Marcos 16

Wanushqanpita Jesús kawarimushqan

Mateo 28.1-8; Lucas 24.1-12; Juan 20.1-10

1Jamay junaq päsarkuptinnami María Magdalena, Santiagupa maman María y Salomépis mushkuq jachakunata rantiyarqan Jesúspa ayanman winapäyänanpaq. 2Saymi domingu tuta inti jeqaykämuptin Jesús pamparashqanman aywayarqan. 3Nänita aywarmi niyarqan: <<¿Piraq sepultüra saparaq rumita kichapämäshun?>>

4Chaykurnami tariyarqan sepultüra saparaq jatunkaray rumi witisishna kaykaqta. 5Saymi sepultüra rurinman yaykuskir rikayarqan juk maqta yuraq mödanash aluq kaqlächo jamaraykaqta. Payta rikaykurmi pasaypa mansakäyarqan. 6Saymi say maqta nirqan: <<Ama mansakäyaysu. Musyämi crucificaypa wanusiyashqan Jesústa rikaq shayämushqaykita. Pay manami kaychönasu. ¡Kawarimushnami! Maski rikayay mayman sutayashqantapis.

7<<Kananqa aywar Pedruta y wakin discïpulukunata wilayay Galileaman nawpaykashqanta. Nawpata nishqannölami saycho paykunawan tinkunqa>>.#Mat. 26.32; Mar. 14.28.

8Sayno niptinmi warmikuna mansariywan suksukyaykar jukla aywakuyarqan. Mansakäyashpanmi rikayashqankunata pitapis wilapäyarqansu.

María Magdalenata Jesús yuripashqan

Mateo 28.9-10; Juan 20.11-18

9[Domingu tuta Jesús kawarirkamurmi puntata yuriparqan María Magdalenata. Paypitami qanchis supaykunata nawpata qarqush karqan. 10Yuriparkuptinmi Jesúswan puriqkunata wilaq María Magdalena aywarqan. Chaykurmi lakish waqaykäyaqta tarirqan. 11<<Jesústa kawaykaqtami rikashkä>> nir wilaptinpis manami criyiyarqansu.

Ishkay discïpulunkunata Jesús yuripashqan

Lucas 24.13-35

12Saypitanami markapita aywaykäyaptin ishkay discïpulunkunata Jesús yuriparqan. Isanqa manami nawpata kashqannönasu karqan. 13Saypita kutiykurmi discïpulu mayinkunata Jesús yuripashqanta wilayarqan. Wilayaptin paykunatapis manami criyiyarqansu.

Wilakuyänanpaq discïpulunkunata Jesús kachashqan

Mateo 28.16-20; Lucas 24.36-49; Juan 20.19-23; Hechos 1.6-8

14Saypitanami chunka juk discïpulunkuna mikuykäyaptin Jesús yuriparkur nirqan: <<Yärakuyniynaq chukru shonqu runakuna, kawarimushqäta wilayäshuptiki ¿imanirtaq criyiyashkankisu?>>

15Saynöpis nirqan: <<Maysaypapis aywar lapan runakunata ali wilakuynïta wilapäyanki.#Mat. 28.19-20; Hech. 1.8. 16Mayqanpis criyir bautizakuq kaqqa salvakunqami. Mana criyiqkunami isanqa infiernuman qaykush kayanqa. 17Criyiqkunaqa milagrukunatapis rurayanqami. Jutïchömi supaykunatapis qarquyanqa y juk idiömakunatapis parlayanqa. 18Culebra picaptinpis, venënuta qarayaptinpis manami wanuyanqasu. Saynölami qeshyaykaqkunata yataykur Tayta Diosta manakuyaptinpis aliyäyanqa>>.

Jana pasaman Jesús kutishqan

Lucas 24.50-53; Hechos 1.9-11

19Discïpulunkunata parlapayta ushaskiptinmi Señor Jesústa gloriamanna Tayta Dios shuntakurqan.#Hech. 1.9. Saychömi Tayta Diospa aluq kaq nawpanman jamaykurqan. 20Saypitanami discïpulunkuna maysaychöpis wilakuyarqan. Kikin Señorninsimi yanaparqan milagrukunatapis rurayänanpaq. Sayta rikarmi runakuna tantiyakuyarqan say wilakuyashqan rasunpaypa kashqanta. Amén.]#16.20 Nawpa kaq griego copiakunacho versïculu 9-pita ushashqanyaqqa manami kansu.

Currently Selected:

Marcos 16: qvhB

Highlight

Copy

Compare