Amós 9
9
Tayta Dios juzgaptin pipis mana qeshpinanpaq kashqanta nishqan
1Tayta Diostami revelacioncho rikarqä altarpa nawpancho ichiykur nimuqta:
<<Numbralkunapis suksukyashqanyaq templu tuknaraq columnakunata takay.
Saynöpami runakuna jananman templu juchumunqa.
Saypita qeshpiqkunata espädawan wanusiptï manami ni juklaylapis qeshpinqasu.
2Pasa rurinman pakakuyaptinpis jorqamushaqmi.
Jana pasaman wisäyaptinpis uräsimushaqmi.#Sal. 139.7-12; Jer. 23.23-24.
3Carmelo puntaman pakakuyaptinpis ashi ashiykurmi sarimushaq.
Lamar rurinman pakakuyaptinpis sikankaray culebrawanmi picasishaq.
4Juklä markaman contrankuna prësu apakuyaptinpis espädawanmi wanusishaq.
Israel runakunataqa maycho rikarpis yanapänäpa trukan castigashaqmi>>.
5Lapanta mandaq Tayta Dios kay pasata yataykuptinmi sulukäkunqa.
Saymi intëru Israel nacioncho taq runakuna waqayanqa.
Nilo mayu bötiypa bötir aywashqannömi pasapis janaman y uraman kuyur suksukyanqa.
6Tayta Diosqa jana pasachömi wayinta rurakush.
Pasa jananpa azulyaraykaqtapis paymi kamash.
Paymi lamarpita pukutaytapis sharkarkasir pasa jananman tamyasimun.
Jutinpis Yahwehmi kaykan.
7 Tayta Diosmi nin:
<<Israel runakuna, qamkunata kuyashqänölami Etiopía runakunatapis kuyä.
Qamkunata Egiptupita jorqamushqänölami filisteo runakunatapis Caftor islapita jorqamurqä.
Aram runakunatapis Kir partipitami jorqamurqä.
8<<Noqa rikaykämi Israel nacioncho taqkuna pasaypa jusalikuykäyashqanta.
Sayno kayashqanpitami say nacionta ushakäsishaq.
Ushakäsirpis Jacobpita miraqkunata wakintaqa manami ushakäsishaqsu>>.
Tayta Diosmi sayno nin.
9<<Trïguta zarandayashqannömi Israel runakunatapis lapan nación runakunatawan zarandashaq.
Rurupa kaqkuna yarquyaptinpis gransa kaqkuna mana yarquyashqanno manami juklaylapis mana cäsukamaqkuna castïgupita qeshpinqasu.
10Mana cäsukamaq kaqkunataqa lapantami espädawan wanusishaq.
<Manami imapis päsamäshunsu> niqkuna lapanmi ushakäyanqa>>.
Israel nación yapay kananpaq Tayta Dios nishqan
11<<Say wisanmi Davidpa wayin juchush kaptinpis yapay sharkasishaq.#9.11 Davidpa wayinpita parlarqa Davidpita miraq reykunapitami parlaykan. Davidpa wayin juchush kashqanta nirqa Davidpita miraqkuna manana reykuna kayashqantami nikan. Yapay sharkasishaq nishqanqa Davidpa ayllunpita rey kananpaq yapay churashaq ninanmi.
Unay kashqanno yapay kananpaqmi wakrankunata sapashaq y juchush kaqkunata alsashaq.
12Saynömi rurashaq kawaykar quëdaq edomita runakunapis Israel runakunapa munaynincho kayänanpaq.
Saynölami jutïta joqariq kaq wakin nacionkunapis munayninchömi kayanqa>>.
Tayta Diosmi sayno nin.
Paymi saykunata ruranqa.#Hech. 15.16-18.
13 Tayta Diosmi nin:
<<Shamuq watakunacho trïgu shuntaytapis manaraq ushayaptinmi muruy tiempuna kanqa.
Üva jaruytapis manaraq ushayaptinmi üva plantapakuy tiempuna chämunqa.
Jirkakunapa y lömakunapa mayunöraqmi vïnu aska aywanqa.
14Karu nacioncho kayashqanpitami kuyashqä Israel runakunata kutisimushaq.
Kutiykamurmi juchush markakunata alsarkur saycho täyanqa.
Yapay plantayashqan üvapitami vïnutapis upuyanqa.
Murupakuyashqan ali wayuptinmi mikuyninkunapis saysika kanqa.
15Kikinkunapa nacionninman kutisiptïmi imayyaqpis saycho täyanqa.
Saypita mananami pipis qarqunqanasu.
Noqa kuyashuqniki Tayta Diosmi sayno kananpaq nï>>.
Currently Selected:
Amós 9: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
