Números 13
13
Canaánman rikapakamuq Moisés kachashqan
Deuteronomio 1.19-25
1Saypitanami Moisésta Tayta Dios nirqan: 2<<Kananqa cada trïbupita juk mandaqta kachay Canaánta rikapakayämunanpaq. Say naciontami Israel runakunata qoykushaq>>.
3Saymi Tayta Dios nishqannöla Parán sunyaq jirkapita runakunata Moisés kacharqan rikapakayämunanpaq. Lapanpis say runakunaqa mandaqmi kayarqan. 4Say aywaq runakunami kayarqan Rubén trïbupita Zacurpa surin Samúa, 5Simeón trïbupita Horípa surin Safat, 6Judá trïbupita Jefonipa surin Caleb, 7Isacar trïbupita Josépa surin Igal, 8Efraín trïbupita Nunpa surin Oseas, 9Benjamín trïbupita Rafúpa surin Palti, 10Zabulón trïbupita Sodipa surin Gadiel, 11Josépa surin Manasés trïbupita Susipa surin Gadi, 12Dan trïbupita Gemalipa surin Amiel, 13Aser trïbupita Micaelpa surin Setur, 14Neftalí trïbupita Vapsipa surin Nahbi y 15Gad trïbupita Maquipa surin Geuel.
16Paykunatami Moisés kacharqan Canaánman rikapakamuq. Nunpa surin Oseaspa jutintanami Moisés trukasiparqan Josué#13.16 Oseas ninanqa salvación ninanmi. Josué ninanqa Tayta Dios salvacionmi kaykan ninanmi. jutin kananpaq.
17Canaánta rikapakayämunanpaq kachashpanmi Moisés nirqan: <<Neguevpa päsayashpayki jalqakunacho kaykaq markakunaman aywayanki. 18Say markakunata imano kashqantapis rikapakamur shumaq mayapäkayämunki runakuna fuerti kayashqanta o débil kayashqanta, askaq kayashqanta o walkaqla kayashqantapis. 19Saynöpis rikapakayämunki wayinkuna toldula kayashqanta o perqa kayashqanta y markankuna murallash o muralläni kayashqantapis. Saynöpis rikapakayämunki chakrankuna imano kayashqantapis. 20Rikapakayämunki ali chakra o qachpa chakra kashqanta, munti o muntiynaq kashqantapis. Ama mansariyankisu say nacionman yaykuyta. Say chakrakunacho ima wayushqantapis kutimur apayämunki>>.
(Say wisanmi punta poquq üva palay tiempuna karqan.)
21Moisés sayno kachaptinmi intëru Canaánta rikapakayämurqan Zin niyashqan sunyaq jirkapita Hamatman yaykuna Rehob markayaq. 22Neguevpa päsarmi Hebrón markaman chäyarqan. Saychömi taykäyarqan Anacpita miraq Ahimán runakuna, Sesai runakuna y Talmai runakunapis. Hebrón markata sharkasiyashqanpita qanchis watataraqmi Egiptucho Zoán markata sharkasiyarqan.
23Saypita Escol pampaman rikapakuqkuna chaykurmi rämantinta juk sarta üvata mutuskir qeruwan wintuypa apayarqan. Saynölami hïgustawan granädatapis apayarqan. 24Juk sarta üvata palayashqanpitami say pampata jutisiyarqan Escol#13.24 Escol ninanqa sarta ninanmi. jutin kananpaq.
25Chusku chunka (40) junaq rikapakuskirmi 26Parán niyashqan sunyaq jirkacho Cadesman kutiyarqan. Saychömi kaykäyarqan Moisés, Aarón y lapan Israel runakunapis. Chaykurmi wilayarqan lapan rikayashqankunata y imata wiyayashqantapis. Saynölami saypita imata apayämushqankunatapis rikasiyarqan. 27Nirkurmi Moisésta niyarqan: <<Rikapakamuq kachayämashqayki chakrakunaman aywayashkämi. Saycho rasunpami lichipis abëjapa mishkinpis aska kaykan. Kay frütakunatami saypita apayämushkä. 28Isanqa saysikami runakuna saycho täyan. Markankunapis jatusaq y ali murallashqami kaykäyan. Saynölami Anacpita miraq jatusaq runakunapis kaykäyan. 29Saynöpis Neguevchömi amalecita runakuna taykäyan. Jalqakunacho kaykaq markakunachönami taykäyan heteo runakuna, jebuseo runakuna y amorreo runakuna. Cananeo runakunanami taykäyan lamar kuchun pampakunacho y Jordán mayu nawpan pampakunacho>>.
30Sayno niyaptinmi Moiséspa contran runakuna parlayarqan. Saymi runakunata upälaykasir Caleb nirqan: <<¡Sayno kaptinpis say markakunatawan chakrakunata qechunansipaq aywashun! ¡Noqansiqa paykunata vincishunmi!>>
31Sayno niptinpis rikapakamuq mayinkuna niyarqan: <<Say runakunata ¿imapaqtaq wajupäshun? ¡Noqansipita mas saysikami paykuna kaykäyan!>>
32Israel mayinkunata mansarïsirmi niyarqan: <<Rikapakayämushqä markakunacho pasaypa wanusinakuylami kaykan. Saynöpis say markakunacho taq runakuna jatusaqmi kaykäyan. 33Anacpita#Gén. 6.4. miraq sikasaq runakunatapis rikayashkämi. Kikïkunapa yarpaynïpitaqa paykunapa nawpancho chuklus tamäñunölami kayashkä. Paykunapis chuklustanölami rikayämash>>.
Currently Selected:
Números 13: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
