Josué 13

Yaykuyänanpaq kaq partikuna maypa maypa kashqanpis

1Josué pasaypa awkinna kaykaptinmi Tayta Dios nirqan: <<Pasaypa awkinnami kaykanki. Qechuypaq kaq partikuna askaraqmi kaykan. 2Jinalaraqmi qechuypaq kaykan filisteo runakuna y gesureo runakuna täyashqan partikuna. 3Say qechuypaq kaq partikuna kaykan Sihor mayupita cananeo runakuna täyashqan Ecrónpa lindërunyaqmi. Sihor mayu Egiptupa lindërunpami päsaykan. Saynöpis kaykanraqmi filisteo runakunapa pisqa mandaqnin täyashqan markakuna. Say markakuna kaykäyan Gaza, Asdod, Ascalón, Gat y Ecrón. Saynöpis manaraqmi qechushkankiraqsu aveo runakuna täyashqan partikunata. 4Say parti kaykan sur kaqläpami. Saynöpis manami qechushkankiraqsu cananeo runakuna täyashqan partikunata. Say partikuna kaykan Sidón runakuna täyashqan Meharapita Afecyaqmi. Afecqa amorreo runakuna täyashqan lindërunchömi kaykan. 5Saynöpis manami qechushkankiraqsu giblita runakuna täyashqan partikunata y lapan Líbanuta Baal-gadpita Hamatman yaykunayaq. Say kaykan inti jeqamunan kaqläpami. Baal-gadqa Hermón punta chakinchömi kaykan. 6Israel runakuna yaykuyaylantami qarqushaq Sidón runakunata y jalqakunacho taq runakunatapis Líbanupita pasa Misrefot-maimyaq. Nirkur noqa nishqänöla Israel runakunata say partikunata aypunki posisionninkuna kananpaq. 7Esqun trïbukunatawan pulan Manasés trïbuta posisionninta aypurqa lapan say partikunata aypunki>>.

Jordán mayu simpancho lindërunkuna mayninpa kashqanpis

8Jordán mayu simpan inti jeqamunan kaqläpami Rubén trïbu runakuna, Gad trïbu runakuna y pulan Manasés trïbu runakuna posisionta puntata chaskiyarqan. Saykunataqa Tayta Diospa sirviqnin Moisésmi aypurqan.#Núm. 32.33; Deut. 3.12. 9Paykunapa posisionninkuna karqan Arnón mayu nawpancho kaykaq Aroerpita y Arnón raqracho kaykaq markapita hasta Dibónyaqmi. Saynöpis posisionnin karqan lapan Medeba pampa 10y Hesbóncho taq rey Sehón mandashqan lapan markakuna hasta amonita runakunapa lindërunyaqmi. Sehónqa amorreo runakunapa mandaqnin reymi karqan. 11Saynöpis posisionnin karqan Galaad parti, gesureo y maacateo runakuna täyashqan partikuna, Hermón jirka aywaq jalqakuna y Basán partipis hasta Salcayaqmi. 12Saynöpis posisionnin karqan Basán partipa rey Og mandashqankunapis. Og tarqan Astarotcho y Edreichömi. Paylanami refaíta runa kaykarqan. Og mandashqan runakunata wanurkasirmi markankunata Moisés qechurqan. 13Gesurcho y Maacacho taq runakunatami isanqa qarqurqansu. Saymi kananyaqpis Israel runakunawan taykäyan.

14Moisés manami ima posisiontapis Leví trïbu runakunata aypurqansu. Saypa trukanqa Tayta Dios nishqanno paykunapaq karqan Israel runakuna apayashqan sacrificiukunalami.#Deut. 18.1-8; Jos. 13.33.

Rubén trïbu runakunapa lindërunkuna mayninpa kashqanpis

15Rubén trïbu runakunata ayllunpa ayllunpa Moisés aypuptinmi 16posisionnin karqan Arnón mayu nawpancho kaykaq Aroer marka, Arnón raqracho kaykaq marka y lapan Medeba pampapis hasta 17Hesbónyaq. Saynöpis posisionnin karqan say pampacho kaykaq markakuna. Say markakuna karqan Dibón, Bamot-baal, Bet-baal-meón, 18Jahaza, Cademot, Mefaat, 19Quiriataim, Sibma, Zaret-sahar (Zaret-saharqa pampacho kaykaq lömachömi kaykan), 20Bet-peor y Bet-jesimotpis. Saynöpis posisionnin karqan Pisga niyashqan punta chakin tunakunami. 21Saynöpami Rubén trïbu runakunapa posisionnin karqan intëru pampacho kaykaq markakuna y Hesbóncho taq rey Sehón lapan mandashqan markakuna. Sehón karqan amorreo runakunapa mandaqnin reymi. Paytawan paypa munaynincho kaykaq madianita runakunapa mandaqninkunatami Moisés wanusirqan. Say mandaqkuna kayarqan Evi, Requem, Zur, Hur y Reba. 22Paykunawan pelyar aska runakunatami Israel runakuna wanusiyarqan. Saychömi Beorpa surin adivinaq Balaamtapis wanusiyarqan. 23Rubén trïbu runakunapa posisionninpa lindërun karqan Jordán mayu kuchulanpami. Say markakunatawan caseriukunata Rubén trïbu runakunami ayllunpa ayllunpa chaskiyarqan.

Gad trïbu runakunapa lindërunkuna mayninpa kashqanpis

24Gad trïbu runakunatapis ayllunpa ayllunpa Moisés aypuptinmi 25posisionnin karqan Jazer, Galaad particho kaykaq lapan markakuna y pulan amonita runakunapa markankunapis hasta Rabá simpancho kaykaq Aroeryaq. 26Saynöpis posisionnin karqan Hesbónpita hasta Ramat-mizpayaq y Betonimyaq y Mahanaimpita hasta Debiryaqmi. 27Jordán mayu nawpan pampakunachöpis posisionnin karqan Bet-aram, Bet-nimra, Sucot, Zafón y Hesbóncho taq Sehón mandashqan wakin markakunapis. Lindërunmi Jordán mayu kuchulanpa aywararqan hasta Cineret qocha kuchunyaqmi. Lapanpis karqan Jordán mayu inti jeqamunan kaqläpami. 28Say markakunatami caseriukunatawan Gad trïbu runakuna ayllunpa ayllunpa chaskiyarqan.

Pulan Manasés trïbu runakunapa lindërunkuna mayninpa kashqan

29Pulan Manasés trïbu runakunatapis ayllunpa ayllunpa Moisés aypuptinmi 30posisionnin karqan Mahanaimpita norti kaqläpa. Saymi karqan Basán partipa mandaqnin rey Og mandashqankuna, Jairpita miraq runakuna qechuyashqan soqta chunka (60) markakuna#Núm. 32.41. y Basáncho wakin markakunapis. 31Saynöpis posisionnin karqan pulan Galaad y Basán nacionpa mandaqnin rey Og tashqan Astarotwan Edrei markakunami. Saykuna kayarqan pulan Manasés trïbu runakuna ayllunpa ayllunpa chaskiyashqan posisionmi. Say runakuna kayarqan Manaséspa surin Maquirpita miraq runakunami.

32Lapan say posisionkunatami Moisés aypurqan Jordán mayuta manaraq päsar Jericó simpan Moab pampakunacho kaykar. 33Leví trïbu runakunatami isanqa ima posisiontapis aypurqansu. Saypa trukanqa Israel runakuna yärakuyashqan Tayta Diosmi nirqan: <<Kikïmi qamkunapa herenciayki kaykä>>.#Núm. 18.20; Deut. 18.2.

Currently Selected:

Josué 13: qvhB

Highlight

Copy

Compare