Jueces 18
18
Micaíapa ïdulunkunata Dan trïbu runakuna apakuyashqan
1Say wisanqa Israel runakunapa mandaqnin rey manami karqanraqsu.
Dan trïbu runakunami rikasishqan posisionninkunaman yaykuyta mana kamäpakuyashpan maynincho täyänanpaqpis rikapakur puriykäyarqan.#Jos. 19.47. 2Saymi Zora markapita y Estaol markapita pisqa ali chölunnin runakunata kachayarqan maynincho täyänanpaqpis rikapakayämunanpaq. Say pisqa runakuna aywarmi chäyarqan Efraín jalqakunaman. Micaíapa wayinman chaykurmi saycho posädakuyarqan.
3Micaíapa wayincho kaykarmi Leví trïbu maqtata parlakuyninpa reqiskiyarqan. Saymi maqtata tapuyarqan: <<¿Pitaq kayman pushamushushkanki? ¿Imatataq kaychöqa ruraykanki? ¿Imamantaq shamushkanki?>> nir.
4Sayno tapuyaptinmi wilarqan Micaíawan conträtuta rurash kar saycho paypa cüran kashqanta.
5Saymi niyarqan: <<Tayta Diosta tapupaykalämay. Mä alikush puriyämushaq>>.
6Sayno niptinmi cüra nirqan: <<Ama lakikuyaysu. Maypa aywarpis ali puriyämunaykipaqmi Tayta Dios yanapäyäshunki>>.
7Saypita yarqurnami say pisqa rikapakuq runakuna chäyarqan Lais markaman.#18.7 Say runakunapa markanpita Lais markamanqa kimsa chunka ishkay (32) lëwami karqan. Sidón markacho runakuna jawkala täyashqannömi Lais markacho taq runakunapis jawkala taykäyarqan. Manami imapis paykunata pishirqansu. Sidón runakunapita karuchöraqmi täyarqan. Manami pipis cercacho karqansu imapis kaptin yanapäyänanpaq.
8Sayno kaykaqta rikaykurmi pisqa rikapakuq aywaq runakunaqa kutiyarqan Zora y Estaol markankunaman. Chäyaptinmi tapuyarqan: <<Rikapakamur puriyämushpayki ¿imano kashqantataq rikayashkanki?>> nir.
9Saymi niyarqan: <<Rikapakamur puriyämushqä partikunaqa lapanpis alimi kaykan. Jukla aywashun say partikunata sarinansipaq. Kaylachöqa ama täkushunsu. 10Sayman charmi tarishun tranquïlu kakuykaq runakunata. Paykunapa chakrankuna aska kaptinmi imankunapis pishinsu. Paykuna täyashqan partikunataqa Tayta Diosmi qomäshun>>.
11Sayno niyaptinmi Zora y Estaol markakunapita soqta pachak (600) runakuna pelyayänanpaq kamarikush aywayarqan. Say aywaqkunaqa Dan trïbu runakunami kayarqan. 12Judá trïbu runakuna täyashqan partiman chaykurmi Quiriat-jearimpita inti jeqanan kaqlächo posädakuyarqan. Saypitami kananyaqpis say partipa jutin Mahané-dan#18.12 Mahané-dan ninanqa Dan trïbu runakunapa campamentun ninanmi. kaykan. 13Saypita yarqurnami Efraín jalqakunapa päsar Micaíapa wayinman chäyarqan.
14Lais partita rikapakuq pisqa runakunami niyarqan: <<Kay wayichömi kaykan cürapa efodnin, qellaypita rurash juk ïdulu mas wakin ïdulukunapis. Saykunata nistäshunmi>>.
15Sayno niyashpanmi pisqa rikapakuq runakunaqa Micaíapa wayinman nawpäyarqan. Saycho taq Leví maqtawan tinkurmi wamayashpan winchikuyarqan. 16Soqta pachak (600) Dan trïbu runakunanami punku yaykunacho pelyayänanpaq kamarikushla shuyaraykäyarqan. 17Sayyaqmi say pisqa rikapakuq runakunaqa ïdulukunapaq rurashqan capillaman yaykuskir efodta, qellaypita rurash ïduluta y wakin ïdulukunatapis jorquyarqan. Micaíapa cürannami waqtacho ichiraykarqan soqta pachak runakunawan.
18Ïdulukunata y efodta jorqayämuptinmi cüraqa nirqan: <<¿Imanirtaq jorqaykäyämunki?>>
19Saymi paykuna niyarqan: <<¡Upälakuy! Michäyämänaykipa trukanqa aywakunansipaq jukla kamarikuy. Qamqa cüräkuna karmi papänïkunano kanki. ¿Manaku mas ali kanman juk runalapa cüran kanaykipa trukanqa juk trïbu Israel runakunapa cüran kaptiki?>>
20Sayno niptinmi cüra kushikur ïdulukunata y efodta apakurkur Dan trïbu runakunawan aywakurqan. 21Saypita aywakurmi Dan trïbu runakunaqa puntanta aywayänanpaq churayarqan surinkunata, uywankunata y qepi apaqkunatapis.
22Aywakuykäyaptinmi vecïnunkunawan shuntanakuykur Micaía qepanta aywar karutana aywaykäyaptinpis taripäyarqan. 23Qayaraykar taripäyaptinmi Dan trïbu runakunaqa tikraykur Micaíata tapuyarqan: <<¿Imataq päsaykäshunki? ¿Imanirtaq saysika runakunawan qepäkunata shayämushkanki?>> nir.
24Saymi Micaía nirqan: <<Qamkunaqa rurasikushqä diosnïkunata apamur y cürätapis pushamur jinaylatami kachaykayämashkanki. Sayno ruraykämarpis <imanankitaq> niyämankiraq ¿aw?>>
25Saynami Dan trïbu runakunaqa niyarqan: <<Ama parlapäyämaysu. Saynöla qayapäyämaptikiqa noqakunawan aywaq wakin runakuna rabyakuyashpan cuidä qamtapis y qamwan shamuq runakunatapis wanusir ushaykuyäshunkiman>>.
26Sayno nirkuyashpanmi Dan trïbu runakuna aywakuyarqan. Paykuna aska kayaptin mansakurmi Micaíaqa minkakushqan runakunawan wayinpana kutikuyarqan.
27Micaíapa ïdulunkunata apash y cüran pushashqami Dan trïbu runakunaqa Laisman chäyarqan. Saycho taq runakuna jawkala kaykaqtami lapanta espädawan wanusiyarqan. Markatapis rupasirmi ushayarqan. 28Sidón markapita karucho täyaptinmi paykunata salvananpaq pipis karqansu. Lais markaqa Bet-rehob cercan pampachömi karqan.
Dan trïbu runakunami say rupasiyashqan markata yapay sharkarkasir saychöna täkuyarqan. 29Say markapa nawpa kaq jutin Lais kaptinpis paykunaqa jutisiyarqan Dan jutin kananpaqmi. Sayno jutisiyarqan Israelpa surin Danpita miraq trïbu karmi.
30Saymannami apayashqan ïduluta churayarqan respitar adorayänanpaq. Cüratana churayarqan Moiséspa surin Gersón ayllu Jonatántami. Saypitaqa Jonatánpita miraq runakunalanami Dan trïbu runakunacho cüra kayarqan hasta juklä nacionman Dan trïbu runakunata prësu apayashqanyaq. 31Tinkuna Toldu Siluchöraq kashqan wisanmi Dan trïbu runakuna Micaíapa ïdulunta adorayarqan.
Currently Selected:
Jueces 18: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
