Josué 9

Gabaón runakuna Josuéta lulapäyashqan

1Heteo runakunapa, amorreo runakunapa, cananeo runakunapa, ferezeo runakunapa, heveo runakunapa y jebuseo runakunapa mandaqnin reykunami musyayarqan wakin markakunata Israel runakuna ushakäsiyashqanta. Say reykunaqa täyarqan jalqakuna kashqan partipa, Sefelapa y Mediterráneo Lamar kuchunpa hasta Líbanuyaqmi. Lapan say partikuna kayarqan Jordán mayu simpan inti jeqanan kaqläpami. 2Say reykunami wilanakuyarqan Josuéta y Israel runakunata atacayänanpaq.

3Gabaóncho taq runakunami Jericó markata y Hai markata Josué ushakäsishqanta musyar 4lulapäyänanpaq yarpachakuyarqan. Saymi Josué kaqman kachakunata kachayarqan. Paykunami ruku costalninkunata y qarapita rurash makwa y remendash vïnu winakuyänankunata ashnunkunaman chaqnakurkur#9.4 Wakin runakunaqa cargakurkur niyanmi. aywayarqan. 5Saynölami makwa lanqinkunata y remendash mödanakunatapis jatikuyarqan. Nirkurnami mirkapakuyarqan mupalish chukru tantakunata. 6Gilgal campamentuman chaykuyashpanmi Josuéta y Israel runakunata niyarqan: <<Qamkunawan ali kawanansipaqmi seqaypa karupita pactu ruraq shayämushkä>>.

7Sayno niyaptinmi Israel runakuna heveo runakunata niyarqan: <<Qamkuna capazchir cercalachöpis täyanki. Cercacho täyaptikiqa pactuta ama rurashunsu>>.#Éxo. 23.32; 34.12; Deut. 7.2; 20.15-16.

8Niptinpis Josuéta niyarqan: <<Noqakuna munashqaykitachir rurayäshaq>>.

Saymi Josué tapurqan: <<¿Maypitataq kayanki? ¿Mayqan ayllu runakunataq kaykäyanki?>>

9Sayno tapuptinmi niyarqan: <<Tayta Diosniki Egipto runakunata imano castigashqantapis musyaykurmi karupita shayämushkä. 10Saynöpis musyayashkämi Jordán mayu wak simpancho taq amorreo runakunapa ishkay mandaqnin reykunata imano ushakäsishqantapis.#Núm. 21.21-35. (Paykuna kayarqan Hesbón markapa mandaqnin rey Sehón y Basán partipa mandaqnin rey Og. Astarotchömi rey Og tarqan.) 11Saynöpami autoridänïkunawan marka mayïkuna kachayämash kayno nir: <Mirkapaykikunata rurakurkur Israel runakunaman aywar niyanki: <<Noqakuna ashmaynikikunami kaykäyä. Kanan pactuta rurashun ali kawanansipaq>> >. 12Niyämashqannölami shayämushkä. Markäkunapita yarqamur mirkapäkunapaq kay tantakunata akaykaqlatami qepikayämurqä. Kananqa mupalish y chukrushnami kaykäyan. 13Kay qarakunamanpis mushuqmanmi vïnuta winakayämurqä. Kananqa rachir ushashnami kaykäyan. Sayjina karuta shayämuptïmi mödanäkunapis lachapayashna y lanqïkunapis pasaypa makwayashna kaykäyan>>.

14Sayno niyaptinmi apayashqanta rikaykur Israel runakuna criyiyashpan mikuyarqan. Isanqa rasunpa karupita kayashqanta musyayänanpaq Tayta Diosta manami tapukuyarqansu. 15Saynöpami Josué paykunata promitirqan mana wanusinanpaq. Nirkurmi Israel mayor runakuna Tayta Diospa jutincho promitiyarqan say pactuta cumpliyänanpaq.

16Saypita kimsa junaqtanami Israel runakuna musyayarqan Gabaón runakuna cercalacho täyashqanta. 17Sayta musyaykur ashiq aywayashpanmi kimsa junaq aywaycho tariyarqan Gabaón runakunapa markankunata. Paykunapa markankunami karqan Gabaón, Cafira, Beerot y Quiriat-jearim. 18Saycho tarirpis yärakuyashqan Tayta Diospa jutincho autoridäkuna promitish kayaptinmi wanusiyarqansu.

Gabaón runakunawan pactuta rurayashqanpitami Israel runakuna autoridäninkunapa contran rimayarqan. 19Saymi autoridäkuna niyarqan: <<Noqakuna Tayta Diospa jutincho jurarmi mana wanusinansipaq promitiyashkä. Saymi kanan ima ruraytapis kamäpakunsisu. 20Sayno kaykaptinqa ama wanusishunsu. Jurayashqäta mana cumpliyaptïqa Tayta Diospis fiyupami rabyakunqa>>.

21Saynömi niyarqan mana wanusiyänanpaq. Nirkurmi Gabaón runakunata churayarqan Israel runakunapaq yantata yantakayämunanpaq y yakuta apapäyänanpaq. Saynöpami Gabaón runakunawan pactu rurayashqanta autoridäkuna cumpliyarqan.

22Gabaón runakunata qayaykasirmi Josué nirqan: <<Kay cercalacho taykarqa ¿imanirtaq <karupitami shayämushkä> nir lulapäyämashkanki? 23Sayno lulapäyämashqaykipitami Tayta Dios churayäshunki imaypis ashmaykuna kayänaykipaq. Kananpitaqa Tayta Diosnïpa wayinman yantata y yakutami apayämunki>>.

24Sayno niptinmi Josuéta niyarqan: <<Sirviqnin Moiséstashi Tayta Diosniki ninä kay nacioncho taq lapan runakunata wanusiyämänaykipaq kashqanta. Saymi wanuyta mansakuyashpä lulapäyashkä, taytay. 25Kananqa makikicho chakikichömi kaykäyä. Niyämashqaykitami imatapis rurayäshaq>>.

26Saynöpami Gabaón runakunata Josué salvarqan Israel runakuna wanusiyänanpaq kaqpita. 27Say junaqmi Gabaón runakunata churarqan Israel runakunapaq imaypis yantata yantakayämunanpaq y yakuta apapäyämunanpaq. Saynölami churarqan Tayta Diospa altarninpaqpis yantata y yakuta apapäyämunanpaq. Kananyaqpis saynölami ruraykäyan.

Currently Selected:

Josué 9: qvhB

Highlight

Copy

Compare