Jueces 8
8
Madianita runakunapa mandaqnin reykunata Gedeón prësu sarishqan
1Efraín trïbu runakunanami Gedeónta rabyash niyarqan: <<Madianita runakunawan pelyaq aywar ¿imanirtaq noqakunata qayasiyämarqaykisu?>>
2Sayno niyaptinmi Gedeón nirqan: <<Mana qayasiptïpis madianita runakunapa mandaqnin reykunata wanusir noqapita mas alitami rurayashkanki. Walkalata rurayashqaykita yarparpis noqakunapita masmi rurayashkanki. 3Madianita runakunapa mandaqnin rey Orebta y rey Zeebta wanusiyänaykipaqmi Tayta Dios makikikunaman churamush. Paykunata wanusir noqakunapita masmi rurayashkanki>>.
Gedeón sayno niptinmi Efraín trïbu runakuna rabyaykäyashqanpita kushikuyarqan.
4Saypitanami pasaypa utikash kaykarpis pelyaq aywäsiq kimsa pachak (300) runakunawan Jordán mayuta Gedeón simpayarqan madianita runakunata qatipäyashpan. 5Sucotman chaykurmi saycho taq runakunata Gedeón ruwakur nirqan: <<Madianita runakunapa mandaqnin rey Zebata y rey Zalmunata qatiparmi aywaykäyä. Yanapämaq runakuna pasaypa utikar aywapakaykäyannami. Valornin yurirkunanpaq imalatapis qaraykuyälay>>.
6Sayno nir ruwakuptinpis Sucot markacho taq mayor runakuna niyarqan: <<Pachaykikunata qarayänäpaq ¿maynaku Zebatawan Zalmunata prësu sararaykäyanki?>>
7Sayno niptinmi Gedeón nirqan: <<Zebata y Zalmunata prësu sariyämunäpaq Tayta Dios makïman churamuptinqa kutiykamur kashakunawanmi qaraykikunapis pishtaypa pishtar astayäshayki>>.
8Saypita päsar Penielman chaykurpis Sucotcho manakushqannölami Gedeón manakurqan. Peniel runakunapis Sucot runakuna niyashqannölami niyarqan. 9Saymi rabyakushpan Peniel runakunata Gedeón nirqan: <<Lapanta vinciykur kutimushpämi kay törrikita juchurasishaq>>.
10Sayyaqmi inti jeqamunan kaqläpita shamuq soldädunkunawan Zebawan Zalmuna Carcorman chäyarqan. Paykunapa soldädunkunata Gedeónpa yanapaqnin runakuna pachak ishkay chunka waranqatami (120,000) wanusiyarqan. Saymi chunka pisqa waranqalana (15,000) soldädunkuna kayarqan. 11Gedeónqa yanapaqnin runakunawan sunyaq jirkapa aywaq nänipa qatiparmi madianita runakunata elaqpita atacayarqan. Say näniqa Noba y Jogbehaläpami päsarqan. Sayläqa inti jeqamunan kaqpami karqan. 12Atacayaptin Zebawan Zalmuna qeshpiykäyaqtami Gedeón taripaykur prësu sarirqan. Ishkan reykunata prësu sariptinmi soldädunkunapis mansakäyashpan maysaypa qeshpir aywakuyarqan.
13Gedeónqa pelyashqanpita kutir Heresta päsaykashqanchömi 14Sucotcho taq maqtata prësu sariykur tapurqan saycho taq mayor runakunapa jutinkunata. Saymi qanchis chunka qanchis (77) mayor runakunapa jutinkunata qelqarkur maqta aptaparqan. 15Saymi Sucotman chaykur runakunata Gedeón nirqan: <<Zebata y Zalmunata qatipäyaptï qamkunaqa manakaqman churayämarmi niyämarqayki: <Zebata y Zalmunata manaraq wanusiyaptikiqa manami pachaykikunata qarayäshaykisu>. Kanan rikayay Zebata y Zalmunata prësu apaykäyashqäta>>.
16Sayno nirmi Sucotcho taq mayor runakunata kashawan y shirakawan Gedeón astarqan. 17Saypita päsar Penielman chaykurnami törrinta juchurasir say markacho taq runakunata wanusirqan.
18Nirkurmi Zebata y Zalmunata Gedeón tapur nirqan: <<Taborcho wanusiyashqayki runakuna ¿pïnötaq kayarqan?>>
Saymi niyarqan: <<Qam niraqlami lapanpis kayarqan. Paykunaqa reypa surinkunanölami kayarqan>>.
19Sayno niyaptinmi Gedeón sinchipa nirqan: <<¡Paykunaqa wawqïkunami kayash! Mamäpa wawankunatami wanusiyashkanki. Saymi kanan kikikikunatapis wanusiyäshayki. Wawqïkunata mana wanusish kayaptikiqa qamkunatapis manami wanusiyämansu>>.
20Sayno nirmi qechpa surin Jeterta nirqan: <<Kay runakunata jukla wanusiy>>.
Niptinpis wamralaraq karmi wanusiyta valurarqansu.
21Saymi Gedeónta Zebawan Zalmuna niyarqan: <<Ali chölu karqa kikiki wanusiyämay, ari>>.
Sayno niyaptinmi Gedeónqa paykunata wanurasirqan. Nirkurnami Zebapa y Zalmunapa camëllunkunapa kuyaylapaq walqankunata apakurqan.
22Saypitanami Israel runakuna Gedeónta niyarqan: <<Madianita runakunapa munayninpitami salvayämashkanki. Kananqa mandamaqnï rey kaykulay. Qam wanuptiki surikipis reymi kanqa y suriki wanuptinnami wilkaykipis rey kanqa>>.
23Sayno niyaptinmi Gedeón nirqan: <<Noqapis ni surïkunapis manami mandaqnikikuna kayäshaqsu. Mandamaqninsi reyqa Tayta Diosmi kaykan. 24Isanqa ruwakushayki guërracho shuntayämushqaykipita lapayki juk sortïjaykita qoykayämänaykipaq>>.
Sayno manakurqan Ismael runakuna qori sortïjata jatiräyaptinmi.#8.24 Madianita runakunataqa Ismael runakuna kayashqantami niyaq (Gén. 37.28).
25Sayno niptinmi Israel runakuna <<alichir kanqa, taytay>> nir jakuta mashtaykur juknin jukninpis juk sortïjata churayarqan. 26Say chaskishqan qori sortïjakunata pësaptinmi chunka esqun kïluno lasarqan. Say jananmanmi Gedeón shuntarqan walqakunata, alhäjakunata, reykuna jatiräyashqan granäti mödanakunata y camëllukunapa kunkancho kaq adornukunatapis. 27Say qorikunapita juk efodta rurarkurmi markan Oframan Gedeón churarqan. Saypitanami Israel runakuna Tayta Diosta mana wiyakur say efodta adorayarqan. Saymi say efod imayka trampano karqan Gedeónpaq y ayllunkunapaqpis.
28Madianita runakunata sayno vinciyaptinmi Israel runakunata achäquita ashipäyarqannasu. Gedeón kawashqanyaqqa chusku chunka (40) watami Israel runakuna jawkala kawayarqan.
Gedeón wanushqan
29Saypitanami Joáspa surin Jerobaal niyashqan Gedeónqa wayinpa kutikurqan. 30Warminkuna aska kaptinmi qanchis chunkantin (70) olqu surinkuna kayarqan. 31Siquemcho concubïna warminpis Gedeónpa surinta qeshyakuptinmi jutisirqan Abimelec jutin kananpaq. 32Pasaypa awkinyashqanyaqmi Gedeón kawarqan. Wanuykuptinmi papänin Joás pamparaykashlanman pampayarqan. Say karqan Abiezer ayllu tashqan Ofra markachömi.
33Gedeón wanuskiptinnami Israel runakuna yapay Baal dioskunata adorayarqan. Saymi Baal-berit ïdulutana akrayarqan diosnin kananpaq. 34Tayta Dios lapan contrankunapita salvaykaptinpis payta manami adorayarqannasu. 35Saynölami Jerobaal niyashqan Gedeón sayjinanpa yanapash kaykaptinpis paypa surinkunata Israel runakuna imapaqpis cuentayarqansu.
Currently Selected:
Jueces 8: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
