Nahum 1
1
1Kay libruchömi qelqaraykan profëta Nahúmta Tayta Dios revelashqan. Nahúmqa karqan Elcos markapitami. Paytami Tayta Dios revelacioncho rikasirqan Nínive markata ushakäsinanpaq kashqanta.#Isa. 10.5-34; 14.24-27; Sof. 2.13-15.
Nínivita Tayta Dios castigananpaq nishqan
2 Tayta Diosqa munan pay japalanta sirviyänantami.
Contran kaqkunataqa mana kuyapaypami pitapis castigan.#Éxo. 20.5-6; Deut. 4.24.
Pipis mana wiyakuptinqa fiyupami rabyakun.
3 Tayta Diosqa pacienciakuq y munayyuqmi kaykan.
Pacienciakuq karpis jusalikuqkunataqa castiganmi.
Tayta Diosqa huracán y waqya tamya jananpami aywan.
Pukutaypis chakincho polvu sharkuqnölami kaykan.
4Olqüpaptinqa lamarpis y mayukunapis sakikäkuyanmi.
Basán particho y Carmelo jirkacho kaqkunapis sakikäkuyanmi.
Líbanucho kaykaq waytakunapis wanutäyanmi.
5Pay shamuptinqa lömakunapis mansariyashpan suksukyäyanmi.
Jirkakunapis sulur ushakäyanmi.#Sal. 97.5; Miq. 1.4.
Kay pasapis y kay pasacho kaqkunapis lapanmi mansariyashpan suksukyäyan.
6Pay rabyanaptin ¿piraq mansarinmansu?
Pay ajanaptin ¿piraq ichipanman?
Pay rabyakurqa ninanöraqmi imaykatapis ushan.
Pay puriptinqa qaqakunapis shilikäyanmi.
7 Tayta Diosqa alilata ruraqmi kaykan.
Payqa lakikuycho kaqkunatapis yanapanmi.
Payman yärakuqkunatapis alimi rikan.
8Paypa contran kaqkunatami isanqa juchu apaqnöraq ushakäsin.
Maysaypa aywayaptinpis wanuylami qatiraykan.
9¿Imanirtaq Tayta Diospa contran sharkuyänaykipaq wilanakuykäyanki?
Payqa lapaykitami ushakäsiyäshunki.
Contran kaqkunataqa chipyaqmi ushakäsinqa.
10Shatayash shirakata y saki oqshata nina rupar ushaqnömi ushakäsinqa.
11Nínive runakuna#1.11 Nínive markaqa karqan Asiria nacionpa capitalninmi., qamkunapa mandaqniki reyqa Tayta Diospa contranmi sharkush.
Saymi mana alita yäsiyäshunki.
12Kuyashqan runakunatami Tayta Dios kayno nin:
<<Qamkunata castigash karpis kananpitaqa mananami castigayäshaykinasu.
Asiria nación runakunatami isanqa munayyuq kayaptinpis y saysika kayaptinpis lapanta ushakäsishaq.
13Say runakunapa munaynincho kayashqaykipita jorquyäshaykimi.
Mananami yapayqa paykunapa munaynincho kayankinasu>>.
14Nínive markapa mandaqnin reytanami Tayta Dios kayno nin:
<<Jutikita aparänanpaqpis qampita miraqkuna manami kayanqanasu.
Saynöpis diosnikipa templuncho kaykaq ïdulukunata qerupita rurash kaqtapis, qoripita y qellaypita fundish kaqtapis lapantami ushakäsishaq.
Manakaqman qamta churashpämi say templuman pampashayki>>.
15 15 (2.1) Judá runakuna, ali wilakuyta apamuq runa jirkakunapa shamuykaqta rikayay.
Paymi apaykämun ali kawayänaykipaq kaq wilakuyta.#Isa. 52.7.
Kananpitaqa ushakäsiyäshunaykipaq contrayki runakuna mananami shayämunqanasu.
Paykunaqa lapannami wanur ushakäyash.
Sayno kaykaptinqa Tayta Diospa fiestankunata#Lev. 23. rurar kushikuyay.
Say fiestakunacho payta promitiyashqaykita cumpliyay.
Currently Selected:
Nahum 1: qvhB
Highlight
Share
Compare
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
