Jueces 9

Israel runakunapa jueznin Abimelec kashqan

1Juk junaqmi Jerobaalpa surin Abimelec aywarqan Siquem markaman tiyunkunawan y ayllunkunawan parlaq. Chaykurmi paykunata nirqan: 2<<Musyayashqaykinöpis aylluykikunami kaykä. Saymi ruwakü marka mayinsikunata shuntaykur kayno niyänaykipaq: <Jerobaalpa qanchis chunka (70) surinkuna mandamaqninsi kayänanpa trukanqa mas alimi kanman Abimelec japalan mandamaqninsi kaptin> >>.

3Abimelec nishqannölami marka mayinkunata tiyunkuna parlapäyarqan. Marka mayin kashqanta niyaptinmi lapanpis wilanakuyarqan paykunapa mandaqnin Abimelec kananpaq. 4Sayno wilanakurmi Baal-beritpa templunpita qanchis chunka (70) qellayta jorquskir Abimelecta aptapäyarqan. Say qellayta wanusikuq runakunata pägaykurmi Abimelec pusharqan 5papänin Jerobaal tashqan Ofra markaman. Saychömi juk rumi janancho qanchis chunka (70) wawqinkunata wanusiyarqan. Shulka kaq wawqin Jotamlami pakakuyninpa qeshpirqan.

6Saypitanami Siquem y Bet-milo runakuna Siquemcho kaykaq encina jacha kaqcho sagrädu rumi#Jos. 24.26-27. kaqman shuntakar rey kananpaq Abimelecta churayarqan.

Gerizim puntapita Jotam qayakushqan

7Abimelecta rey kananpaq churayashqanta musyaykurmi Jotam wisarqan Gerizim puntaman. Saypitami sinchipa qayakur nimurqan: <<Siquem runakuna, shumaq wiyayämay. ¡Wiyayämaptikiqa capazchir qamkunatapis Tayta Dios wiyayäshunkiman!

8<<Juk kutichöshi lapan jachakuna reyyuq kayta munar olïvu jachata niyarqan: <Mandamaqnï rey kanaykitami munayä>.

9<<Sayshi olïvu jacha ninaq: <Rey kaptïqa Tayta Diosta adorayänanpaq y runakunata respitayänanpaq ¿maypitaraqchi aceitipis kanman?>

10<<Mana munaptinshi jachakunaqa hïgustana mandaqnin rey kananpaq niyänaq. 11Sayshi hïgus jacha ninaq: <Rey kaptïqa ¿maypitaraqchi mishkiq hïguskunapis kanman?>

12<<Mana munaptinshi jachakunaqa üva jachatana mandaqnin rey kananpaq niyänaq. 13Sayshi üva jacha nirqan: <Rey kaptïqa ¿maypitaraqchi Tayta Dioswan runakuna kushikuyänanpaq vïnupis kanman?>

14<<Mana munaptinshi jachakuna shirakatana mandaqnin rey kananpaq niyänaq. 15Sayshi shiraka ninaq: <Rasunpaypa mandaqniki rey kanäta munarqa rämäkuna rurinman yaykayämuy. Manasayqa noqapita nina ratarmi Líbanucho jatusaq cedrukunatapis rupar ushanqa> >>.

16Sayno wilaparkurshi Jotam nirqan: <<Kanan shumaq tantiyakuyay. ¿Alitaku rurayashkanki Abimelecta mandaqniki rey kananpaq churar? ¿Qamkunata ali rikayäshushqaykinölaku papänïtawan wawqïkunata rikayashkanki? 17Madianita runakunapa munayninpita salvayäshunaykipaqmi papänï wanuy kaway pelyarqan. 18Sayno salvaykäyäshuptikipis papänïpa contran sharkurmi qanchis chunka (70) olqu surinkunata rumi janancho wanusiyashkanki. Nirkurmi aylluykikuna kaptilan papänïpa concubïna warminpa wawan Abimelecta mandaqniki rey kananpaq churayashkanki.

19<<Jerobaalta y surinkunata alita rurash kayaptikiqa qamkunawan Abimelec ali kawasun y qamkunapis paywan ali kawayay. 20Lutanta rurash kayaptikiqa Abimelecpita nina yarqamur rupar ushayäshunki. Saynöla markaykikunapita nina yarqamur Abimelectapis rupar ushasun>>.

21Nirkurnami qeshpir aywakurqan Beer markaman. Saychömi täkurqan wawqin Abimelecta mansashpan.

Siquem runakuna Abimelecpa contran sharkuyashqan

22Kimsa watana Israel runakunapa mandaqnin Abimelec kaykaptinmi 23Siquem runakunawan chikinakuyänanpaq mana ali yarpayta paykunaman Tayta Dios churarqan. 24Saynöpami Abimelecta Tayta Dios castigarqan Jerobaalpa qanchis chunka (70) olqu surinkunata wanusishqanpita. Siquem runakunatapis saynöpami castigarqan wawqinkunata wanusinanpaq Abimelecta yanapäyashqanpita. 25Saymi Siquem runakuna jalqakunaman aywaykur saypa päsaq runakunata asaltayarqan. Sayno ruraykäyashqantami Abimelecta wilayarqan.

26Juk junaqmi Ebedpa surin Gaal wawqinkunawan chäyarqan Siquem markaman. Saycho taptinmi saycho taq runakuna amistäta paykunawan rurayarqan. 27Saypitanami chakrapa aywar üvata shuntayashpan vïnuta rurayarqan. Nirkurnami diosninkunapa templuncho mikur upur fiestata rurayashpan Abimelecpa washanta rimayarqan. 28Saymi Ebedpa surin Gaal nirqan: <<¿Pitaq Abimelecqa aläpa payta cäsukunansipaqqa? Siquem runakuna kaykar ¿imanirtaq paypa munaynincho kashwan? Abimelecqa ¿manaku Jerobaalpa surilan kaykan? Markansita mandaq Zebulpis ¿manaku paypa yanapaqlan kaykan? Abimelecta sirvinansipa trukanqa Siquempa taytan Hamor ayllu runakunalata sirvishun.#9.28 Siquempita y Hamorpita musyanaykipaq liyinki Gén. 34.1-31. Siquempa taytan Hamor ayllu runakunalata sirvishun nishqanqa legïtimu Siquem runalata sirvishun ninanmi. 29¡Qamkunapa mandaqniki karqa maynami Abimelecta ushakärasïman karqan! Saynöpis maynami payta nïman karqan soldädunkunata shuntaykur noqakunawan pelyayänanpaq>>.

30Ebedpa surin Gaal sayno nishqanta wiyaykurmi Siquem markapa mandaqnin Zebul fiyupa rabyanarqan. 31Saymi pakaylapa wilakuqkunata kachakurqan Abimelecta wilar niyänanpaq: <<Ebedpa surin Gaalmi wawqinkunawan kay markaman chaykamur runakunata shimita jatipaykäyan contrayki sharkuyänanpaq. 32Imapis manaraq kashqanyaq soldäduykikunawan sakaypa shamur marka nawpankunaman churanakuyay. 33Nirkur pasa waraskiptin markata atacayay. Gaal y paywan kaykaq runakuna pelyayänanpaq yarqayämuptinqa lapanta ushakäsiyay>>.

34Saymi Abimelec say sakay chusku punta soldädunkunawan aywaykur Siquem marka nawpankunaman churanakuyarqan. 35Ebedpa surin Gaal marka punkucho ichiraykashqan hörami soldädunkunawan Abimelec pakaraykäyashqanpita yarquyarqan. 36Sayta rikarmi Zebulta Gaal nirqan: <<¡Rikay! ¡Jirkakunacho lantuykunatami runakuna uraykäyämun!>>

Sayno niptinmi Zebul nirqan: <<Jirkakunapa lantuynintachir runakunatano rikapakuykanki>>.

37Sayno niptinpis Gaal masraqmi nirqan: <<Pasapa Pupun niyashqan lömapapis soldädukuna shamuykäyanmi. Saynölami Adivinaqkunapa Encinan niyashqan jachaman aywaq nänipapis juk punta soldädukuna shamuykäyan>>.

38Saynami Zebul nirqan: <<¡Kananmi rikashayki, baduläqui! <Pitaq kansi Abimelecta cäsukunansipaqqa> ¿manaku nirqayki? Manakaqman churashqayki runakunami yaykaykäyämun. ¡Kanan mä, runa karqa paykunawan pelyaq ayway!>>

39Saymi Siquem runakunawan Gaal aywayarqan Abimelecwan pelyayänanpaq. 40Abimelec vinciptinmi Gaal y paywan kaykaq runakuna qeshpir markaman kutiyarqan. Sayno kaptinpis marka punkuman chäyashqanyaq askaqtami wanusiyarqan. 41Saypitami Abimelec kutikurqan Aruma markaman. Zebulnami Gaalta wawqinkunatawan Siquempita qarqurqan.

42Waraynin junaqnami Abimelec mayarqan Siquem runakuna chakrankunaman yarquyashqanta. 43Sayta musyaykurmi yanapaqnin runakunawan kimsa puntaman rakinakuykur Siquemman aywayarqan. Nirkurmi marka yaykunaman churanakuykur runakuna yarquyaptin elaqpita atacayarqan. 44Markaman kutir mana qeshpiyänanpaqmi Abimelecqa tröpancho kaykaq runakunawan marka punkuman yalipäyarqan. Ishkay kaq punta runakunanami chakrakunacho kaykaq runakunata wanusiyarqan. 45Say junaq qoyatimi Siquem runakunawan Abimelec pelyayarqan. Vincirkurmi say markacho kaykaq runakunata wanuykasir wayinkunatapis juchusir ushayarqan. Nirkurmi saycho imapis mana winananpaq kachita mashtayarqan.

46Abimelec sayno rurashqanta mayaskirmi Siquem törricho taq runakuna El-berit templuman amparakuyarqan. Say templuqa ali sigurashqami karqan. 47Sayman amparakush kaykäyashqanta musyaykurmi 48paywan kaykaq runakunata pushakurkur Salmón lömaman Abimelec aywarqan. Nirkurmi fïlu jächawan jachapa rämanta muturir umrukurkur wakin runakunatapis nirqan: <<¡Lapayki noqano rämakunata mutuykur umrukuyay!>>

49Sayno niptinmi rämata cada ünun mutuskir Abimelecpa qepanpa aywar templuta rupasiyarqan. Sayno rupasirmi törricho kaq runakunata warmita olquta juk waranqatano (1,000) wanusiyarqan.

50Saypita Tebes markamanna aywarmi Abimelec y paywan kaykaq runakuna jiruruypa churanakuykur atacayashpan say markaman yaykuyarqan. 51Marka chawpinchömi ali sigurash jatun törri karqan. Abimelec y paywan kaykaq runakuna markaman yaykuyaptinmi markacho taq runakuna warmipis olqupis törriman yaykuykur ruripita punkuta shumaq trancakayämurqan. Nirkurmi törri jananman lapan wisäyarqan. 52Saymi törrita rupasiyta munar ninata sarisinanpaq Abimelec kaykaptin 53törri jananpita juk warmi tunaywan Abimelecta umapis pakiqpaq samqaykamurqan.

54Saymi armanta apar yanapaqnin runata jinan höra qayarkur Abimelec nirqan: << <Juk warmilami wanusish> nir runakuna mana parlayänanpaq espädaykiwan jukla tuksiramay>>.

Niptinmi yanapaqninqa espädanwan wanuqpaq tuksirirqan. 55Abimelec wanush jitaraykaqta rikaykurmi Israel runakuna wayinkunapana kutikuyarqan.

56Saynömi Abimelecta Tayta Dios ushakäsirqan papäninta chikishpan qanchis chunka (70) wawqinkunata wanusishqanpita. 57Saynölami Siquem runakunatapis Tayta Dios ushakäsirqan Jerobaalpa surinkunata wanusiyashqanpita. Saynöpami Jerobaalpa surin Jotam maldicionashqantapis cumplirqan.

Currently Selected:

Jueces 9: qvhB

Highlight

Copy

Compare