Jueces 15

Filisteo runakunapa chakrankunata Sansón rupasishqan

1Saypita trïgu cosëcha wisanmi Sansónqa malta cabrata apakurkur warmin watukaq kutirqan. Chaykurmi suedrunta nirqan: <<Warmï watukaqmi shamushkä, papä. Mä punukunanman yaykurishaq>>.

Sayno niptinmi suedrunqa yaykunanta mana munar 2nirqan: <<Noqa yarpashkä surïta kacharishqaykitanami. Saymi jukwanna warmikita taykäsï. Sayno kaptinpis shulka nanan paypita mas kuyaylapaqmi kaykan. Mayor kaqpa trukan paywanna täkuy>>.

3Sayno niptinmi Sansón nirqan: <<Kananqa kikikikunami rabyanäsiyämashkanki qamkunata y filisteo mayikikunata perjuiciuta ruranäpaq>>.

4Saypita aywakurmi kimsa pachak (300) atuqkunata sarirkur ishkay ishkay chupanpita shinrirqan. Nirkurmi chupanman wataparqan aceitiwan ushmash träputa. 5Träpukunata sarirkasir filisteo runakunapa chakrankunapa atuqkunata qarquriptinmi nina ruparqan achush qoturaykaq trïguta, achüni kaykaq trïguta, üva jachakunata y olïvu jachakunatapis.

6Sayno rupashqanta rikaykurmi filisteo runakuna niyarqan: <<¿Pitaq kayta ruraykush?>>

Saymi niyarqan: <<Timnat runapa mashan Sansónmi rupasish suedrun juk runawan warminta täsishqanpita>>.

Saymi filisteo runakuna Sansónpa warminta taytantinta rupaskasiyarqan. 7Sayta musyaykurmi filisteo runakunata Sansón nirqan: <<Kayta rurayashqaykipita qamkunata mana ushakäsirqa manami jutïtapis aparäshaqsu>>.

8Sayno nir fiyupa rabyashpanmi saysika filisteo runakunata wanusir ushaykurqan. Nirkurnami Etam qaqacho kaykaq machayman taq aywakurqan.

Filisteo runakunata Sansón wanusishqan

9Saymi filisteo runakuna Judá trïbu runakuna täyashqan partiman aywaykur campamentunkunata sharkasiyarqan. Nirkurmi Lehi marka nawpankunaman churanakuyarqan Israel runakunata atacayänanpaq. 10Saymi Judá trïbu runakuna tapur niyarqan: <<¿Imanirtaq atacayta munaykäyämanki?>>

Saymi filisteo runakuna niyarqan: <<Sansónta prësu sariqmi shayämushkä. Marka mayïkunata wanusishqannömi kikintapis wanusiyäshaq>>.

11Sayno niyaptinmi kimsa waranqa (3,000) Judá trïbu runakuna aywayarqan Etam qaqacho kaykaq machayman. Chaykurmi Sansónta niyarqan: <<¿Manaku musyanki filisteo runakuna mandamaqninsi kayashqanta? ¿Imanirtaq paykunata sayno rabyanäsishkanki?>>

Sayno niyaptinmi Sansón nirqan: <<Paykuna rurayämashqannölami noqapis rurashkä>>.

12Saymi Judá trïbu runakuna niyarqan: <<Noqakuna shayämushkä prësu apaykur filisteo runakunapa makinman churanäpaqmi>>.

Niptinmi Sansón nirqan: <<Prësu sarimarpis isanqa ama wanusiyämaysu>>.

13Sayno niptinmi niyarqan: <<Manami wanusiyäshaykisu, sinöqa filisteo runakunapa munayninmanmi churayäshayki>>.

Sayno nirmi ishkay mushuq waskawan liyarkur pakarashqan machaypita Sansónta jorqayämurqan.

14Lehi markaman chäsiyaptinmi filisteo runakuna seqaypa kushikur taripäyarqan. Saymi jinan höra Tayta Diospa Espïritun yanapaptin Sansónqa liyaraykashqan waskatapis rachirirqan liptayash jïlutanöla. 15Nirkurmi ashnupa chakawlan manaraq shumaq sakiq jitaraykaqta aptarkur wanuykasirqan waranqantin (1,000) filisteo runakunata. 16Nirkurmi nirqan:

<<Ashnupa chakawlalanwanmi purwa purwataraq runakunata wanusishkä.

Ashnupa chakawlalanwanmi waranqantin runakunata wanusishkä>>.

17Sayno nirmi aptaraykashqan chakawlata jitaskirqan. Saypitami say partipa jutin kaykan Ramat-lehi.#15.17 Ramat-lehi ninanqa Chakawla Löma ninanmi.

18Filisteo runakunata wanuykasirmi Sansón fiyupa yakunashpan Tayta Diosta manakur nirqan: <<¿Saysika runakunata wanusinäpaq yanapaykämarku yakunaypita wanunäta munaykanki? Wanunaykaqtachir qamman mana yärakamuq runakuna sariyämanqa>>.

19Sayno manakuptinmi uchkupita yakuta Tayta Dios pashtasimurqan. Sayta upurkuptinmi Sansónpa valornin yapay yurirkurqan. Saypitami Lehicho kaykaq yaku pashtaqta kananyaqpis reqiyan En-hacore jutiwan.#15.19 En-hacore ninanqa Manakuqpa Pukyun ninanmi.

20Ishkay chunka (20) watami Israel runakunapa jueznin Sansón karqan. Say karqan filisteo runakuna munayyuq kayashqan wisanmi.

Currently Selected:

Jueces 15: qvhB

Highlight

Copy

Compare