Josué 14

Inti jeqanan kaqläpa posisionta aypuyashqan

1Cüra Eleazar, Nunpa surin Josué y Israel runakunapa mandaqninkunami Israel runakunapa wakin trïbunkunata Canaáncho posisionninkuna aypuyarqan#Núm. 34.16-29. 2Say esqun trïbu y mas pulan trïbu runakunami Moisésta Tayta Dios nishqannöla suertita jitaypa posisionninkuna chaskiyarqan.#Núm. 26.52, 56; 34.13. 3Rubén trïbu runakunata, Gad trïbu runakunata y pulan Manasés trïbu runakunatami posisionta Moisés aypurqan Israel runakuna Jordán mayuta manaraq simpäyaptin.#Núm. 32.33; 34.14-15; Deut. 3.12-17. Leví trïbu runakunataqa manami posisionta aypurqansu. 4Mana aypuptinpis wakin trïbukunapa posisionninchömi markakunata y chakrakunata chaskiyarqan uywankunata misikur täyänanpaq. Josépita miraq ishkay trïbukunami Manasés trïbu y Efraín trïbu kayarqan. 5Saymi Israel runakuna posisionta aypunakuyarqan Moisésta Tayta Dios nishqannöla.

Posisionninpaq Hebrón partita Caleb chaskishqan

6Gilgalcho Josué kaykaptinmi Judá trïbu runakunawan aywar cenezeo runa Jefonipa surin Caleb Josuéta nirqan: <<Musyankimi Cades-barneacho kaykash#Núm. 14.30. Tayta Dios sirviqnin Moisésta noqansipaq imata nishqantapis. 7Canaánta rikapakuq Tayta Diospa sirviqnin Moisés Cades-barneapita kachamaptinsi chusku chunka (40) watayuqmi kaykarqä. Kutiykurmi Israel runakunata wilarqä kay parti imano kashqantapis.#Núm. 13.30. 8Aywaq mayinsikuna runakunata mansakäsir wilapäyaptinpis noqaqa Tayta Diosman lapan shonqüwan yärakurmi runakunata shakyäsirqä kay nacionman yaykamunansipaq. 9Saymi Tayta Diospa jutincho promitimashpan Moisés nimarqan: <Tayta Diosman yärakur payta cäsukushqaykipitami Canaáncho purishqayki partikuna qampaq y qampita miraqkunapaq imayyaqpis kanqa>.#Núm. 14.24.

10<<Moisés sayno nimarqan chusku chunka pisqa (45) wata qepatanami. Sunyaq jirkapa purishqapis Tayta Dios promitimashqannömi shumaq yanapämash kananyaqpis sänu kanäpaq. Kananqa puwaq chunka pisqa (85) watayuqnami kaykä. 11Moisés rikapakuq kachamashqansi wisannölami kananpis kalpä kaykan. Nawpata pelyashqäno kananpis pelyämanraqmi. 12Saymi qamta ruwakü Tayta Dios promitimashqan jalqakunata qoykamänaykipaq. Rikapakuq sayman aywar tarirqansi anaceo jatusaq runakuna saycho taykäyaqtami. Markankunapis jatusaq y junaqyaq perqashqami kayarqan. Sayno kaptinpis Tayta Dios promitimashqanno yanapämaptinqa qarqushaqmi>>.

13Sayno manakuptinmi Jefonipa surin Calebta bendicionninta qor Hebrón partita Josué qoykurqan posisionnin kananpaq. 14Saynöpami Hebrónqa cenezeo runa Jefonipa surin Calebpa y paypita miraqkunapa posisionnin kananyaqpis kaykan. Sayno posisionnin karqan Israel runakuna yärakuyashqan Tayta Diosta cäsukushqanpitami.

15Hebrónpa unay kaq jutinqa Quiriat-arbami karqan. Sayno jutin karqan Arba jutiyuq runa saycho tashqanpitami. Payqa jatusaq anaceo runakunacho reqishqami karqan.

Saypitaqa guërra manana kaptin Israel runakuna jawkanami kawakuyarqan.

Currently Selected:

Josué 14: qvhB

Highlight

Copy

Compare