Números 12

Aarónwan María Moiséspa washanta rimayashqan

1Hazerotchömi cusita warmiwan majasakashqan janan Aarón y panin María Moiséspa washanta rimar 2niyarqan: <<Manami Moiséslawansu Tayta Dios parlash, sinöqa noqansiwanpis parlashqami>>.

Sayno rimayashqantami Tayta Dios wiyarqan. 3Paykuna sayno rimayaptinpis kay pasacho pïmaypitapis mas qollmi shonqu karmi Moisés imatapis parlakurqansu.

4Saymi Moisésta, Aarónta y Maríata Tayta Dios nirqan: <<Tinkuna Tolduman kimsayki aywayay>>.

Sayman kimsan aywayaptinmi 5ichiraykaq pukutaycho Tinkuna Toldu punkuman Tayta Dios urämurqan. Saypita Aarónta y Maríata qayaptin nawpanman aywayaptinmi 6Tayta Dios nirqan: <<Nishqäta shumaq wiyayämay. Qamkunacho profëtakunataqa revelacioncho y sueñuyninkunacho parlapaypami tantiyasï. 7Wayïta#12.7 Wayinpaq parlarqa Israel runakunapaqmi parlaykan. ali rikaq sirvimaqnï Moiséstami isanqa saynösu parlapä. 8Paytaqa mana tumasipaylapami parlapä. Kikïtami rikaman. Sayno kaykaptinqa ¿imanirtaq washanta rimaykäyanki?>>

9Sayno niskirmi Tayta Dios fiyupa rabyash aywakurqan. 10Tinkuna Sagrädu Toldupita pukutay aywakuptinmi jinan höra Maríapa intëru cuerpun leprawan yuraq rikakurqan. Sayta rikaykurmi 11Moisésta ruwakur Aarón nirqan: <<Jusäkuna atipash upanöpis parlayashqäpita ama castigaykayämaysu ari, taytay. 12Mamanpa pachalancho wanush wamra ismushnönami Maríapa qaranpis kaykan. Aliyänanpaq Tayta Diosta manakuykulay ari>>.

13Saymi Tayta Diosta ruwakur Moisés nirqan: <<Tayta Dios, Maríata aliyaykasilay>>.

14Saymi Tayta Dios nirqan: <<Qaqlancho papänin toqapaptin ¿manaku qanchis junaqyaq penqakush uysuran? Sayno kaykaptinqa campamentupita qanchis junaqyaq Maríata qarquy.#Núm. 5.2-3. Saypitaraqmi kutimunqa>>.

15Saymi campamentupita qanchis junaqyaq Maríata qarquyarqan. Pay kutimushqanyaqmi Israel runakuna jinalancho kaykäyarqan. 16María kutiykuptinnami Israel runakuna Hazerotpita aywakur Parán niyashqan sunyaq jirkaman chäyarqan. Saychömi toldunkunata ichisir posädakuyarqan.

Currently Selected:

Números 12: qvhB

Highlight

Copy

Compare