Josué 15

Judá trïbu runakunapa lindërunkuna mayninpa kashqanpis

1Judá trïbu runakuna ayllunpa ayllunpa posisionta suertita jitaypa chaskiyashqanqa Edom nacionpa lindërunyaqmi chärarqan. Sur kaqläpami Zin niyashqan sunyaq jirkayaq chärarqan. 2Sur kaqläpa lindërunqa Kachi Lamarpa ura kuchunpitami qalaykurqan. 3Saypita Acrabim cuestapa päsarmi Zin niyashqan sunyaq jirkaman chärarqan. Saypa päsarnami Cades-barnea sur kaqläpa aywararqan hasta Hezrónyaq. Saypitami wisaypana Adaryaq aywar Carcáyaq tumararqan. 4Carcápitanami päsararqan Asmónman. Asmónpa päsarmi Egipto raqrayaq chärarqan. Saypitanami lindërun chärarqan Mediterráneo Lamaryaq. Saynömi lindërun karqan sur kaqläpa.

5Inti jeqamunan kaqläpanami lindërun karqan Kachi Lamar kuchulanpa hasta Jordán mayuman chashqanyaq. Saypitaqa norti kaqläpanami lindërun qalaykurqan.

6Norti kaq lindërun wisaypa aywarar chärarqan Bet-hoglayaqmi. Saypitami Bet-arabápa norti kaqläpa päsar Bohán Ben-Rubén qaqaman chärarqan. 7Saypita Acor Pampapa päsar Debirman chashpan Gilgalmanmi tumararqan. Gilgalqa Adumínpa sur kaq simpanchömi karqan. Saypita lindërun En-semescho pukyu kaykaqpa päsar En-rogel pukyuyaqmi aywararqan. 8Saypitami jebuseo runakuna täyashqan sur kaqläpa päsar Ben-hinom raqrapa päsararqan. Saychöqa Jerusalénmi kaykan. Ben-hinom raqrapita wisaypana aywararmi löma jananyaq chärarqan. Say lömaqa Jerusalénpita inti jeqanan kaqläpami kaykan. Saypitanami lindërun chärarqan Refaim pampa norti kaq kuchunyaq. 9Saypa päsar löma jananpitaqa lindërun uraraykarqan Neftoacho yaku pashtaq pukyuyaqmi. Saypita päsarmi Efrón jalqakunacho kaykaq markakunayaq chärarqan. Saypitami tumararqan Baala markapa. Baalapa jukaq jutimi Quiriat-jearim karqan. 10Baalapita päsarmi inti jeqanan kaqläpa tumararqan Seir jalqakunapa. Saypitami Jearim jalqakuna norti kaqlächo kaykaq Quesalónpa päsar uraypana aywararqan Bet-semespa Timnaman chashqanyaq. 11Saypitami Ecrón marka norti kaqlä lömapa chaykur tumararqan Sicrónpa y Baala jalqakunapa. Saypita Jabneelpa päsar Mediterráneo Lamarmanmi tinkurqan.

12Inti jeqanan kaqläpami Mediterráneo Lamar kuchulanpa lindërun aywararqan.

Saynömi Judá trïbu runakuna ayllunpa ayllunpa chaskiyashqan posisionpa lindërunkuna karqan.

Hebrónta y Debirta Caleb qechushqan

Jueces 1.10-15

13 Tayta Dios nishqannölami Jefonipa surin Calebta Josué posisionta aypurqan Judá trïbu runakunapa posisionnincho. Saynöpami Caleb chaskirqan Quiriat-arbata. Say markata sharkasiq Arba jutiyuq runapitami anaceo runakuna mirayarqan. Quiriat-arbapa jukaq jutinmi Hebrón kaykan. 14Anaceo runakuna kayarqan Sesai ayllu, Ahimán ayllu y Talmai ayllumi. Say kimsa ayllu anaceo runakunatami markankunapita Caleb qarqurqan.#Jue. 1.20.

15Saypitanami Debircho taq runakunata atacayänanpaqna yaykuyarqan. Say markapa unay jutinmi karqan Quiriat-sefer. 16Saymi Caleb nirqan: <<Pipis say markaman pelyaq yaykur vinciq kaqtami warmi surï Acsawan täsishaq>>.

17Sayno niptinmi Cenazpa surin Otoniel say markaman yaykur saycho taqkunata vincirqan. Sayno vinciykuptinnami Calebqa surin Acsawan täsirqan. Otonielqa karqan Calebpa shulka wawqinpa surinmi.

18Papäninpa wayinpita yarquykäyashqanchönami warmin Acsata Otoniel nirqan: <<Papänikita ruwakamuy chakrata rikasimänansipaq>>.

Saymi ashnunpita Acsa urarkuptin papänin Caleb tapur nirqan: <<¿Imatataq munaykanki, hïja?>>

19Tapuptinmi Acsa nirqan: <<Ruwakuläshayki, papä. Neguevcho chakrata rikasimashqaykinöla pukyuyuq chakrakunatapis qaraykalämay>>.

Sayno niptinmi papänin rikasirqan jana tuman pukyuyuq chakrata y ura tuman pukyuyuq chakratapis.

Judá trïbu runakuna chaskiyashqan markakuna

20Judá trïbu runakuna ayllunpa ayllunpa posisionta chaskiyashqan markakuna kaykunami karqan: 21Sur kaqläpa aywar Edom nación cercancho kaq markankuna karqan Cabseel, Edar, Jagur, 22Cina, Dimona, Adada, 23Cedes, Hazor, Itnán, 24Zif, Telem, Bealot, 25Hazor-hadata, Queriot, Hezrón (Hezrónpa jukaq jutinmi karqan Hazor), 26Amam, Sema, Molada, 27Hazar-gada, Hesmón, Bet-pelet, 28Hazar-sual, Beerseba, Bizotia, 29Baala, Iim, Esem, 30Eltolad, Quesil, Horma, 31Siclag, Madmana, Sansana, 32Lebaot, Silhim, Aín y Rimón. Say markakuna ishkay chunka esqunmi (29) caseriunkunawan karqan.

33Inti jeqanan kaqlä Sefelachömi Judá trïbu runakunapa markankuna karqan Estaol, Zora, Asena, 34Zanoa, En-ganim, Tapúa, Enam, 35Jarmut, Adulam, Soco, Azeca, 36Saaraim, Aditaim, Gedera y Gederotaim. Say markakuna chunka chuskumi caseriunkunawan karqan.

37Say particho wakin kaq markakunapis karqan Zenán, Hadasa, Migdal-gad, 38Dileán, Mizpa, Jocteel, 39Laquis, Boscat, Eglón, 40Cabón, Lahmam, Quitlis, 41Gederot, Bet-dagón, Naama y Maceda. Say markakuna chunka soqtami caseriunkunawan karqan.

42Saynöpis wakin markakuna karqan Libna, Eter, Asán, 43Jifta, Asena, Nezib. 44Keila, Aczib y Maresa. Say markakuna esqunmi caseriunkunawan karqan.

45Judá trïbu runakunaqa caseriunkunatawanmi Ecrón markatapis chaskiyarqan. 46Ecrónpita Mediterráneo Lamaryaq aywar Asdod nawpancho kaykaq markakunapis Judá trïbu runakunapami karqan.

47Asdod markapis, Gaza markapis y lapan caseriunkunapis Judá trïbu runakunapami karqan. Mediterráneo Lamar kuchunpa aywashpan Egipto raqrayaq char lapan saycho kaq markakunawan caseriukuna Judá trïbu runakunapami karqan.

48Jalqakuna kashqan partichöqa Judá trïbu runakunapa markankuna karqan Samir, Jatir, Soco, 49Dana, Quiriat-sana (Quiriat-sanapa jukaq jutinmi karqan Debir), 50Anab, Estemoa, Anim, 51Gosén, Holón y Gilo. Say markakuna chunka jukmi caseriunkunawan karqan.

52Say particho kaykaq wakin markakuna karqan Arab, Duma, Esán, 53Janum, Bet-tapúa, Afeca, 54Humta, Quiriat-arba (Quiriat-arbapa jukaq jutinmi karqan Hebrón) y Sior. Say markakuna esqunmi caseriunkunawan karqan.

55Saynöpis karqan Maón, Carmel, Zif, Juta, 56Jezreel, Jocdeam, Zanoa, 57Caín, Gabaa y Timna. Say markakuna chunkami caseriunkunawan karqan.

58Saynöpis karqan Halhul, Bet-sur, Gedor, 59Maarat, Bet-anot y Eltecón. Say markakuna soqtami caseriunkunawan karqan.

60Saynöpis Judá trïbu runakunapami karqan Quiriat-baal (Quiriat-baalpa jukaq jutinqa karqan Quiriat-Jearimmi) y Rabá. Say markakuna ishkaymi caseriunkunawan karqan.

61Sunyaq jirkachöpis Judá trïbu runakunapa markankuna karqan Bet-arabá, Midín, Secaca, 62Nibsán, Kachi Marka y En-gadi. Say markakuna soqtami caseriunkunawan karqan.

63Judá trïbu runakuna manami qarquyta kamäpakuyarqansu Jerusaléncho taykaq jebuseo runakunata. Kananyaqpis jinalami jebuseo runakunaqa Judá trïbu runakuna kaqcho taykäyan.#Jue. 1.21; 2Sam. 5.6; 1Crón. 11.4.

Currently Selected:

Josué 15: qvhB

Highlight

Copy

Compare