Abdías 1
1
Edomita runakunata Tayta Dios castigananpaq nishqan
1Kaychömi qelqaraykan Edom nación runakunapaq profëta Abdíasta Tayta Dios revelashqan.
Tayta Diosmi nacionkunaman juk kachata kachash.
Say kachami wilakur nikan:
<<¡Aku aywashun edomita runakunata atacanansipaq!>>#Isa. 34.5-17; 63.1-6; Jer. 49.7-22; Eze. 25.12-14; 35.1-15; Amós 1.11-12; Mal. 1.2-5.
2Edomita runakunatami Tayta Dios nin:
<<Wakin nacionkunapitapis mas walkala kayänaykipaqmi castigayäshayki.
Saynöpami pasaypa penqayman churayäshayki.
3Qamkunaqa qaqakunata uchkuykur wayikikunata rurash karmi ali chölu tukuykäyanki.
Altunnin qaqakunacho tarmi pipis mana vinciyäshunaykipaq kashqanta yarpaykäyanki.
Sayman atiënikurqa kikilaykikunami engañakuykäyanki.
4Ankano may altupa pajayaptikipis#1.4 Wakin runakunaqa vuelayaptikipis niyanmi. y qoyllarkuna kaykäyashqancho punukunaykikunata rurayaptikipis saypitami jitarpayämushayki>>.
Tayta Diosmi sayno nin.
5<<Sakaypa suwa yaykurpis ¿manaku tarishqan kaqlata apakun?
Üva palaqkuna ¿manaku juk ishkay sarta üvakunata yürancho kachaykuyanraq?
Noqami isanqa chipyaq ushakäsiyäshayki.
6Edomita runakuna, imaykaykikunatapis lapantami qechuyäshunkipaq.
Pakaraykäsiyaptikipis ashi ashirkurmi ali alinnin kaqkunataqa apakuyanqa.
7Lapan yanapäshuqnikikunapis contrayki tikrarmi lulapäyäshunkipaq.
Vincirkuyäshushpaykimi nacionnikipitapis qarquyäshunkipaq.
Amïguykikunapis contraykimi rikakuyanqa.
Paykunaman yärakuykäyaptikipis lulapaylapami desgraciaman jitarpuyäshunkipaq.
Edomita runakuna, ¡maytaq musyaq yachaq kayashqayki!>>
8 Tayta Diosmi edomita runakunata mastapis nin:
<<Qamkunata castiganä junaq lapan musyaq runakunatami ushakäsishaq.
Täyashqayki jirkakunacho manami juklaylapis yachaq runa quëdanqasu.
9Mansariyashpanmi Temáncho taq geniu runakunapis suksukyäyanqaraq.
Täyashqayki kaqchöqa chipyaqmi wanusish kayanqa.
Edomita runakunapa jusan ima kashqanpis
10<<Qamkunaqa aylluykikuna kaykaptinmi Israel runakunata nakasiyashkanki y wanusiyashkanki.
Sayno rurayashqaykipitami kikikikunapis penqakuypaq pasaypa ushakäyankipaq.#Joel 3.19.
11Karupita shamuq contran soldädukuna imaykakunatapis markapita apakuyaptin y Jerusalénpa punkunkunata pakir ushayaptinmi qamkunaqa say soldädukunata yanapäyarqayki.
Qechuyashqankunata rakipänakuyänanpaq suertita jitayaptin say runakunanömi qamkunapis imaykankunata apakuyarqayki.
12¡Imanirtaq kushipäyarqayki aylluykikunata desgracia päsaptin!
¡Imanirtaq kushipäyarqayki Judá nación raqälana rikakuptin!
¿Imanirtaq asipäyarqayki kuyapaypaq kaykaqta rikashpayki?#Sal. 137.7; Lam. 4.21.
13¡Imanirtaq desgracia päsaykaptin akrashqä markaman yaykuyarqayki!
¿Imanirtaq makilan soqpash waqaykäyaqta rikaykar kushipäyarqayki?
¡Imanirtaq contrankuna vinciyaptin imankunatapis apakuyänaykipaq yaykuyarqayki!
14¡Imanirtaq qeshpikuykaqkunata wanusiyänaykipaq tinkuq nänikunachöpis shuyaräyarqayki!
¡Imanirtaq ayqikuykaqkunata sari sariykur contrankunapa makinman entregayarqayki!
Tayta Dios juzganan junaq kashqan
15<<Lapan nación runakunata juzganäpaq kaq junaq walkalanami pishiykan.
Say junaqmi runakunata nakasiyashqaykinöla qamkunatapis nakasiyäshayki.
16 Sagrädu lömächo kuyashqä runakunata nakasiyashqaykinömi qamkunatapis y lapan nación runakunatapis nakasiyäshaykipaq.
Castigaptïmi chipyaq elaqäyanqa.
17Kawaykar quëdaq runakunami isanqa Sión lömaman amparakuyanqa.
Say löma sagrädu kaptinmi Jacobpita miraq runakuna salvakuyashpan herencianta shuntayanqa.
18Say wisanmi Jacobpita y Josépita miraq runakuna ninano kayanqa.
Esaúpita miraq runakunanami#1.18 Esaúpita miraq runakunaqa edomita runakunami kaykäyan. sakish oqshano kayanqa.
Edomita runakunata chipyaq ushakäsiptinmi juklaylapis kawaykar quëdayanqasu.
Noqa Tayta Diosmi sayno nï>>.
Israel runakunata Tayta Dios yanapänanpaq nishqan
19Saypitanami Neguevcho taq Israel runakuna Edom partita acaparayanqa.
Sefelacho taq Israel runakunami filisteo runakuna täyashqan partita acaparayanqa.
Wakin Israel runakunanami Efraín partita y Samaria partita shuntayanqa.
Benjamín trïbu kaq Israel runakunami Galaad partita shuntayanqa.
20Juklä nacionpita saysika Israel runakuna kutimurmi cananeo runakuna unay täyashqan partita shuntayanqa Sarepta markayaq.
Jerusalénpita Sefarad markaman prësu apayashqan runakunami kutimur Neguevcho kaykaq markakunata shuntayanqa.
21Lapanta vinciskirnami Sión lömaman wisäyanqa Esaúpita miraq runakunata juzgayänanpaq.
Tayta Diospa makinchömi lapanpis kanqa.
Currently Selected:
Abdías 1: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
