Jueces 11
11
Israel runakunata Jefté salvashqan
1Galaad particho taq juk ali chölupa jutinmi karqan Jefté.#Heb. 11.32. Papäninpa jutinmi karqan Galaad. Mamannami karqan prostitüta. 2Legïtimu warminchöpis Galaadpa surinkuna kayarqanmi. Paykuna winarkurmi wayinpita Jeftéta qarqur niyarqan: <<Qamqa kaykanki papänïpa suripakuylanmi. Paypa kaqtaqa ima herenciatapis manami rakipäyäshaykisu>>.
3Saymi qarquyaptin Tob partiman Jefté aywakur asaltantikunawan shuntakaykur suwakur purirqan.
4Say wisanmi amonita runakuna Israel runakunata atacayarqan. 5Saymi Galaad particho taq Israel mayor runakuna Tob partiman aywaykur Jeftéta 6niyarqan: <<Amonita runakunawan pelyayaptï mandaqnï kanaykitami munayä, taytay>>.
7Sayno niyaptinmi Jefté nirqan: <<Qamkuna ¿manaku chikiyämashpayki taytäpa wayinpita qarqayämashkanki? Qarqaykäyämarqa ¿ima cäraykikunawantaq shayämunki yanapänäta munar?>>
8Saymi Galaadpita aywaq mayor runakuna niyarqan: <<Runakuna atacayämaptin ima ruraytapis mana kamäpakurmi qamman shayämushkä, taytay. Aywaykuläshun amonita runakunawan pelyäsiyämänaykipaq. Pelyäsiyämaptikiqa Galaad particho mandaqnï kanaykipaqmi churayäshayki>>.
9Sayno niyaptinmi Jefté nirqan: <<Amonita runakunata vincinäpaq Tayta Dios yanapämaptinqa ¿rasunpaku mandaqnikikuna kanäpaq churayämanki?>>
10Saymi Galaadpita aywaq mayor runakuna niyarqan: <<Imatapis niyämashqaykita rurayänäpaqmi Tayta Dios rikaykämash promitiyä>>.
11Sayno niyaptinmi paykunawan Jefté aywarqan. Galaadman chaykuyaptinnami runakuna payta churayarqan mandaqnin kananpaq. Guërracho yanapänanpaq Galaadcho nishqannölami Mizpaman aywaykur Tayta Diospa nawpanchöpis Jefté nirqan.
12Saypitanami amonita runakunapa mandaqnin reyman kachakunata Jefté kacharqan. Chaykurmi niyarqan: <<¿Imanirtaq nacionnïman yaykamur atacayämashkanki?>>
13Sayno niyaptinmi amonita runakunapa mandaqnin rey nirqan: <<Egiptupita yarqakamurmi Arnón mayupita Jaboc mayuyaq y hasta Jordán mayuyaq nacionnïpita qamkuna chakräkunata y markäkunata qechuyämarqayki. Kananqa imapis manaraq kashqanyaq kutiykasiyämay>>.
14Sayno nishqanta wilayaptinmi amonita runakunapa mandaqnin reyman kachakunata Jefté yapay kacharqan. 15Chaykurmi say kachakuna niyarqan: <<Kaynömi Jefté nin:
<< <Noqakunaqa manami moabita runakunapa ni amonita runakunapa nacionninpita mayqan partitapis qechuyashkäsu.#Núm. 21.24; Deut. 2.19. 16Unay ayllükunaqa Egiptupita yarqamur sunyaq jirkapa päsamurmi Puka Lamarman chäyämurqan. Saypita päsamurmi Cadesyaq chäyämurqan. 17Sayman chaykamurmi Edom nacionpa mandaqnin reyta ruwakuyarqan nacionninpa päsakayämunanpaq. Sayno ruwakuyaptinpis manami munarqansu. Saynölami Moab nacionpa mandaqnin reytapis ruwakuyaptin paypis nacionninpa päsayämunanta munarqansu.#Núm. 20.14-21. Saynöpami Cadeslacho posädakuyarqan.
18<< <Päsayämunanta mana munayaptinmi Edom#Núm. 21.4. y Moab nacionkuna lindërunkuna nawpalanpa sunyaq jirkapana tumayarqan. Inti jeqamunan kaqläpa aywar Arnón mayuman chaykurmi campamentunkunata sharkasiyarqan. Isanqa manami moabita runakuna täyashqanman simpayarqansu.
19<< <Saypitanami unay ayllükunaqa kachakunata kachayarqan amorreo runakunapa mandaqnin rey Sehónman. Paymi Hesbóncho tarqan. Chaykurmi niyarqan: <<Aywaykäyashqä kaqman chäyänäpaq nacionlaykipa päsakuykuyäläshaq, taytay>>.
20<< <Sayno niyaptinpis resilashpanmi Sehón munarqansu Israel runakuna nacionninpa päsayänanta. Saypa trukanqa soldädunkunawan aywar Jahazacho campamentunkunata rurarkur unay ayllükunawan pelyayarqan. 21Tayta Dios yanapaptinmi rey Sehónta y paywan kaykaq runakunata ushakäsiyarqan. Saynöpami say particho taq amorreo runakunapa markankunapis y chakrankunapis noqakunapana kaykan. 22Say parti karqan Arnón mayupita Jaboc mayuyaq y sunyaq jirkapita Jordán mayuyaqmi.#Núm. 21.21-24.
23<< <Kikin Tayta Diosmi amorreo runakunata qechuskir noqakunata say partita qoykayämarqan. ¿Sayno kaykaptinku qamkuna qechuyämayta munaykäyanki? 24Quemos diosniki qoyäshushqaykikunaqa qamkunapaqmi kanqa y Tayta Diosnï qoyämashqankunaqa noqakunapaqmi kanqa.
25<< <Moab nacionpa mandaqnin rey Ziporpa surin Balacpita#Núm. 22.1-6. ¿mas munayyuq kayashqaykitaku yarpaykäyanki? Payqa manami Israel runakunata imaypis atacashsu ni wajupashsu.
26<< <Saynöpis kimsa pachak (300) watanami Hesbón markapita Aroer markayaq lapan say chakrakuna y markakuna Israel runakunapana kaykan. Saypita pasami Arnón mayu nawpancho kaq markakunapis Israel runakunapana kaykan. Shuntayta munaykarqa ¿imanirtaq kananyaq shuntayashkankisu? 27Saynöpis kananqa manami noqakunasu qamkunata wajupaykäyä, sinöqa qamkunami wajupaykäyämanki. Kananqa juezninsi Tayta Dios juzgamäshun noqakunata karpis o qamkunata karpis> >>.
28Jefté sayno wilakasiptinpis amonita runakunapa mandaqnin rey manami cäsuparqansu.
Tayta Diosta Jefté promitishqan
29Saymi Tayta Diospa Espïritun valurasiptin Jeftéqa Manasés trïbu runakuna täyashqan Galaad partipa runakunata shuntar tumamurqan. Galaad particho kaykaq Mizpaman kutiykurnami shuntashqan runakunata pushakurkur amonita runakunawan pelyaq Jefté aywarqan. 30Yarqushqan hörami Tayta Diosta promitir Jefté nirqan: <<Amonita runakunata asulayänäpaq yanapäyämaptikiqa 31wayïman kutiptï pipis chaskikamaq punta yarqamuq kaqmi qampaq rupasina sacrificiu kanqa>>.
32Saypitanami amonita runakuna täyashqan partiman chaykuptin Jeftéta Tayta Dios yanaparqan paykunata asulayänanpaq. 33Aroer markapita Minitman y saypita Abel-queramimman chashqanyaqmi amonita runakunapa ishkay chunka (20) markankunata ushakäsiyarqan. Saynöpami amonita runakunata Israel runakuna vinciyarqan.
34Mizpaman kutir wayinman Jefté chaykaptinmi juklayla warmi surin panderëtata tukar tushuraykar tariparqan. Jeftépa manami mas surin karqansu olqupis ni warmipis. 35Saymi surinta rikärir fiyupa lakikur mödanantapis rachishpan Jefté nirqan: <<¡Ay hïja! ¡Kananqa fiyupa lakikuymanmi churaykamashkanki! ¿Ima höräraq yarqaykämurqaykipis? Tayta Diosta promitishqätaqa imanöpapis cumplishaqchir>>.#Núm. 30.2.
36Sayno niptinmi surin nirqan: <<Amonita runakunata vinciyänaykipaq yanapaykäshuptikiqa Tayta Diosta promitishqaykita imanöpapis cumpliy, papä. 37Isanqa ruwakuläshayki. Doncëllala wanukunäpaq kaykaptinqa ishkay killa yanasäkunawan jalqakunapa waqar puriykamushaqraq>>.
38Sayno ruwakuptinmi Jefté awnirqan. Saymi yanasankunawan ishkay killa jalqakunapa waqar purikurqan. Sayno waqayarqan doncëlla kaykälar wanukunanpaq kaptinmi. 39Ishkay killa cumplirkur papänin kaqman kutiykuptinmi Tayta Diosta promitishqannöla Jefté rurarqan. Saynöpami Jeftépa surin doncëllala wanukurqan. 40Saypita pasami Israel jipashkuna cada watacho chusku junaqyaq Jeftépa surinpaq waqar puriyan.
Currently Selected:
Jueces 11: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
