Números 19
19
Impüru kayashqanpita imano purificakuyänanpaqpis tantiyasishqan
1Saypitanami Moiséstawan Aarónta Tayta Dios nirqan: 2<<Israel mayikikunapaqmi kay leypis kaykan: Manaraq yapyaq sänu puka wäkata Israel runakuna apayämunqa. 3Sayta chaskiskirmi cüra Eleazar campamentupita jukläman apaykasir rikanancho pishtasinqa. 4Say wäkapa yawarninman dëdunta jatirkurmi cüra Eleazar Tinkuna Toldu kaqmanpa qanchis kuti saqsupanqa. 5Nirkurmi Eleazar rikaykaptin jinalancho say wäkapa qaranta, aysanta, yawarninta y ashashnintapis rupasinqa. 6Say rupaykaqmanmi cedru qeruta, juk räma hisöputa y puka ratashta cüra Eleazar winanqa.
7<<Nirkurnami armakuskir y taqshakuskir campamentuman cüra kutinqa. Isanqa pasa sakashqanyaqmi impüru kanqa. 8Saynölami wäkata pishtaskir rupasiq runapis taqshakur armakunqa. Paypis pasa sakashqanyaqmi impüru kanqa.
9<<Saypitanami püru kaykaq juk runana wäka rupashqan uchpata shuntarkur limpiu partiman apar churanqa. Say uchpatami Israel runakuna yakuman winayanqa purificakuna yaku kananpaq.#Heb. 9.13. Say yaku purificasina sacrificiumi kanqa. 10Uchpa shuntaqpis mödananta taqshakuskir pasa sakashqanyaqmi impüru kanqa. Say nishqäkunaqa imayyaqpis leymi qamkunapaq y qamkunacho taq jäpa runakunapaqpis kanqa.
11<< <Pipis ayata yataq kaqqa qanchis junaqyaqmi impüru kanqa. 12Yatashqanpita kimsa junaqcho y qanchis junaqchöpis purificasina yakuwan purificakunqa. Kimsa junaqcho ni qanchis junaqchöpis mana purificakurqa manami pürusu kanqa. 13Pipis ayata yataykur mana purificakurqa Tayta Diospa Sagrädu Tolduntami impüruyäsinqa. Purificasina yakuwan mana saqsupash karqa impürulami quëdanqa. Say runataqa Israel runakunapita qarquyanki.
14<< <Toldun rurincho pipis wanuptinqa tolducho kaykaqkunapis y tolduman yaykuqpis qanchis junaqyaqmi impüru rikakunqa. 15Mana ali sapash mankakunapis impürumi rikakunqa. 16Saynölami tashqanpita juklächo espädawan runa wanusishqan ayata yatarpis, kikilan wanushta yatarpis, runapa tulunta yatarpis o aya pamparashqanta yatarpis qanchis junaqyaq impüru rikakunqa.
17<< <Say runa purificakunanpaq puka wäkata rupasishqanpa uchpanta mankaman winarkur chuya yakuta winanqa. 18Nirkur püru kaykaq runa say yakuman hisöpu rämata jatirkur saqsupanqa impüru runa tashqan tolduta, toldu rurincho lapan imaykankunata y lapan saycho taqkunatapis. Saynöla saqsupanqa tuluta yataqtapis, runa wanusishqan aya yataqtapis, kikilan wanush runapa ayan yataqtapis o aya pamparashqanta yataqtapis. 19Impüru runata sayno saqsupanqa kimsa junaqcho y qanchis junaqchöpis. Qanchis junaqchömi impüru runa taqshakuskir armakunqa. Pasa sakaptinnami püruna rikakunqa.
20<< <Pipis impüru kashqanpita mana purificakurqa Sagrädu Toldutami impüruyäsinqa. Purificasina yakuwan mana saqsupash karqa impürulami quëdanqa. Say runataqa Israel runakunapita qarquyanki.
21<< <Kay nishqäkunaqa imayyaqpis leymi qamkunapaq kanqa. Purificasina yakuwan saqsupaq kaqpis mödananta taqshakunqami. Purificasina yakuta yataq kaqpis pasa sakashqanyaqmi impüru kanqa. 22Impüru runa imatapis yatashqan kaqqa impürumi kanqa. Impüru runata yataykuq runapis pasa sakashqanyaqmi impüru kanqa> >>.
Currently Selected:
Números 19: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
