#Sal. 44.22.

37Saykuna päsamashqapis Tayta Dios kuyamashqami kushishla imaypis yärakuykansi.

38Tayta Dios kuyamansimi kawashqapis, wanushqapis, ima päsamashqapis y ima päsamänansipaq kaptinpis. Saymi angilkunapis, ni supaykunapis, ni ima munayyuq kaqkunapis, 39ni jana pasacho kaqkunapis, ni pasa rurincho kaqkunapis, Tayta Dios ima kamashqankunapis paypa kuyakuyninpita rakimäshunsu. Sayno kuyamashqansita tantiyasimashkansi noqansi rayku wanunanpaq Señorninsi Jesucristuta kachamurmi.

Currently Selected:

Romanos 8: qvhB

Highlight

Copy

Compare