Miqueas 7
7
Jusalikuyman Israel runakuna churakäyashqan
1¡Kaychi kaylaqa!
Cosechash chakraman yaykur üvata y hïgusta ashiq runanömi kaykä.
Chakracho imatapis mana tarir mikanaykaq runa lakikushqannömi lakikü.
2Kay nacioncho manami pipis Tayta Diosta cäsukunsu.
Alilata ruraq runaqa manami jukpis kansu.#Sal. 12.1.
Wanusinakuylapaqmi yarpaykäyan.
Jukninpis jukninpis ushakäsinakuylatami munaykäyan.
3Jusalikuypaqqa mamalan wachashqami kaykäyan.
Autoridäkunapis y juezkunapis chaskipakurmi shumaq arreglayansu.
Rïcu runakunaqa päga pägaykurmi munayashlanta rurasiyan.
Saynöpami wakin runakunapis jusalikuylaman churakash kaykäyan.
4Paykunachöqa mas respitash runapis kashanöraqmi kaykan.
Mas yärakuypaq runapis wallankanöraqmi kaykan.
Sayno kayaptinmi jusankuna aypaykämunna.
Wilakuq profëtakuna wilakuyashqannölami castigash kayänanpaq kaq junaq chaykämunna.
Say wisan imata rurayänanpaqpis manami kamäpakuyanqasu.
5Pitapis ama criyiyaynasu.
Mas kuyayashqayki amïguykikunamanpis ama yärakuyaynasu.
Warmikitapis lutalaqa imatapis ama wilapäyaynasu.
6Olqu surinmi taytanta manakaqman churan.
Warmi wawanmi mamanpa contran rikakun.
Lumsuyninpis suedrantami chikin.
Sayno karmi say wayilacho tarpis kikinpurala chikinakuyan.#Mat. 10.35-36; Luc. 12.53.
7Sayno kaptinpis noqaqa Tayta Dioslamanmi yärakuykä.
Salvamänanpaq Tayta Dioslamanmi imaypis yärakushaq.
Payqa manakushqäta wiyamanmi.
Israel runakunata Tayta Dios salvananpaq nishqan
8Say wisanmi Israel runakuna niyanqa:
<<Chikimaqnïkuna, desgracia päsayämashqanpita ama kushipäyämaysu.
Ishkirpis sharkuyäshaqmi.
Mansariypaq sakaychöno kaptïpis Tayta Diosmi noqapaq aksi kanqa.
9Tayta Diosta rabyanäsirmi jusalikushkä.
Saymi castigamaptinpis jina awantakushaq.
Nirkurmi perdonamashpan aksiman jorqamanqa.
Salvamaptin kushishqami kawashaq>>.
10Chikimaqnïkunapa rikay nawinmi Tayta Dios yanapämanqa.
Sayta rikarmi pasaypa penqaytukush rikakuyanqa.
Tayta Dios castigamashqanta rikar paykunaqa kushipäyämashpan niyämarqan: <<¿Maychötaq Diosniki kaykan?>>#Sal. 79.10; Joel 2.17.
Sayno niyämashqanpitami cällicho kaykaq mituno luskash kayanqa.
Sayno kaykaqta rikarmi noqapis paykunata kushipäshaq.
11Jerusalén marka, jiruruypa corralaraq perqaykikuna alsash kayänanpaq kaq junaq chaykämunnami.
Lindëruykikunapis mas jatunmi kanqa.
12Say wisanqa maysaypitami runakuna qamman shayämunqa.
Saymi shayämunqa Asiriapita, Egiptupita, Nilo mayupita, Éufrates mayupita, lamar kuchunpita, jalqakunapita y maysaypitapis.
13Jusalikular kawayashqanpitami markankuna sunyaräyanqa.
Tayta Diosta manakuyashqan
14Tayta Dios, kuyashqayki runakuna kaykäyaptïqa shumaq rikaykayälämay.
Noqakunaqa kaykäyä uyshaykikunanömi.
Alinnincho tarpis munti rurincho oqrakashnömi kaykäyä.
Unay ayllükunata ali rikashqaykino noqakunatapis rikaykayälämay.
Basáncho y Galaadcho ali qewakuna kashqanman yapay pushaykayälämay.
15Unay ayllükunata Egiptupita jorqamushpayki milagrukunata rurashqaykino noqakunapaqpis milagrukunata ruraykulay.
16Milagrukunata rurashqaykita wakin nación runakunapis rikayäsun.
Sayta rikarmi paykunapis tantiyakuyanqa qam japalayki munayyuq Dios kashqaykita.
Kikinkuna munayniynaq kashqanta tantiyarmi pasaypa penqaytukush rikakuyanqa.
Äyakash rikakur ima ruraytapis manami kamäpakuyanqasu.
17Paykunaqa culebrakunanömi alpata mikuyanqa.#7.17 Alpata mikuyanqa ninanqa seqaypa penqayman churash kananpaq kashqantami nikan (Gén. 3.14).
Pakaraykäyashqanpita yarqamurmi nawpaykiman suksukyaykar chäyämunqa.
18Tayta Dios, qamnöqa manami juk dios kansu.
Kuyashqayki runakuna perdonta manakuyäshuptiki perdonankimi.
Jusalikuyashqantapis qonqankimi.
Rabyar imayyaqpis castiganaykipa trukanqa salvashqayki runakunata kuyapar yanapankimi.
19Yapay kuyapaykayälämay, Taytay.
Jusalikuyashqätapis amana yarparaykulaysu.
Saypa trukanqa jusalikuyashqäta mas jundunnin lamarman jitarpuy.
20Abrahamta, Jacobta y wakin unay ayllükunata kuyapar promitishqaykita cumpliykulay, Taytay.#Gén. 12.1-3; 17.6-8; 28.13-15; Luc. 1.55.
Currently Selected:
Miqueas 7: qvhB
Highlight
Share
Compare
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
