Jueces 13

Sansón yurishqan

1Saypitanami Israel runakuna mana cäsukur Tayta Diosta yapay rabyanäsiyarqan. Saymi Tayta Dios kachariykuptin filisteo runakuna chusku chunka (40) watantin nakasiyarqan.

2Say wisanmi Dan trïbupita Manoa jutiyuq runa Zora markacho tarqan. Warmin qoluq kaptinmi surin karqansu. 3Juk junaqmi Manoapa warminta Tayta Diospa angilnin yuripaykur nirqan: <<Kananyaq qoluq kash karpis olqu wawatami tarinkipaq. 4Wawayki yurishqanyaq vïnuta ni ima shinkäsikuqtapis ama upunkisu. Saynöpis impüru kaq uywakunata#Lev. 11. ama mikunkisu. 5Pachaykicho kaykaptilanmi wawaykita Tayta Dios akranqa nazareo kananpaq.#Núm. 6.1-21. Saymi aqsanta imaypis rutukunqasu. Paymi Israel runakunata filisteo runakunapa munaynincho kayashqanpita jorqur qalaykunqa>>.

6Ángel sayno niptinmi runanta wilar nirqan: <<Tayta Diospa wilakuqninmi chämush. Kikin Tayta Diospa angilnin niraq mansariypaqmi kash. Manami maypita kashqanta ni pï kashqantapis tapushkäsu, ni paypis manami wilamashsu. 7Paymi nimash wamransi olqu kananpaq kashqanta. Kananpitaqa manashi upushaqsu vïnuta ni ima shinkäsikuqtapis. Impüru kaq uywakunatapis manashi mikushaqsu. Manaraqpis yuriptinshi wamransita Tayta Dios akranqa yurishqanpita wanushqanyaq nazareo kananpaq>>.

8Sayno niptinmi Tayta Diosta manakushpan Manoa nirqan: <<Tayta Dios, say runata yapay kachaykalämuy surï yuriptin imano ashmanäpaqpis tantiyaykasimänanpaq>>.

9Sayno manakuptinmi Manoapa warminta ángel yapay yuriparqan chakracho kikilan kaykaptin. 10Saymi warmiqa wayrala aywaykur Manoata nirqan: <<¡Jaylay! ¡Jukpun yuripämaq runami yapay chämush!>>

11Saymi Manoa jinan höra aywarqan runa kaykashqan kaqman. Chaykurmi nirqan: <<¿Qamku warmïwan parlaq runa kaykanki, taytay?>>

Sayno niptinmi nirqan: <<Aw, noqami say runa kaykä>>.

12Saymi Manoa tapurqan: <<Nishqaykino surï yuriptin ¿imanötaq ashmashaq?>>

13Saynami Tayta Diospa angilnin nirqan: <<Lapan yäsishqäkunata warmiki cumplisun. 14Ama mikusunsu üvata ni päsastapis. Saynöpis ama upusunsu vïnuta ni ima shinkäsikuqtapis. Impüru kaq uywakunatapis ama mikusunsu. Nishqänöla lapanta cumplisun>>.

15Saymi Tayta Diospa angilninta Manoa nirqan: <<Cabra malwata pishtarir mikuyta yanukamushqäyaq kaycho jamapaykay, taytay>>.

16Sayno niptinmi ángel nirqan: <<Yanukamuptikipis manami mikushaqsu. Qaramänaykipa trukanqa cabra malwata Tayta Diospaq rupasina sacrificiuta rupasiy>>.

Sayno nikaptinpis Manoa manami tantiyarqansu Tayta Diospa angilnin kashqanta.

17Saymi angilta nirqan: <<Nimashqaykikuna cumpliptin agradëcikuyänäpaq jutikita wilaykalämay, taytay>>.

18Sayno niptinmi ángel nirqan: <<¿Imapaqtaq jutïta musyayta munanki? Jutïtaqa manami pipis tantiyayta kamäpakunsu>>.

19Saynami Manoaqa cabra malwata y saki mikuyta jatun rumi jananman churaykur Tayta Diospaq rupasirqan. Rupaykäsiptinmi Manoata y warminta Tayta Dios rikasirqan imaypis mana rikayashqan milagruta. 20Saymi altarpita nina sharkuptin warminwan Manoa rikayarqan Tayta Diospa angilnin nina chawpinpita jana pasaman wisaykaqta. Sayta rikaykurmi mansakäyashpan ishkanpis pasaman jukla lätakuykuyarqan. 21Nina chawpinpita wisaykaqta rikarmi Manoa tantiyarqan Tayta Diospa angilnin kashqanta. Saypitaqa mayqantapis ángel mananami yuriparqannasu. 22Saymi warminta Manoa nirqan: <<¡Tayta Diostami rikashkansi! ¡Kananqa wanushunchir!>>

23Sayno niptinmi warmin nirqan: <<Wanusiyta munamashpansiqa Tayta Dios manami chaskimashwansu karqan rupasina sacrificiutawan mikuyta rupasishqansitapis. Manami imatapis rikasimashwansu karqan ni wilapämashwansu karqan>>.

24Saypita killan tinkuptinnami olqu wamrata qeshyakur jutisirqan Sansón jutin kananpaq.#Heb. 11.32. Shakshaylantami Sansónta Tayta Dios lapanchöpis yanaparqan. 25Mahané-dan particho taykaptinmi Tayta Diospa Espïritun Sansónta yanapaykashqanta runakuna tantiyakuyarqan. Say partiqa Zorawan Estaol markakunapa chawpinchömi kaykan.

Currently Selected:

Jueces 13: qvhB

Highlight

Copy

Compare