Marcos 15

Pilatuman Jesústa apayashqan

Mateo 27.1-2, 11-14; Lucas 23.1-5; Juan 18.28-38

1Pasa waraykaptinnami mandaq cürakuna, Israel mayor runakuna, ley yachasiqkuna y lapan Sanedrín juezkunapis shuntakaykur wilanakuyarqan Jesústa wanusiyänanpaq. Wilanakuskirnami Jesústa liyarkur Pilatuman apasiyarqan. 2Chaykasiyaptinnami Pilato tapurqan: <<¿Rasunpaku Israel runakunapa mandaqnin rey kanki?>> nir.

Saymi Jesús nirqan: <<Rasun kaqtami nikanki>>.

3Saychömi mandaq cürakuna Jesúspa contran imaykatapis niyarqan. 4Saymi Jesústa Pilato yapay tapur nirqan: <<¿Manaku imatapis ninki sayjina contrayki nikäyaptin?>>

5Sayno niptinpis Jesús manami imatapis parlakurqansu. Saymi Pilato yarpachakuyman churakarqan.

Jesústa crucificayänanpaq Pilato ordinta qoshqan

Mateo 27.15-26; Lucas 23.13-25; Juan 18.39—19.16

6Cada watami Pascuacho runakuna manakuyashqan prësuta Pilato kachariq. 7Say watami Barrabás jutiyuq runa prësu wichqaraykarqan. Payqa autoridäkunapa contran sharkushqanpita y wanusikushqanpitami wanusikuq mayinkunawan carcilcho wichqaraykarqan. 8Saymi runakuna Pilatuman aywaykur manakuyarqan juk prësuta say watapis kacharinanpaq. 9Saymi Pilato tapur nirqan: <<¿Munayankiku Israel runakunapa mandaqnin reyta kacharinäta?>>

10Pilato musyarqanmi Jesústa chikir mandaq cürakuna payman prësu apayashqanta.

11Sayno niptinmi mandaq cürakuna saycho kaykaq runakunata yäsiyarqan: <<Barrabásta kachariyqa>> niyänanpaq. 12Barrabásta kacharinanpaq niyaptinmi Pilato nirqan: <<Israel runakunapa mandaqnin reyta ¿imatataq rurashaq?>>

13Sayno niptinmi sinchipa niyarqan: <<¡Crucificasiy!>>

14Saymi Pilato tapurqan: <<¿Imatataq jusalikush?>>

Sayno niptinpis runakuna masraqmi: <<¡crucificasiy!>> niyarqan.

15Sayno niyaptinmi runakunapita ali rikash kayta munashpan Barrabásta Pilato kacharirqan. Jesústanami fiyupa astarkasir crucificayänanpaq soldädukunapa makinman kachaykurqan.

Jesústa soldädukuna asipäyashqan

Mateo 27.27-31; Juan 19.2-3

16Saypitanami soldädukuna Jesústa apayarqan Pilatupa despächunpa patiunman. Lapan tröpa#15.16 Tröpa complëtuqa soqta pachak (600) soldädukunami kayarqan. soldädukuna sayman juntakaykurmi 17granäti cäpata aylluparkur kashapita awash corönata umanman jatipäyarqan. 18Sayno jatiparkurmi asipar niyarqan: <<¡Alabash kasun Israel runakunapa mandaqnin rey!>>

19Saypitanami shoqushwan Jesústa umacho wiruyarqan. Toqapar ushayashpanmi adoraq tukur puntanman qonqurpakuyarqan. 20Sayno asiparkurmi granäti cäpata loqtipaskir kikinpa mödanantana jatipäyarqan. Nirkurmi crucificaq apayarqan.

Jesústa crucificayashqan

Mateo 27.32-44; Lucas 23.26-43; Juan 19.17-27

21Jesústa crucificayänanpaq apaykäyaptinmi chakrapita kutiykämurqan Simón jutiyuq runa. Payqa Cirene nacionpita y Alejandrupa y Rufupa taytanmi karqan.#Rom. 16.13. Paytami Jesús apaykashqan cruzta umrusiyarqan. 22Saypitanami Jesústa chäsiyarqan Gólgota niyashqanman. Gólgota ninanqa Calavëra Sitiu ninanmi. 23Saycho mïrrawan talush vïnuta upusiyta munayaptinpis manami upuyta munarqansu.#15.23 Sayno upusiyta munayarqan aläpa nanayta Jesús mana mayananpaqmi.

24Jesústa crucificaykurnami suertita jitayarqan mödananta mayqanpis apakunanpaq.#Sal. 22.18. 25Crucificayashqan höra karqan tuta las nuëvinömi. 26Imapita wanusiyashqantapis runakuna musyayänanpaqmi letrërucho kayno qelqaraykarqan: <<Kay runaqa Israel runakunapa mandaqnin reymi>>.

27Jesús crucificaraykashqan nawpanmanmi ishkay suwa runakunatapis crucificayarqan, juknin kaqta aluq kaq nawpanman y jukaqtana isuq kaq nawpanman. 28[Say suwa runakunatawan crucificarmi Tayta Diospa palabrancho kayno nishqanta cumpliyarqan: <<Jusayuq runatanömi rikayarqan>>.]#Isa. 53.12.

29Jesús crucificaraykaqta rikarmi saypa päsaq runakuna asipäyarqan. Umankunata awiyashpanmi#Sal. 22.7; 109.25. niyarqan: <<¡Katay! Templutapis juchuskasir kimsa junaqlata sharkasinaykipaq kashqanta nikarqa#Mar. 14.58; Juan 2.19. 30mä salvakur cruzpita urämuy ari>>.

31Saynölami mandaq cürakuna y ley yachasiqkunapis Jesústa asipäyashpan kikinpura niyarqan: <<Wakinta salvarpis kikinqa manami salvakuyta kamäpakunsu. 32Israel runakunapa mandaqnin rey Cristo karqa mä cruzpita urämusun. Urämuptinqa criyishunmi>>.

Saynölami Jesúspa nawpancho crucificaraykaq runakunapis ashliyarqan.

Jesús wanushqan

Mateo 27.45-56; Lucas 23.44-49; Juan 19.28-30

33Pulan junaqpita malway intiyaqmi pasa sakakurpurqan. 34Say hörami Jesús sinchipa nirqan: <<Eloi, Eloi, ¿lama sabactani?>>

Say ninanqa kaykan <<Tayta Dios, Tayta Dios, ¿imanirtaq kachariykamashkanki?>> ninanmi.#Sal. 22.1.

35Sayno nishqanta wiyarmi saycho kaykaq wakin runakuna niyarqan: <<Profëta Elíastami qayakuykan>>.

36Sayno niyaptinmi juk runa ras aywar pochquq vïnuman esponjata ushmarkasir shoqushpa puntanman watarqan. Sayta Jesúspa shiminman shoqunanpaq churaparmi#Sal. 69.21. nirqan: <<Mä rikashun cruzpita jorqunanpaq Elías shamunäkush>>.

37Saypitanami sinchipa qaparaskir Jesús päsarpurqan. 38Say hörami templu rurincho saparaq cortïna#Éxo. 26.31-33; 2Crón. 3.14. janapita urayaq rachikäkurirqan. 39Jesúspa nawpancho kaykaq capitanpis Jesús [qaparashqanta wiyar y] wanushqanta rikarmi nirqan: <<¡Rasunpaypami kay runaqa Diospa Surin kash!>>

40Saychömi warmikunapis karulapita rikaraykäyarqan. Paykunawanmi kaykäyarqan María Magdalena, Santiagupa y Josépa maman María y Salomépis. 41Say warmikunami Galileacho Jesús puriptin yanapar qatiräyarqan.#Luc. 8.2-3. Saynölami saycho kaykäyarqan Jesúswan Jerusalénman aywaq askaq warmikunapis.

Jesústa pampayashqan

Mateo 27.57-61; Lucas 23.50-56; Juan 19.38-42

42Jamay junaqpaq kamarikuyänan junaq tardina kaptinmi#15.42 Jamay junaqpaq kamarikuyänan junaqqa viernismi karqan. Israel runakunapaqqa jamay junaq qalaykun viernes las seis de la tardimi. 43Arimateapita kaq José Pilato kaqman aywaykur mana mansariypa nirqan: <<Jesúspa ayanta pampanäpaq kachapaykalämay>>.

José karqan Israel runakunapa autoridäninmi. Paypis Tayta Dios mandaykashqantami shuyaraykarqan.

44Sayno manakuptinmi Pilato yarpachakurqan <<¿wanushnasuraq?>> nishpan. Saymi wanushqanta musyananpaq capitanta qayasirqan. 45Mayna wanushqanta wilaptinmi Joséta awnirqan Jesúspa ayanta pampananpaq.

46Saymi lïnupita rurash säbanasta rantiykur Jesúspa ayanta cruzpita jorquskir piturqan. Nirkurmi qaqacho uchkush sepultüraman churaykur jatunkaray rumiwan punkuta saparqan. 47María Magdalena y Josépa maman María mayman sutaykuyashqantapis rikayarqanmi.

Currently Selected:

Marcos 15: qvhB

Highlight

Copy

Compare