Jueces 19
19
Gabaa runakuna warmita violaypa wanusiyashqan
1Israel runakunacho rey manaraq kaptinmi Efraín jalqakunacho Leví trïbupita juk runa tarqan. Payqa wakin runakunapita karuchömi tarqan. Juk kutimi Judá particho kaykaq Belén markaman aywaykur saypita warmita aparqan concubïna warmin kananpaq. 2Taykashqanchömi say warmiqa runanta kachariykur papänin kaqpa Belénman kutikurqan. Papänin kaqchömi chusku killa tarqan.
3Saymi runanqa ali shimilanpa parlapar shuntakuq aywarqan juk ashmayninta pushakurkur y ishkay ashnun qatikurkur. Chäyaptinmi warminqa papäninpa wayinman yaykasirqan. Mashanta rikaykurmi suedrunpis kushikurqan. 4Qoyäpänanpaq niptinmi suedrunpa wayincho mikur upur kimsa junaq qoyäyarqan.
5Chusku kaq junaqnami tutalana sharkurqan kutikuyänanpaq. Yarqukuykäyaptinnami suedrunqa nirqan: <<Malaqla aywayankimanraqku. Imalatapis mikuskishunraq>>.
6Saymi jamaykur ishkan mikuyarqan upuyarqan. Saychömi suedrunqa ruwarqan say sakaypis punupänanpaq. 7Sayno ruwaptinmi aywakunanpaq kamarikuykashqanchöpis say sakaypis saycho punurqan.
8Pisqa kaq junaqnami aywakunanpaq saka sakala sharkurqan. Say junaqpis suedrun yapaymi ruwarqan: <<Mikur upur jamapärishunraq. Mas tardiraq aywakuyankipaq>> nir.
Saymi mikur upur jamaräyarqan. 9Saypita concubïna warminwan y ashmayninwan aywakuyänanpaq kamarikuptinmi suedrun nirqan: <<Intipis jeqaykaptinnaqa yapay punukushun, taytay. Waray tutana saka sakala aywakuyankipaq>>.
10Sayno nikaptinmi Leví trïbu runaqa saycho punuyta mana munar concubïna warminta y ashmayninta pushakurkur y ishkay silla ashnunkunata qatikurkur aywakuyarqan. Sayno aywakurmi Jerusalén niyashqan Jebús marka simpanman chäyarqan.
11Jebús markaman tardina chaykäyashqanchömi ashmaynin nirqan: <<Jebuseo runakunapa markalanman posädakushun>>.
12Saymi patronnin nirqan: <<Jäpa runakuna täyashqanmanqa manami ni may markamanpis yaykushwansu. Saypa trukanqa Gabaa markayaqraqmi chäshun. 13Jukla aywashun Gabaacho karpis o Ramácho karpis posädakunansipaq>>.
14Sayno nishpan aywarmi inti jeqaykaptinna Benjamín trïbu runakuna täyashqan Gabaa marka nawpanman chäyarqan. 15Saymi nänipita yaqar posädakuyänanpaq Gabaa markaman yaykuyarqan. Pipis mana posädasiptinmi pläzalaman jamaykuyarqan.
16Pasa sakaykaptinnami chakracho arushqanpita kutir juk awkin runa päsaykarqan. Say awkinqa Efraín jalqakunapita karpis say wisan Gabaa markachönami taykarqan. Gabaa markachöqa Benjamín trïbu runakunami täyarqan. 17Pläzacho jamaraykäyaqta rikarmi awkinqa nirqan: <<¿Maypitataq shamuykäyanki? ¿Maypataq aywaykäyanki?>>
18Tapuptinmi nirqan: <<Judácho kaykaq Belénman aywashqäpitami kutiykämü. Wayï kaykan Efraín karu jalqakunachöran. Saymi wayïpa kutikuykäyä. Pipis mana posädasiyämaptinmi kaylacho jamaraykäyä. 19Ashnükuna mikuyänanpaq qewatapis gransatapis apaykäyämi. Kikïkunapaqpis kaykanmi tantapis vïnupis. Manami imapis pishïyämansu>>.
20Niptinmi awkinqa nirqan: <<Imano kaptinpis manami kay pläzalachöqa waräyankimansu. Wayïcho posädasiyäshayki. Noqanami imata munayashqaykitapis kamaripäyäshayki>>.
21Sayno nirmi awkinqa wayinman paykunata pushar ashnunkunata qewata qararqan. Saychömi qorpankunaqa chakinkunata maylakuskir mikuyarqan y upuyarqan.
22Kushish kaykäyaptinmi say markacho taq yaqa runakuna wayiman juntapaykuyarqan. Nirkurmi punkuta sinchipa takakuyashpan awkinta niyarqan: <<¡Wayikiman posädakamuq runata waqtaman qarqamuy! Say runata violaytami munayä>>.
23Saymi wayiyuq yarquskir nirqan: <<Wayïcho posädakush kaykäyaptinqa ama ari sayta ruraykuyälaysu, taytakuna. Sayqa pasaypa penqakuypaq jusami kaykan. 24Munayaptikiqa doncëlla warmi surïta qorpäpa concubïna warminta jorqapäyämushayki munayashqaykita rurayänaykipaq. Kay runata isanqa ama violaykuyälaysu>>.
25Say runakunaqa imata niptinpis awkinta manami cäsuyarqansu. Saymi Leví trïbu runaqa concubïna warminta waqtaman qarqaparqan. Paytami runakuna warati violarkur pasa wararkuptinna kachaskir aywakuyarqan. 26Kachaskiyaptinmi warmiqa runan posädaraykashqan wayi punkuman kutiykur wanuskirqan.
27Aywakunanpaq punkuta tutala kicharmi runaqa concubïna warminta tarirqan kikin punku quiciunman makin churash jitaraykaqta. 28Saymi nirqan: <<Sharkuy. Aywakushunna>>.
Sayno niptinpis warminqa mananami parlakurqannasu. Saymi wanushta ashnunman chaqnakurkur#19.28 Wakin runakunaqa cargakurkur niyanmi. wayinpa apakurqan.
29Wayinman chaykasirmi kusurqan chunka ishkay pedäzuman. Nirkurmi intëru Israel runakuna täyashqan kaqpa cada trïbuman juk pedäzuta apasirqan. 30Sayta rikaykurmi warmita runakuna violaypa wanusiyashqanta musyashpan lapanpis niyarqan: <<Egiptupita yarqamushqansipita pasa manami imaypis wiyashkansisu sayno jusalikuyashqanta. Sayno rurayashqanpita imata ruranansipaqpis shumaq yarpachakushun>>.
Currently Selected:
Jueces 19: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
