Jueces 14

Jamusikuyta Sansón nishqan

1Juk junaq Timnat markaman Sansón aywarmi saycho filistea jipashta rikaykur pasaypa kuyakurkurqan. 2Saymi wayinman kutiykur mamanta y taytanta nirqan: <<Timnat markachömi kuyaylapaq filistea jipashta rikashkä. Say jipashta warmïpaq ashipaykayämay>>.

3Sayno niptinmi mamanwan taytan niyarqan: <<¿Imanirtaq filistea jipashtaraq warmikipaq munanki? Filisteo runakunaqa manami Tayta Diosman yärakuyansu. ¿Manaku Israel mayinsicho jipashkuna kan?>>

Saymi Sansón nirqan: <<Say jipashtami kuyä. Payta ashipaykayämay>>.

4Sansónpa mamanwan taytan manami tantiyayarqansu filisteo runakunata wajupänan rayku Tayta Dios say yarpayta Sansónman churaykashqanta. Say wisanmi filisteo runakunapa munaynincho Israel runakuna kaykäyarqan.

5Mamanwan y taytanwan Timnatman aywar üva chakrapa päsaykäyaptinmi Sansónta juk malta león qaparashpan atacarqan. 6Tayta Diospa Espïritun yanapaptinmi imayka kapish malwata rachiriqnöla pulanpa rachiriykurqan. Sayno wanusishqanta manami mamanta ni taytanta wilaparqansu. 7Timnatman chaykurnami kuyashqan jipashwan parlar Sansón kushikurqan.

8Saypita markanman kutishqanpitami Timnatman yapay aywarqan jipashta jorqamuq. Aywaykashqancho wanusishqan leonta rikaq yaykurmi leonpa aysancho saysika abëjata y mishkinta Sansón tarirqan. 9Say mishkita jorquskirmi mikuraykar aywarqan. Mamantawan taytanta taripaskir yawasirpis manami wilarqansu maypita jorqushqantapis.

10Timnatman chaykurnami Sansónpa taytan aywarqan jipashpa wayinman. Saychömi paykunapa costumbrin kashqanno majasakay fiestata Sansón rurarqan. 11Sansónta rikaykurmi filisteo runakuna kimsa chunka (30) maqtakunata qayasiyarqan paywan mikur upur kayänanpaq. 12Fiestaman chäyaptinmi say maqtakunata Sansón nirqan: <<Juk jamusikuyta#14.12 Wakin runakunaqa adivinanzata niyanmi. niyäshayki. Qanchis junaq fiesta kashqanyaq nishqäta asirtayaptikiqa cada ünuykitami qarayäshayki fïnu lïnupita rurash mödanata y fiestaman aywayänaykipaq mödanatapis. 13Mana adivinarmi isanqa cada ünuyki qoyämanki fïnu lïnupita rurash mödanata y fiestaman aywanäpaq mödanata>>.

Saymi paykuna niyarqan: <<Mä niyämay say jamusikuyta. Noqakuna wiyayäshaykimi>>.

14Saymi Sansón nirqan:

<<¿Imataq imataq kalä?

Mikukuq kaptïpis noqachömi mikuy yurish.

Kalpayuq kaptïpis noqapitami mishkita jorqush>>.

Say jamusikuy ima kashqantapis manami say maqtakuna kimsa junaqchöpis tantiyayarqansu. 15Chusku junaqchönami Sansónpa warminta niyarqan: <<Runayki Sansónta tapuy say jamusikuy ima kashqantapis wilayämänaykipaq. Mana wilayämaptikiqa wayikicho kaqkunata lapaykitami rupasiyäshayki. ¡Qamkunaqa kay fiestaman qayasiyämashkanki pobrisayämänayki kashqami!>>

16Sayno niyaptinmi Sansónta waqapashpan warmin nirqan: <<¡Manami kuyamankisu! ¡Kuyamänaykipa trukanqa chikiykämankimi! Rasunpaypa kuyamarqa marka mayïkunata nishqayki jamusikuyta wilamankimanmi>>.

Niptinmi Sansón nirqan: <<Mamätapis taytätapis manami wilashkäsu. ¿Saysuraq qamta wiläman?>>

17Jamusikuy ima kashqantapis mana wilaptinmi warmiqa fiesta ushakashqanyaq waran waran waqaparqan. Mana jamaypa tapuykaptinmi fiesta ushay qanchis junaqchöqa warminta änir Sansón wilarqan. Wilaykuptinmi warmin jukla marka mayinkunata wilaq aywarqan.

18Saymi fiesta ushanan qanchis junaqchöqa inti manaraq jeqaptin filisteo maqtakuna Sansónta niyarqan:

<<Abëjapa mishkinpitaqa imapis manami mas mishkinsu.

Ni leonpita mas kalpayuqqa manami imapis kansu>>.

Sayno niyaptinmi Sansón nirqan: <<¡Ternëräta mana yügurqa manami musyayankimansu karqan!>>

19Nirkur Tayta Diospa Espïritun yanapaptinmi Ascalón markaman aywaykur kimsa chunka (30) runakunata wanusirqan. Say runakunapa mödanankunata apaykurmi jamusikuynin ima kashqantapis niq maqtakunata aypurqan. Sayno rurarkurnami Sansón fiyupa rabyash taytanpa wayinman kutikurqan. 20Sayyaqmi Sansónpa warminta papänin täsirqan say fiestaman aywaq maqtawan. Say maqta karqan Sansónpa yanasanmi.

Currently Selected:

Jueces 14: qvhB

Highlight

Copy

Compare