Números 22
22
Balaamta Balac qayasishqan
1Saypitanami Israel runakuna Jericó simpan y Jordán mayu kaqlä Moab pampaman chäyarqan.
2Ziporpa surin Balacmi moabita runakunapa mandaqnin rey kaykarqan. Paymi rikarqan amorreo runakunata Israel runakuna imano ushayashqantapis. 3Saynöpis Israel runakuna saysika kayashqanta rikarmi rey Balac y moabita runakunapis fiyupa mansariyarqan. 4Saymi Madián nacioncho taq mayor runakunata nirqan: <<Qewata laqwaypa laqwar wäka ushashqannöchir saysika Israel runakunaqa ushaykamäshun>>.
Saymi Ziporpa surin Balac 5Beorpa surin Balaamta#2Ped. 2.15-16; Jud. 11. qayasirqan Israel runakunata maldicionananpaq. Balaam taykarqan Éufrates mayu nawpan Petor markachömi.#22.5 Petor markaqa pachak kimsa chunka (130) lëwanömi Moab pampapita karqan. Say marka kaykan amavita runakuna täyashqanchömi. Balaam kaqman manaraq aywaptinmi kachakunata Balac yäsirqan chaykur niyänanpaq: <<Egiptupita saysika runakuna yarqamurmi täyashqäman juntaqpaq chäyämush. 6Rey Balac musyanshi pipis bendicionta chaskinanpaq niptiki bendicionta chaskishqanta y maldicionash kananpaq niptiki maldicionash kashqanta. Saymi ruwakuläshunki jukla aywaykur say runakunata maldicionapaykunaykipaq. Maldicionaptikiqa saysika kayaptinpis vinciyashpä nacionnïpita qarquyäshaqmi>>.
7Sayno yäsirkuptinmi maldicionapänanpaq qellayta apakurkur Moab y Madián mayor runakuna Balaam kaqman aywayarqan. Chaykurmi Balac nishqannöla lapanta wilayarqan. 8Wilayaptinmi Balaam nirqan: <<Kanan sakay kaylacho quëdakuyay. Waraynami wilashayki Tayta Dios imata nimashqantapis>>.
Niptinmi Moab mayor runakuna jinalancho quëdakuyarqan. 9Say sakaymi Tayta Dios yuripaykur Balaamta tapur nirqan: <<¿Pï runakunataq wayikicho posädaraykäyan?>>
10Saymi Balaam nirqan: <<Moab nacionpa mandaqnin rey Balac kachamushqan runakunami posädaraykäyan. Paykunami niyämash 11aska runakuna Egiptupita shamur intëru nacionninman juntaqpaq chäyashqanta. Say runakunata vincir nacionninpita qarquyänanpaqmi Balac munaykan maldicionanäta>>.
12Sayno niptinmi Balaamta Tayta Dios nirqan: <<Say runakunawan ama aywaysu ni nacionninman chaq runakunatapis ama maldicionaysu. Paykunataqa noqami bendicionta qoshkä>>.
13Waraynin tutala Balaam sharkurmi Balac kachashqan runakunata nirqan: <<Markaykiman kutikuyay. Tayta Dios manami munansu qamkunawan aywanäta>>.
14Sayno niptinmi Moab mayor runakuna Balac kaqman kutiykur niyarqan: <<Balaamqa manami noqakunawan shamuyta munansu>>.
15Saymi wakin mayor runakunatana Balac kacharqan. Say runakunaqa punta aywaqkunapita mas askaq y mas respitash runakunami kayarqan. 16Paykunami Balaamman chaykur niyarqan: <<Ziporpa surin Balacmi ruwakushunki aywaykunaykipaq, taytay. 17Aywaptikiqa alishi pägashunki y imata manashqaykitapis kamaripäshunkishi. Juklashi aywaykuläshun say runakunata maldicionapaykunaykipaq>>.
18Sayno niyaptinmi Balaam nirqan: <<Palaciun junta qorita y qellayta Balac qomaptinpis Tayta Diosnï mana munashqantaqa imatapis manami parlashaqsu. 19Imano kaptinpis kanan sakay kaycho quëdakuyay. Mä imatashi Tayta Dios nimanqa>>.
20Say sakaynami Balaamta yuripaykur Tayta Dios nirqan: <<Pushayäshunaykipaq say runakuna shayämush kaykaptinqa paykunawan ayway. Isanqa noqa nishläta ruranki>>.
Balaampa ashnun nänicho angilta rikashqan
21Tayta Dios sayno niptinmi Balaam tutala sharkur ashnunta sillakurkur Moab mayor runakunawan aywarqan. 22Ishkay ashmayninkunata pushakurkur ashnun loqash#22.22 Wakin runakunaqa muntash niyan. Balaam aywaykaptinmi Tayta Dios rabyashpan angilninta kachamurqan nänicho sapänanpaq. 23Tayta Diospa angilnin espädan aptash nänicho ichiraykaqta rikaykurmi Balaampa ashnun jukläpa yaqaykacharqan. Saymi nänipa aywananpaq ashnuta wirurqan.
24Aywaykashqan nänimi üva chakra chawpinpa päsarqan. Say näni ishkan lädunpa perqa murallash kaptinmi kichkinnincho Tayta Diospa angilnin yapay ichikuykurqan. 25Angilta ashnu rikaykur perqa kuchuman laqakashqanchömi Balaampa chankanta tinkurasirqan. Saymi rabyashpan ashnunta yapay wirurqan.
26Saypitanami Tayta Diospa angilnin nawpaskir kichkinninman ichikuykuptin maypa päsananpaqpis karqansu. 27Angilta rikaykur ashnu jitakakuykuptinmi Balaam fiyupa rabyashpan qeruwan wirurqan. 28Saymi Tayta Dios parlasiptin Balaamta ashnu nirqan: <<Qamta ¿imanashkätaq kimsa kutina wirumänaykipaq?>>
29Sayno niptinmi Balaam nirqan: <<Qam burlakaykämankimi. Cuchillü kaptinqa kanan hörami tuksirïman>>.
30Saymi ashnu nirqan: <<Noqa kä loqash purikunayki ashnuykimi. ¿Acäsu mañösu ashnu imaku kä?>>
Sayno niptinmi Balaam tantiyakushpan nirqan: <<Aw, rasun kaqtami nikämanki>>.
31Saypitanami angilta Balaam rikananpaq Tayta Dios kamakäsirqan. Pulan nänicho espädan aptash ichiraykaqta rikaykur Balaam mansarishpan pasaman lätakuykuptinmi 32Tayta Diospa angilnin nirqan: <<¿Imanirtaq kimsa kuti ashnuykita wirushkanki? Noqami kay nänicho sapashkä lutan yarpaywan aywaptiki. 33Ashnuyki rikamarmi jukläpa yaqaykachash, ichikuykush y jitakakuykush. Sayno mana ruraptinqa qamta wanusiptï ashnulaykinami kawaykanman karqan>>.
34Sayno niptinmi Balaam nirqan: <<Taytay, perdonaykalämay. Sapaykämashqaykita manami musyashkäsu. Aywanäta mana munaptikiqa kutikushaqchir, Taytay>>.
35Saymi Tayta Diospa angilnin nirqan: <<Say runakunawan ayway. Isanqa noqa nishlätami imatapis ninki>>.
Saypitanami Balac kachamushqan runakunawan Balaam aywarqan.
Balaamta Balac chaskikushqan
36Balaam aywaykashqanta musyarmi Balac taripaq aywarqan Arnón mayu nawpancho juk markayaq. Say markaqa Moab nacionpa lindërunchömi kaykan. 37Balaamwan tinkuykurmi Balac nirqan: <<Qayasimuptï ¿imanirtaq shamuyta munashkankisu? ¿Mana päganätaku yarpashkanki?>>
38Sayno niptinmi Balaam nirqan: <<Kaychönami kaykä. Isanqa kikïpa yarpayniläpita manami imatapis parlashaqsu, saypa trukanqa Tayta Dios tantiyasimashlantami>>.
39Saypitanami Balaamqa Balacwan aywarqan Quiriat-huzotman. 40Saycho wäkakunata, uyshakunata y cabrakunata pishtarkasirmi sacrificiuta Balac rurarqan. Say aysatami Balaamta y paywan kaykaq mayor runakunatapis qararqan.
41Saypita waraynin tutanami Balaamta Balac pusharqan Bamot-baal jirkaman. Say jirkapitami Israel runakunapa campamentun rikakarqan.
Currently Selected:
Números 22: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
