Josué 10
10
Amorreo runakunata ushakäsiyashqan
1Jerusalén markapa mandaqnin rey Adonisedecmi mayarqan Jericó markata y mandaqnin reyta ushakäsishqannöla Hai markata y mandaqnin reytapis Josué ushakäsishqanta. Saynöpis mayarqan Gabaón runakunawan ali kawayänanpaq Israel runakuna pactu rurayashqanta. 2Gabaón markaqa Hai markapitapis mas jatun karmi rey tashqan markano karqan. Saycho taq runakunapis pelyayta yachaqmi kayarqan. Saymi Israel runakuna atacayaptin Gabaón runakuna yanapäyänanpaq kashqanta yarpar Adonisedec y Jerusaléncho taq runakunapis pasaypa mansariyarqan.
3Saymi Jerusalén markapa mandaqnin rey Adonisedec propiuta kacharqan Hebrónpa mandaqnin rey Hohamman, Jarmutpa mandaqnin rey Pireamman, Laquispa mandaqnin rey Jafíaman y Eglónpa mandaqnin rey Debirman. Chaykurmi kacha aywaq runakuna niyarqan: 4<<Gabaón runakunami Israel runakunawan y mandaqnin Josuéwan ali kawayänanpaq pactuta rurayash. Sayno kaptin Gabaón runakunata ushakäsinansipaq shamur yanapaykayälämay>>.
5Sayno niptinmi Jerusalén markapa, Hebrón markapa, Jarmut markapa, Laquis markapa y Eglón markapa pisqan mandaqninkuna soldädunkunawan shuntakar aywayarqan Gabaón markata ushakäsiyänanpaq. Say reykunaqa amorreo runakunapa mandaqnin reykunami kayarqan.
6Sayta musyaykurmi Gabaón markacho taq runakunapis propiuta Gilgalman kachayarqan Josuéta ruwakur niyänanpaq: <<Jalqakunacho taq amorreo runakunapa mandaqnin reykunami ushakäsiyämänanpaq soldädunkunawan shuntakäyämush. Ashmaynikikuna kaykäyaptïqa mana ushakäsiyämänanpaq jukla shamur yanapaykayälämay>>.
7Sayno niyaptinmi Gilgalpita jukla Josué aywarqan lapan geniu soldädunkunata pushakurkur. 8Aywaykäyaptinmi Josuéta Tayta Dios nirqan: <<Gabaón markata atacaq runakunata ama mansaysu. Ichipäyänaykipaq yanapaptï manami mayqanpis ichipäyäshunkisu>>.
9 Tayta Dios sayno niptinmi Gilgalpita warati aywaykur elaqpita amorreo runakunata Israel runakuna atacayarqan. 10Sayno atacayaptinmi amorreo runakunapa shonqunkunaman pasaypa mansariyta Tayta Dios churarqan. Saynöpami Israel runakuna saysika runakunata Gabaóncho wanusiyarqan. Wakintanami qeshpiykäyaqta qatipaykur Bet-horónpa aywaq nänicho wanusiyarqan. Bet-horónpitanami wakintapis Azecayaq y Macedayaq wanusiyarqan. 11Amorreo runakuna Bet-horónpita uraypa Azecayaq qeshpiykäyaptinmi rumi sikasaq runtu tamyata Tayta Dios tamyasimurqan. Say tamyawanmi Israel runakuna espädawan wanusiyashqanpitapis mas askaq wanuyarqan.
12Amorreo runakunata ushakäsiyänanpaq Tayta Dios yanapashqan junaqmi lapan Israel runakunapa nawpancho Tayta Diosta manakur Josué nirqan: <<Gabaón marka janancho intita takyaykäsiy. Saynöpis Ajalón pampa janancho killatapis takyaykäsiy>>.
13Josué Sayno manakuptinmi intipis killapis kuyukuyarqansu contrankunata Israel runakuna wanusir ushayashqanyaq. Jaser libruchöpis#10.13 Jaser libruqa manami Bibliasu kaykan, sinöqa juk librumi. Say libruqa unaynami oqrakash (2Sam. 1.18). sayno päsashqanmi qelqaraykan. Pulan ciëluchömi cäsi juk junaq inti takyaräkurqan. 14Say junaq intita takyasishqannöqa manami pï runa manakuptinpis Tayta Dios takyasishsu. Say junaqmi Israel runakunata Tayta Dios yanaparqan contrankunata ushakäsiyänanpaq.
15Saypitanami Josuéwan Israel runakuna kutiyarqan Gilgalcho campamentunman.
Pisqan reykunata Josué wanusishqan
16Amorreo runakunapa pisqa mandaqnin reykunami qeshpir Macedacho kaykaq machayman pakakuykuyarqan. 17Machaycho pakaraykäyashqanta wilayaptinmi 18Josué nirqan: <<Jatusaq rumikunawan machay punkuta sapaykur täpayänanpaq runakunata churayay. 19Mana täpaq kaqkunaqa contransi runakunata qatipaykur wanusiyay. Tayta Diosninsi makinsiman churaykämuptinqa markankunaman mana kutiyänanpaq lapanta wanusir ushayay>>.
20Saymi amorreo runakunata Josuéwan Israel runakuna vinciyashpan askata wanusiyarqan. Juk ishkaylanami qeshpir corralash markankunaman amparakuyarqan. 21Sayyaqmi Josué shuyararqan Macedacho kaykaq campamentucho. Lapanta wanuykasirnami Israel runakuna yamayla kutiyarqan Josué kaqman. Saypitaqa mananami pipis Israel runakunapa contran parlarqansu.
22Lapan chaykuyaptinmi Josué nirqan: <<Machay punkuta kichaskir pisqan reykunata apayämuy>>.
23Sayno niptinmi machaypita jipiyämurqan Jerusalén markapa, Hebrón markapa, Jarmut markapa, Laquis markapa y Eglón markapa mandaqnin reykunata. 24Chaykasiyaptinnami Israel runakunata qayaykasir mandaq soldädukunata Josué nirqan: <<Kay reykunata kunkanpita jaruyay>>.
Saymi nishqannöla rurayarqan. 25Nirkurmi Josué nirqan: <<Tayta Dios kanan junaq ushakäsishqannölami lapan contransikunata ushakäsinqa. Sayno kaykaptinqa pitapis ama mansayaysu>>.
26Saypitanami Josuéqa say reykunata wanuykasir ayanta tardiyaq qerucho warkuräsirqan. 27Inti jeqaykaptinnami qerukunacho warkuraykaqta jorqaskasir pakakuyashqan machaylaman jitaykasirqan. Nirkurmi jatunkaray rumikunawan punkuta sapaykasirqan. Sayqa kananyaqpis kaykanmi.
Wakin markakunata Israel runakuna ushakäsiyashqan
28Maceda markacho taq runakunata y mandaqnin reytapis say junaqlami soldädunkunawan aywar espädawan Josué wanusir ushayarqan. Jericócho taq runakunata y mandaqnin reyta wanusiyashqannömi saycho taq runakunatapis lapanta wanusir ushayarqan.
29Saypitanami Israel runakunawan Josué aywaykur Libna markata atacayarqan. 30Saychöpis vinciyänanpaq Tayta Dios yanapaptinmi saycho taq runakunata y mandaqnin reyta asulayarqan. Jericócho taq runakunata y mandaqnin reyta wanusiyashqannömi saycho taqkunatapis wanusir ushayarqan.
31Libnapitanami Israel runakunawan Josué Laquis markaman aywarqan. Nirkurmi cercancho campamentunkunata ruraykur atacaq yaykuyarqan. 32Atacayashqanpita juk junaqtami Laquis markacho taq runakunata y mandaqnin reytapis Israel runakunapa makinkunaman Tayta Dios churarqan. Saymi saycho kaqtaqa Libnacho rurayashqannöla lapan runakunatapis uywakunatapis Israel runakuna wanusiyarqan. 33Atacaykäyashqanta musyaykurmi Gezer markapa mandaqnin rey Horam soldädunkunawan aywayarqan Laquischo taqkunata yanapäyänanpaq. Jina kaqtami Josuépa soldädunkunaqa lapanta wanusiyarqan.
34Laquis markapitanami Josuéqa Israel runakunawan Eglón markaman aywayarqan. Cercancho campamentunkunata ruraykurmi paykunatapis atacayarqan. 35Laquischo runakunatawan uywakunata wanusir ushayashqannölami saychöpis say junaqla lapanta espädawan wanusir ushayarqan.
36Eglón markapitanami Israel runakunawan Josué aywar Hebrón#Jos. 15.13; Jue. 1.10. markata atacayarqan. 37Say markachöpis Eglón markacho ushayashqannölami lapanta espädawan wanusir ushayarqan. Saymi reyta, markacho taq runakunata y caseriunkunacho taq runakunatapis wanusiyaptin pipis karqannasu.
38Saypita aywarnami Debir#Jos. 15.15; Jue. 1.11. markatana Israel runakunawan Josué atacayarqan. 39Saychöpis Hebróncho y Libnacho wanusir ushayashqannölami Debir markapa mandaqnin reyta, saycho taq runakunata y caseriunkunacho taq runakunatapis lapanta espädawan wanusir ushayarqan.
40Yärakuyashqan Tayta Dios nishqannölami Israel runakunawan Josué wanusir ushayarqan jalqakunacho taq runakunata y mandaqnin reykunata, Neguevcho taq runakunata y mandaqnin reykunata, Sefelacho taq runakunata y mandaqnin reykunata y Jordán mayu pampakunaman aywaq bajädacho taq runakunata y mandaqnin reykunatapis.#Jue. 1.9. Saymi paykuna täyashqanqa lapanpis Israel runakunapaqna karqan. 41Say runakunatami wanusir ushayarqan Cades-barneapita Gazayaq y Gosénpita Gabaónyaq. 42Israel runakuna yärakuyashqan Tayta Dios yanapaptinmi campamentuman mana kutiylapa lapan say runakunata ushakäsiyarqan. 43Saypitanami Gilgalcho kaykaq campamentuman Israel runakunawan Josué kutikuyarqan.
Currently Selected:
Josué 10: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
