Jueces 16

Gaza markacho Sansón kashqan

1Juk kutichömi Sansón aywarqan filisteo runakunapa markan Gazaman. Saychömi prostitüta warmipa wayinman aywar paywan punurqan. 2Markankunacho kaykashqanta musyaykurmi Gaza runakuna jiruruypa churanakur markaman yaykuna punkucho täpar niyarqan: <<Pasa wararkulaptinmi wanurasishun>>.

3Sansónqa pulan paqasyaqlami punurqan. Say hörami aywakur markaman yaykuna punku wichqaraykaqta tarirqan. Saymi punkuta jorqur quiciunnintinta y cerröjuntinta umrukurkur Hebrón simpan lömayaq apakurqan.#16.3 Hebrón markaqa Gaza markapita chunka ishkay lëwachömi karqan. Hebrónqa Judá trïbu runakuna täyashqanchömi karqan.

Dalilata Sansón kuyakurkushqan

4Saypita qepatanami Sorec pampacho taq Dalilatana Sansón kuyakurkurqan. 5Sayta musyaykurmi filisteo runakunapa mandaqninkuna aywaykur Dalilata niyarqan: <<Sansónpa kalpan imano sayjinanpa kashqanta y payta imano vincinansipaq kashqantapis musyanansipaq kuyaq tumpala tapuy. Wilayämaptikiqa imanöpapis prësu sariykurmi liyayäshaq. Nirkur juknï juknïmi pägayäshayki waranqa pachak (1,100) siclo qellayta>>.#16.5 Juk siclo qellayqa juk killa arur gänashqannömi karqan.

6Saymi Sansónta Dalila tapur nirqan: <<¿Imanöpataq kalpasapa kanki? ¿Imawan liyashuptikitaq kalpaynaq rikakunkiman?>>

7Sayno tapuptinmi Sansón nirqan: <<Flëchapaq rurash manaraq sakiq qanchis awriwan liyamaptin kalpaynaq tikrarmi wakin runanölana rikaküman>>.

8Sansón nishqanta wilaykuptinmi filisteo runakunapa mandaqninkuna payman apapäyarqan manaraq sakiq qanchis awrita. Saywanmi Sansónta Dalila liyarqan. 9Manaraq liyar runakunata wayincho Dalila pakash karmi Sansónta liyarkushpan sinchipa nirqan: <<¡Sansón, filisteo runakuna janaykichönami!>>

Sayno niptinmi liptayash jïlutanöla awrikunata Sansón rachirirqan. Saymi filisteo runakuna tantiyayarqansu imanir aläpa kalpayuq kashqantapis.

10Saypitanami Sansónta Dalila nirqan: <<¿Imanirtaq lulapämashkanki? Kananqa rasun kaqta wilamay. ¿Imano liyaykushuptikitaq qeshpinkimansu?>>

11Saymi Sansón nirqan: <<Manaraq imatapis liyayashqan mushuq waskawan liyayämaptinqa kalpaynaqmi tikrashaq. Saynöpami wakin runanölana rikakushaq>>.

12Saymi mushuq waskakunawan Dalila liyarkur sinchipa nirqan: <<¡Sansón, filisteo runakuna janaykichönami!>>

Say hörapis runakunata wayinchömi Dalila pakaraykäsirqan. Filisteo runakuna janancho kashqanta niptinmi llanu jïluta rachiqnöla waskakunata Sansón rachiskirqan.

13Saypitanami Sansónta Dalila yapay nirqan: <<¡Yapaymi lulapämashkanki! Kananqa rasun kaqta wilamay. ¿Imano liyaykushuptikitaq qeshpinkimansu?>>

Sayno niptinmi Sansón nirqan: <<Kallwawan awashqaykiman qanchis piltäta shumaq trämarkur takanki. Nirkur jawiraykaq estäcaman awata shumaq watanki>>.

14Sayno niptinmi estäcaman shumaq wataykur sinchipa nirqan: <<¡Sansón, filisteo runakuna janaykichönami!>>

Sayno niptinmi punuykashqanpita Sansón sharkur estäcantinta sutariykurqan.

15Saynami Dalila nirqan: <<Rasun kaqta mana wilaykämarqa ¿imanirtaq <kuyämi wayllümi> nimanki? Kimsa kutinami lulapämashpayki wilamankiraqsu imanöpa kalpasapa kashqaykitapis>>.

16Waran waran Dalila saynöla tapupaptinmi Sansón wanunaypanöraq lakikurqan. 17Saymi Dalilata rasun kaqta wilashpan nirqan: <<Manaraq yuriptïmi nazareo#Núm. 6.1-21. kanäpaq Tayta Dios akramash. Saymi iti kashqäpita pasa aqsäta pipis rutumashsu. Aqsäta pipis rutuptinqa kalpaynaqna rikakur wakin runanölami kashaq>>.

18Rasun kaqta wilashqanta musyaykurmi filisteo runakunapa mandaqninkunaman Dalila wilakasir nirqan: <<¡Kanan isanqa lapayki shayämuy! ¡Rasun kaqtami Sansón wilamash!>>

Saymi mandaqkuna promitiyashqannöla qellayta apakurkur Dalilaman aywayarqan. 19Nirkurnami Sansónta Dalila melqaynincho punukäsirqan. Punukaskiptinmi juk runata qayaykur Sansónpa qanchis piltankunata ruturasirqan. Saynöpa Sansón kalpaynaq rikakuskiptinmi 20sinchipa nirqan: <<¡Sansón, filisteo runakuna janaykichönami!>>

Saymi Sansón rikcharkamur yarparqan imaypis salvakushqannöla salvakuyta. Isanqa manami musyarqansu Tayta Dios manana yanapashqanta. 21Saynami filisteo runakuna jinan höra Sansónta prësu sariykur nawinkunatapis jorquyarqan. Gaza markaman prësu apaykuyashpanmi bronci cadinawan watayarqan carcilcho rumi mulinuta tumasinanpaq. 22Saycho prësu kaykaptilanmi aqsanpis yapay winarqan.

Sansón wanushqan

23Saypitanami filisteo runakunapa mandaqninkuna shuntakäyashpan diosnin Dagónpaq sacrificiukunata rupasiyarqan. Saycho kushikurmi say mandaqkuna niyarqan: <<¡Contransi Sansóntami diosninsi Dagón munayninsiman churamush!>>

24Sansónta rikaykurmi runakuna diosninta alabar niyarqan: <<¡Mikuyninsikuna ushakäsiq y wanusimaqninsi Sansónta diosninsi Dagónmi munayninsiman churamush!>>

25Sayno kushikurmi niyarqan: <<¡Sansónta puklakunansipaq apayämuy!>>

Saymi carcilpita apaykuyaptin pasaypa burlakuyashpan templu tuknaraq ishkay columna chawpinman ichiykasiyarqan.

26Saynami janchaqnin maqtata Sansón nirqan: <<Templu tuknaraq columnata yatasimay tuknakunäpaq>>.

27Say hörami templu rurincho filisteo runakunapa mandaqninkunawan saysika runakuna kaykäyarqan. Templu jananchöpis Sansónta burlakuyashqanta rikäkurmi warmipis olqupis kimsa waranqano (3,000) kaykäyarqan.

28Saymi Tayta Diosta manakur Sansón nirqan: <<Tayta Dios, kalpä yurinanpaq kananlana yapay yanapaykalämay. Saynöpami ishkan nawïta jorquyashqanpita juk golpila filisteo runakunata wanusishaq>>.

29Sayno manakuskirmi templuta tuknaraq ishkan columnakunaman tuknakurqan isuq kaq makinwan jukaqta y aluq kaq makinwanna jukaqta. 30Nirkurmi sinchipa nirqan: <<¡Filisteo runakunawan juntu ushakäshaq!>>

Sayno nir lapan kalpanwan columnakunata tanqariptinmi templu juchur nitirqan lapan runakunata y mandaqninkunatapis. Filisteo runakunata puntata wanusishqanpitapis say hörami mas aska runakunata Sansón wanusirqan.

31Saypitanami Sansónpa wawqinkunawan lapan castankuna aywar ayanta pampaq apakuyarqan. Papänin Manoa pamparashqanman apaykurmi Sansóntapis pampayarqan. Say kaykan Zora y Estaol markakuna chawpinchömi. Sansónqa Israel runakunapa jueznin karqan ishkay chunka (20) watami.

Currently Selected:

Jueces 16: qvhB

Highlight

Copy

Compare