Números 21
21
Arad runakunata Israel runakuna vinciyashqan
1 Neguevcho kaykaq Arad markapa mandaqnin reymi cananeo runa karqan. Paymi Israel runakuna Atarim nänipa aywaykäyashqanta musyaykur soldädukunawan atacaq aywayarqan.#Núm. 33.40. Saycho pelyarmi juk ishkay Israel runakunata prësu sariyarqan. 2Saymi Israel runakuna Tayta Diosta manakur niyarqan: <<Arad runakunata vinciyänäpaq yanapäyämaptikiqa lapan caseriunkunatawanmi chipyaq ushakäsiyäshaq>>.
3Israel runakuna manakuyashqannöla Tayta Dios yanapaptinmi lapan cananeo runakunata y markankunatapis chipyaq ushakäsiyarqan. Sayno ushakäsiyashqanpitami say partita jutisiyarqan Horma#21.3 Horma ninanqa ushakäsish ninanmi. jutin kananpaq.
Broncipita culebrata Moisés rurashqan
4Hor jirkapita Israel runakuna aywakurmi Edom nacionman mana yaykuyänanpaq Puka Lamarpa aywaq nänipa#Deut. 2.1. tumayarqan. Saypa nakar aywaykäyaptinmi pacienciankuna ushakarqan. 5Saymi Tayta Diospa y Moiséspa contran niyarqan: <<Kay sunyaq jirkacho wanuyänäpaq ¿imanirtaq Egiptupita pushayämashkanki? Kaychöqa manami mikuypis ni yakupis kansu. Waran waran say mikuylata mikur pasaypanami ajayäyashkä>>.
6Sayno parlayaptinmi wanusikuq culebrakunata Tayta Dios yurisimurqan. Culebrakuna picayashqanwan askaq wanuyaptinmi#1Cor. 10.9. 7Moisés kaqman aywaykur niyarqan: <<Tayta Diospa contran y qampa contrayki parlar jusalikuyashqäpita Tayta Diosta manakuykulay culebrakunata elaqäsinanpaq>>.
Saymi Moisés manakuptin 8Tayta Dios nirqan: <<Juk culebrata broncipita ruraykur qeru puntanman bandëray. Mayqantapis culebra picaptinqa broncipita rurash culebrata jukla rikärisun mana wanunanpa>>.
9Sayno niptinmi broncipita culebrata Moisés ruraykur qeru puntanman bandërarqan. Culebra picaptinqa broncipita rurash culebrata pipis jukla rikärirqa wanuqnasu.#2Rey. 18.4; Juan 3.14.
Israel runakuna Moabman aywayashqan
10Saypita aywarnami Israel runakuna Obotcho posädakuyarqan. 11Obotpita päsarmi sunyaq Ije-abarimcho posädakuyarqan. Say parti kaykan Moabpita inti jeqamunanläpami. 12Saypita aywakurmi Zered raqra nawpancho posädakuyarqan. 13Saypita aywarmi Arnón mayu simpancho posädakuyarqan. Arnón mayuqa sunyaq jirkapa päsarmi amorreo runakunapa y moabita runakunapa lindërun kaykan. 14Israel Runakunata Guërracho Tayta Dios Yanapashqan jutiyuq librucho kaynömi qelqaraykan:
<<Sufá particho kaykaq Vaheb markapami päsayarqä.
Raqrakunapa aywarmi Arnón mayupa päsayarqä.
15Saypita juk raqrapa aywarmi Ar partiyaq chäyarqä.
Say raqra chaykan Moab nacionpa lindërunyaqmi>>.
16Arnón mayupita aywakurmi Beer pözuyaq chäyarqan. Say pözuchömi Moisésta Tayta Dios nirqan: <<Israel runakunata shuntay yakuta upuyänanpaq>>.
17Saycho yakuta tariykurmi Israel runakuna kayno cantayarqan:
<<¡Pukyucho yaku mana sakiypa kaykuläsun!
¡Yaku pashtamushqanpita cantaläshun!
18Mandaqkunami pözuta uchkuyarqan.
Respitädu runakunami tukrunkunawan uchkuyarqan>>.
Say sunyaq jirkapita aywarmi Israel runakuna Matana partiman chäyarqan. 19Matanapita aywarmi Nahalielman chäyarqan. Nahalielpita aywarmi Bamotman chäyarqan. 20Bamotpita aywarnami Moab nacioncho kaykaq sunyaq pampaman chäyarqan. Saypitami Pisga niyashqan punta rikakan.
Rey Sehónta Israel runakuna vinciyashqan
Deuteronomio 2.26-37
21Say pampaman manaraq charmi Israel runakuna propiuta kachayarqan amorreo runakunapa mandaqnin rey Sehónta niyänanpaq: 22<<Nacionnikipa päsakuyäläshaq, taytay. Manami mururaykaq chakraykikuna jananpa ni üva chakraykikunapapis päsayäshaqsu. Pözuykikunapita yakutapis manami upuyäshaqsu. Jatun nänilapami päsakuyäshaq>>.
23Sayno ruwakuyaptinpis rey Sehón manami munarqansu Israel runakuna nacionninpa päsayänanta. Saymi lapan soldädunkunata shuntarkur sunyaq jirkaman aywayarqan Israel runakunawan pelyayänanpaq. Jahazacho tinkurmi paykunata atacayarqan. 24Jina kaqta Israel runakuna tikraparmi markankunata y chakrankunatapis Arnón mayupita pasa Jaboc mayuyaq qechuyarqan. Amonita runakunapa lindërun ali sigurash kaptinmi Israel paykunapa lindërunyaqla qechuyarqan.
25Amorreo runakunapa markankunata qechuyashpanmi Hesbóncho y caseriunkunachöpis Israel runakuna täyarqan. 26Hesbónqa amorreo runakunapa mandaqnin rey Sehón tashqan markami karqan. Israel runakuna Hesbón markata manaraq qechuyaptinmi Sehónqa Moab nacionpa mandaqnin reywan guërrata rurayarqan. Payta vincirmi moabita runakunapa chakrankunata Arnón mayuyaq qechuyarqan. 27Saypitanami poesíata recitaqkunapis niyan:
<<¡Hesbón markaman lapayki shayämuy!
Rey Sehónpa jatun markanta yapay sharkasiyay.
28Sehónpa markan Hesbónpitami mansariypaq ninanöraq soldädukuna yarqayämurqan.
Paykunami Moabcho kaykaq Ar markayaq lapanta ushayarqan.
Arnón mayu nawpancho kaq jalqakunayaqmi sayno ushayarqan.
29¡Wawalaw, moabita runakuna!
Quemos jutiyuq diosta#21.29 Moabita runakunaqa yarpäyarqan juk diospis Quemos jutiyuq kashqanta. adoraqkuna, ushakashqami kayanki.
Amorreo runakunapa mandaqnin rey Sehón shamuptinmi Quemos diosniki kachariykuyäshushpayki yanapäyäshurqaykinasu.
Saymi olqu kaqkuna qeshpir aywakuyarqan.
Warmi kaqkunatapis prësu sarirmi apakuyarqan.#Jer. 48.45-46.
30Mandashqan markakunatami ushakäsiyarqä.
Saymi Hesbón markapita Dibón markayaq wanuyarqan.
Saynöpis Nofapita Medebayaq ushakäsiyarqä>>.
Rey Ogta Israel runakuna vinciyashqan
Deuteronomio 3.1-11
31Saynöpami Israel runakunaqa amorreo runakunapa markankunaman yaykuykur täyarqan. 32Saypitanami runakunata Moisés kacharqan Jazer markata rikapakayämunanpaq. Kutiykuyaptinnami Jazerman y nawpan markakunaman aywar amorreo runakunata qarquyashpan Israel runakuna saycho täyarqan. 33Saypitanami Israel runakuna päsayarqan Basán nacionman aywaq nänipana. Sayta musyaykurmi Basán nacionpa mandaqnin rey Og soldädunkunawan Edreiman aywayarqan Israel runakunawan pelyayänanpaq. 34Saymi Moisésta Tayta Dios nirqan: <<Say runakunata ama mansaysu. Noqami yanapäshayki lapan soldäduntinta vincir nacionnintapis munaynikiman churayänaykipaq. Hesbóncho taq amorreo runakunapa mandaqnin rey Sehónta ushayashqaykinömi paykunatapis ushayanki>>.
35 Tayta Dios nishqannölami rey Ogta, surinkunata y lapan soldädunkunatapis wanusir Israel runakuna ushayarqan. Manami pitapis kawaykaqta kachayarqansu. Nirkurnami lapan chakrankunata sarikurkuyarqan.
Currently Selected:
Números 21: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
