Números 20
20
Qaqapita yaku pashtamushqan
Éxodo 17.1-7
1Wata qalaykunan killacho Zin niyashqan sunyaq jirkaman chaykurmi Israel runakuna Cades particho täyarqan. Saychömi María wanuykuptin pampayarqan.
2Saycho yaku mana kaptinmi Israel runakuna Moiséspa y Aarónpa contran sharkur 3niyarqan: <<¡Kayno nakayänäpa trukanqa alimi kanman karqan wakin Israel runakunata Tayta Dios castigaptin wanuyashlancho noqakunapis wanukuyaptï! 4Tayta Dios kuyashqan kaykäyaptïqa ¿imapaqtaq kay sunyaq jirkaman pushayämashkanki? ¿Uywantintaku ushakäsiyämayta munaykäyanki? 5¿Imapaqtaq Egiptupita mana yachakaypaq jirkaman pushayämashkanki? Kaycho murupakuyänäpaqpis mana ali kaptinmi hïguspis, üvapis ni granädapis kansu. ¡Yakulapis upuyänäpaq manami kansu!>>
6Sayno niyaptinmi Moiséswan Aarón Tinkuna Toldu patiuman aywaykur fiyupa lakikuyashpan pasaman lätakuykuyarqan. Say höra chipipiyninta rikakäsimurmi 7Moisésta Tayta Dios nirqan: 8<<Tukruykita aptarkur wawqiki Aarónwan lapan runakunata shuntayay. Nirkur lapanpa rikanancho taqay qaqata parlapay yaku yarqamunanpaq. Saymi qaqapita yaku yarqamunqa paykunapis uywankunapis upuyänanpaq>>.
9Saymi Tayta Dios nishqannöla babul nawpancho kaykaq tukrunta Moisés aptakurqan. 10Nirkurnami wawqin Aarónwan qaqa nawpanman lapan runakunata shuntaykur nirqan: <<Mana wiyakuq runakuna, ¿manasuraq kay qaqapita yakuta jorqayämüman upuyänaykipaq?>>
11Sayno nirmi aptaraykashqan tukrunwan ishkay kuti qaqata wiruykuptin aska yaku yarqamurqan. Saytami runakunapis uywakunapis upuyarqan.
12Saypitanami Aarónta y Moisésta Tayta Dios nirqan: <<Noqaman mana yärakurmi santu kashqäta Israel runakunata tantiyasiyashkankisu. Sayno kayashqaykipitami kay runakunata promitishqä nacionman yaykasiyankisu>>.
13Saycho Tayta Diospa contran Israel runakuna parlayashqanpitami yaku pashtamushqan sitiupa jutin kaykan Meriba.#20.13 Meriba ninanqa contran parlashqan ninanmi. Saychömi Tayta Dios musyasirqan santu kashqanta.
Israel runakuna päsayänanta edomita runakuna mana kachapäyashqan
14Cades particho Israel runakuna taykäyaptinmi propiukunata Moisés kachakurqan Edom nacionpa mandaqnin reyta niyänanpaq: <<Aylluyki Israel runakunami kayä. Qam musyankimi fiyupa nakayashqäta. 15Unay ayllükuna Egiptuman aywakuyashqanpita pasami saycho täyämushkä. Paykunata nakasiyashqannölami Egipto runakuna noqakunatapis fiyupa nakasiyämash. 16Sayno nakar Tayta Diosta manakuyaptïmi angilninta kachamush Egiptupita jorqayämänanpaq. Saynöpami nacionnikipa lindërun cercan Cadeschöna kaykäyä. 17Taytay, nacionnikipa päsaq nänilapa päsakuykuyäläshaq. Chakraykikunata ni üvaykikuna plantaraqtapis manami jarukuyäshaqsu. Saynöpis pözuykicho yakuykitapis manami upuyäshaqsu. Maypapis mana yaqaykachaypami jatun nänilapami päsakuyäshaq>>.
18Sayno niyaptinmi Edom nacionpa mandaqnin rey nirqan: <<Nacionnïpa manami päsayankisu. Yaykayämuptikiqa soldädükunawanmi atacayäshayki>>.
19Niptinmi Israel runakuna yapay niyarqan: <<Jatun nänilapami päsakuyäshaq. Noqakunapis uywäkunapis yakuykita upurqa pägayäshaykimi. Nacionnikipa päsaq nänilaykipa päsakuyäläshaq>>.
20Sayno niyaptinpis Edom nacionpa mandaqnin rey nirqan: <<¡Manami päsayankisu!>>
Sayno mana munarmi shumaq kamarikuskir saysika soldädunkunawan aywarqan Israel runakunata ichipar michäyänanpaq. 21Sayno michäyaptinmi Israel runakuna juk nänipana tumayarqan.#Deut. 2.4-7.
Aarón wanushqan
22Saymi Israel runakuna Cadespita aywakuyashpan Hor jirkaläman chäyarqan. 23Hor jirkapis Edom nacionpa lindërun cercachömi karqan. Sayman chaykuyaptinmi Moiséstawan Aarónta Tayta Dios nirqan: 24<<Aarón wanunqanami. Meriba pukyu pashtaqcho nishqäta mana cäsukayämashqaykipitami Israel runakunata qoykunäpaq kaq nacionman yaykunqanasu. 25Aarónta y surin Eleazarta Hor puntaman pushay. 26Saycho Aarónpa mandaq cüra kay mödananta loqtipaskir surin Eleazartana jatipanki. Aarón saycho wanukurmi unay ayllunkunawan tinkuq aywakunqa>>.
27 Tayta Dios nishqannölami lapan Israel runakuna rikaykäyaptin Aaróntawan Eleazarta pushakurkur Hor puntaman Moisés wisarqan. 28Saychönami Aarónpa mandaq cüra kay mödananta loqtipaskir surin Eleazartana jatiparqan.#Éxo. 29.29. Say jirkacho Aarón wanuykuptinnami#Núm. 33.38; Deut. 10.6. Moiséswan Eleazar kutikayämurqan. 29Aarón wanushqanta musyaykurmi juk killa Israel runakuna lütuyarqan.
Currently Selected:
Números 20: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
