Números 14

Israel runakuna Tayta Diospa contran rikakuyashqan

Deuteronomio 1.26-33

1Sayno niyaptinmi Israel runakuna qaparäyashpan say sakay warati waqaykar waräyarqan. 2Saymi Moiséstawan Aarónta qayapar niyarqan: <<¡Alimi kanman karqan Egiptulacho o kay sunyaq jirkalacho wanukush! 3¿Imapaqtaq kayman Tayta Dios pushamashkansi? Guërracho wanusimashpansimi warminsitapis surinsikunatapis contransikuna apakuyanqa. ¡Saypa trukanqa Egiptuman kutikush alimi kanman!>>

4Saymi juknin jukninpis wilanakur niyarqan: <<Egiptuman pushamänansipaq juktana mandamaqninsita churashun>>.

5Sayno niyaptinmi Moiséswan Aarón ima ruraytapis mana kamäpakur pasaypa lakikuyashpan lapan runakunapa nawpancho lätakuykuyarqan.

6Nunpa surin Josuéwan y Jefonipa surin Calebpis fiyupa lakikuyashpanmi mödanankunata rachiyarqan. (Paykuna kayarqan Canaánman rikapakuq aywaqkunami.) 7Nirkurnami Israel runakunata niyarqan: <<¡Rikapakur puriyämushqä nacionqa maypis täkuy munaymi kaykan! 8Tayta Diosmi kuyamashpansi say nacionman yaykasimäshun. Saychöqa lichipis abëjapa mishkinpis askami kaykäyan. 9Isanqa Tayta Diospa contran ama sharkuyaysu#Heb. 3.16. ni saycho taq runakunata ama mansayaysu. Paykunataqa chushpitanölami lapirishun. Saynöpis paykunataqa manami pipis yanapänanpaq kansu. Tayta Dios noqansiwan kaykaptinqa ama mansarishunsu>>.

10Sayno niyaptinmi runakuna samqayta munayarqan. Say hörami lapan runakuna rikay Tayta Diospa chipipiyninta Tinkuna Tolducho rikayarqan. Saychömi 11Moisésta Tayta Dios nirqan: <<¡Imayyaqraq Israel runakuna rabyanäsiyämanqa! Milagrukunata rurashqäta rikaykarpis ¡imayyaqraq criyiyämanqasu! 12Kay runakunata pestiwanmi ushakäsishaq. Qampita miraqkunalami jatun nación rikakuyashqanyaq mirayanqa>>.

13Sayno niptinmi Moisés nirqan: <<Taytay, kikikimi munaynikiwan Egiptupita Israel runakunata jorqamushkanki. Paykunata ushakäsiptikiqa 14Egipto runakuna musyaykur Canaáncho taq runakunatami wilayanqa. Cananeo runakunapis musyayanmi noqakunawan kaykashqaykita. Saynöpis musyayanmi yuripaykamar parlapämashqaykita, ichiraykaq pukutaycho puntäkunata junaqpa aywashqaykita y ichiraykaq nina rupaykaqcho sakaypa aywashqaykita. 15Israel mayïkunata lapanta ushakäsiptikiqa maysaychöpis runakuna jamuräyäshushpaykimi niyanqa: 16<Tayta Dios say runakunata promitishqan nacionman chäsiyta mana kamäpakurmi sunyaq jirkalacho ushakäsish>.

17<<Tayta Dios, saymi qamta manakü promitishqaykinöla munaynikiwan yanapaykamänaykipaq. Qam nishkanki 18mana rabyakuq y kuyapäkuq kashqaykitami. Saynöpis nishkanki mana cäsukuqkuna perdonta manakuyäshuptiki perdonanaykipaq kashqantami. Saynöpis nishkanki jusalikuqkunataqa kikintapis, surintapis, wilkantapis y shurukta wilkantapis castiganaykipaq kashqantami.#Éxo. 20.5-6; 34.6-7; Deut. 5.9-10; 7.9-10. 19Egiptupita kayyaq pushamänaykipaqpis pacienciayki kashqami. Kuyapäkuq kaykarqa jusalikuyashqanpita kay runakunata perdonaykulay>>.#Éxo. 32.11-14.

Israel runakunata Tayta Dios castigashqan

Deuteronomio 1.34-40

20Saymi Tayta Dios nirqan: <<Manakamashqaykinölami perdonashaq. 21Imayyaqpis kawaq Dios kar y intëru munduta munaynïcho sarararmi nï: 22-23Egiptucho y sunyaq jirkacho milagrukunata rurashqäta rikaqkuna manami ni juklaylapis chanqasu unay aylluykikunata promitishqä nacionman. Paykuna yaparir yaparir kikin munayashqanta rurasimayta munayashpanmi cäsukayämashsu. Manami mayqanpis sayno rabyanäsimaqkunaqa say nacionman chäyanqasu.#Heb. 3.18. 24Sirvimaqnï Calebmi isanqa nishqäkunata cäsukaman. Saymi rikapakamushqan nacionman payta yaykasishaq. Paypita miraqkunapis saychömi täyanqa.#Jos. 14.9-12. 25Amalecita runakuna y cananeo runakuna täyashqan pampapaqa amana aywayaynasu. Saypa trukanqa waray junaq sunyaq jirkaman kutiyay Puka Lamarpa aywaq nänipa>>.

26Saypitanami Moiséstawan Aarónta Tayta Dios nirqan: 27<<Wiyashkämi Israel runakuna conträ parlayashqankunata. ¡Imayyaqraq kay runakunata awantashaq! 28Kayno nishqäta paykunata wilay: <Noqa Tayta Diosmi jurar nï: Yarpäyashqaykinölami lapaykita ushakäsiyäshayki. 29Conträ parlayashqanpitami ishkay chunka (20) watayuqpita janaman lapan censash kaqkuna kay sunyaq jirkacho wanur ushakäyanqa.#Heb. 3.17. 30Jefonipa surin Calebwan Nunpa surin Josuélami promitishqä nacionman yaykuyanqa. Saypita kaqqa manami mayqaykikunapis yaykuyankisu. 31Wamraykikunatami isanqa chikiyäshuqnikikuna apakuyänanpaq kashqanta yarpäyaptikipis yaykasishaq. Manakaqman churayashqayki nacionchömi wamraykikuna täyanqa.

32<< <Qamkunaqa kay sunyaq jirkachömi wanur ushakäyanki. 33Wanur ushakäyashqaykiyaqmi wamraykikuna chusku chunka (40) wata#Hech. 7.36. uywankuna qatish sunyaq jirkacho puriyanqa. Qamkuna mana wiyakayämashqaykipitami sayno nakayanqa. 34Chusku chunka junaq Canaánta rikapakayämushqaykinömi chusku chunka watantin nakar puriyanki. Saynöpami cada junaqpita juk wata sunyaq jirkacho kayanki. Sayraqmi musyayanki imano castigakuq kashqätapis. 35Noqa Tayta Dios karmi nishqäta cumplishaq. Saymi conträ sharkuq y mana cäsukamaq runakunata castigar kay sunyaq jirkalacho ushakäsishaq> >>.

36Runakunata desvalorasiyashqanpitami Moisés kachashqan chunka rikapakuqkunata 37pesti qeshyawan Tayta Dios wanusirqan. 38Josuéwan Caleblami kawaykar quëdayarqan.

Amalecita y cananeo runakuna Israel runakunata vinciyashqan

Deuteronomio 1.41-46

39 Tayta Dios nishqanta Moisés wilaptinmi Israel runakuna fiyupa lakikuyarqan. 40Saymi saka sakala sharkurkur jalqakunaman aywayänanpaq niyarqan: <<Tayta Dios promitimashqansi nacionman yaykuyta mana munarmi pasaypa jusalikushkansi. Kanan sayman jukla aywashun>>.

41Sayno niyaptinmi Moisés nirqan: <<¡Walälami yarpaykäyanki sayman aywayta! Sunyaq jirkaman kutinansipaq Tayta Dios nikämashqaqa ¿imanirtaq cäsukuyta munayankisu? 42Promitimashqansi nacionman ama aywayaysu. Mana wiyakuypa aywayaptikiqa Tayta Dios manami yanapäyäshunkisu. Chikishuqnikikunapis vincir wanusiyäshunkimi. 43Amalecita y cananeo runakunaqa ushakäsiyäshunaykipaqmi shuyaykäyäshunki. Mana cäsukuq kayashqaykipitami Tayta Dios sapäyäshunkinasu>>.

44Moisés sayno nikaptinpis Israel runakuna chölu tukuyashpanmi jalqakunaman aywayarqan. Sayno aywayarqan campamentucho Moisés quëdaptinpis y Pactu Babulta mana aparpis. 45Israel runakuna aywaykäyaptinmi jalqakunacho taq amalecita y cananeo runakunapis yarqapäyämushpan Israel runakunata atacayarqan. Vinciyashpanmi Hormayaq qatikachäyarqan.

Currently Selected:

Números 14: qvhB

Highlight

Copy

Compare