Jueces 4
4
Israel runakunata Baracwan Débora salvayashqan
1Aod wanuskiptinnami Israel runakuna jusalikur Tayta Diosta yapay rabyanäsiyarqan. 2Saymi Tayta Diosqa Hazor markacho cananeo runakunapa mandaqnin rey Jabínpa munayninman kachapaykurqan. Soldädunkunapa capitannin Sísarami Haroset-goim markacho tarqan. 3Rey Jabínpami karqan fiërrupita rurash esqun pachak (900) guërra carrëtankuna. Ishkay chunka (20) wata pasaypa nakasiptinmi Israel runakuna Tayta Diosta manakuyarqan salvananpaq.
4Say wisanmi Israel runakunapa jueznin kaykarqan Tayta Diospa wilakuqnin profetïsa Débora. Pay karqan Lapidotpa warminmi. 5Israel runakunata arreglananpaqmi palmëra jacha chakinman Débora jamakuq. Saymi niyarqan Déborapa Palma Jachan kashqanta. Say jacha karqan Efraín jalqakunacho kaykaq Ramáwan Bet-el tinkuqchömi. Saymanmi Israel runakuna aywayaq ima demanduntapis Débora arreglananpaq.
6Saypita juk junaqchömi Débora qayasirqan Abinoampa surin Baracta.#Heb. 11.32. Barac karqan Neftalí trïbu Cedes markacho taq runami. Chaykuptinmi nirqan: <<Israel runakunata kuyaq Tayta Diosmi nikäshunki Tabor jirkaman aywar Neftalí trïbupita y Zabulón trïbupita chunka waranqa (10,000) runakunata shuntanaykipaq. 7Qamkunawan pelyayänanpaqmi Jabínpa lapan soldädunkunata, carrëtankunata y capitán Sísarata Cisón raqraman Tayta Dios chäsinqa. Paykunata vinciyänaykipaqmi Tayta Dios yanapäyäshunki>>.
8Débora sayno niptinmi Barac nirqan: <<Qam walkimaptikiqa listumi kaykä aywanäpaq. Mana walkimaptikimi isanqa aywashaqsu>>.
9Saymi Débora nirqan: <<Sayno kaptinqa walkishaykimi. Isanqa manami qamsu Sísarata wanusinki, sinöqa juk warmimi Tayta Dios yanapaptin wanusinqa>>.
Saypitami Déborawan Cedesman Barac aywayarqan. 10Cedesman chaykurmi Zabulónwan Neftalí trïbu runakunata Barac qayasirqan. Sayman chunka waranqa (10,000) runakuna shuntakäyaptinmi paykunawan Tabor jirkaman wisäyarqan. Paykunawanmi Déborapis aywarqan.
11Cedes marka cercanchömi Heber jutiyuq runa tarqan. Pay karqan Moiséspa suedrun Hobab ayllu ceneo runami. Paymi ayllunkunapita rakikar Zaanaimcho kaykaq encina jacha kaqcho toldunkunata sharkarkasir tarqan.
12Abinoampa surin Barac soldädunkunawan Tabor jirkaman wisashqanta Sísarata wilayaptinmi 13fiërrupita rurash esqun pachak (900) carrëtankunata y lapan soldädunkunata shuntaykur Sísaraqa Haroset-goimpita Cisón raqraman aywayarqan. 14Saymi Baracta Débora nirqan: <<Kanan junaqmi qampa makikiman Sísarata Tayta Dios churamunqa. Paymi nawpaykikunata aywar yanapäyäshunki>>.
Sayno niptinmi pelyayänanpaq Tabor jirkapita Barac urämurqan chunka waranqa (10,000) soldädunkunata pushakurkur. 15Pelyayaptinmi Tayta Dios pasaypa mansarïsirqan Sísarata, carrëta manijaq soldädunkunata y wakin soldädunkunatapis. Saymi Sísarapis carrëtanta kachariykur chakilapa qeshpir aywakurqan. 16Say junaqmi Baracqa Sísarapa soldädunkunata y carrëta manijaqkunatapis espädawan lapanta wanusiyarqan Haroset-goimyaq.
17Say wisanmi Hazorpa mandaqnin rey Jabín yachanänakuyarqan ceneo ayllu Heberwan. Saymi Sísaraqa chakilapa qeshpir Heberpa toldun kaykashqanman charqan. Saychömi Heberpa warmin Jael kaykarqan. 18Chaykuptinmi Jael nirqan: <<Yaykakalämuy, taytay. Ama mansariysu>>.
Toldu rurinman yaykuriptinmi Sísarata jakuwan Jael saparkurqan. 19Saynami Sísara nirqan: <<Yakunaypita wanuykänami. Yakuykita manakuläshayki, mamïta>>.
Sayno niptinmi Jaelqa odripita#4.19 Odriqa qarapita rurashqami karqan yakuta karpis vïnuta karpis lichita karpis purisiyänanpaq. lichita qararqan. Nirkurmi Sísarata yapay saparkurqan. 20Saynami Sísara nirqan: <<Toldu punkulacho rikachakuykay. Pipis shamur tapushuptikiqa ninki kaycho pipis mana kashqanta>>.
21Sísara pasaypa pishipash karmi wanuyparaq punukäkurqan. Saymi Jaelqa llawchi punta estäcata y mäsuta aptarkur upäla yaykuskir Sísarata sentïdunpa takapaykurqan pasaman päsashqanyaq. Saynöpami Sísarata wanusirqan.
22Sísarata qatipar Jaelpa toldunman Barac chaptinmi Jael nirqan: <<Yaykamuy, taytay. Kanan rikasishayki qatipaykämushqayki runata>>.
Yaykurmi Sísarata tarirqan sentïdunpa estäcawan clävash pampacho wanush sutaraykaqta.
23Saynöpami Israel runakunata Tayta Dios yanaparqan cananeo runakunapa mandaqnin rey Jabínta vinciyänanpaq. 24Saypitanami Israel runakuna cananeo runakunapa mandaqnin rey Jabínwan pelyar yapay yapay vinciyarqan lapanta ushakäsiyashqanyaq.
Currently Selected:
Jueces 4: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.