Oseas 1

1Kaychömi qelqaraykan Tayta Diospa wilakuyninta Beeripa surin Oseas wilakushqan. Judá nacioncho Uzías rey kaykänan wisanmi Oseas wilakurqan.#2Rey. 15.1-7; 2Crón. 26.1-23. Saynölami wilakurqan Jotam rey kaykänan wisan,#2Rey. 15.32-38; 2Crón. 27.1-8. Acaz rey kaykänan wisan#2Rey. 16.1-20; 2Crón. 28.1-27. y Ezequías rey kaykänan wisanpis.#2Rey. 18.1—20.21; 2Crón. 29.1—32.33. Israel nacionchönami Joáspa surin Jeroboam rey kaykarqan.#2Rey. 14.23-29.

Prostitütawan majasakänanpaq Oseasta Tayta Dios mandashqan

2Puntata parlaparmi Oseasta Tayta Dios nirqan: <<Prostitüta warmiwan majasakar paycho surïkuy. Israel runakuna noqata kachariykayämashpan juk dioskunata adorarmi prostitüta warmino kaykäyan>>.

Oseaspa surinkuna yuriyashqan

3Saymi Diblaimpa surin Gomerta warminpaq Oseas ashirqan. Say warmichömi Oseaspa qechpa surin olqu yurirqan. 4Saymi Oseasta Tayta Dios nirqan: <<Jezreel markacho saysika runakunata Jehú wanusishqannömi#1.4 Jezreelchömi Jehú wanusirqan Israel nacionpa mandaqnin rey Joramta (2Rey. 9.24), Acabpa warmin Jezabelta (2Rey. 9.33), Acabpa wakin ayllunkunata, Acabwan kuyanakushqan amïgunkunata y Acab churashqan cürakunatapis (2Rey. 10.11). noqapis castigar Jehúpita miraqkunata wanusishaq. Sayno castigaptïmi Israel nacionpa mandaqnin reykuna kayanqanasu. Sayno ruranäpaq kashqanta musyayänanpaq surikipa jutinta churapay Jezreel jutin kananpaq. 5Saynöpis Israel nacionpa soldädunkunata Jezreel pampachömi ushakäsishaq>>.

6Saypitanami Oseaspa warmin Gomer qeshyakurqan warmi wamrata. Saymi Oseasta Tayta Dios nirqan: <<Say surikita jutisiy Lo-ruhama#1.6 Lo-ruhama ninanqa mana kuyash ninanmi. jutin kananpaq. Sayno jutin kanqa Israel runakunata manana kuyapänäpaq kaptinmi. Paykunata mananami perdonashaqnasu.

7<<Judá nación runakunatami isanqa kuyapar kikï salvashaq. Manami guërrawansu, flëchawansu, espädawansu, cawalluwansu ni cawalluta loqaraq#1.7 Wakin runakunaqa muntaraq niyan. soldädukunawansu salvashaq, sinöqa munaynïwanmi>>.#Zac. 4.6.

8Lo-ruhamata wasqirkurnami Gomer yapay qeshyaq rikakurqan. Say wawan olqumi yurirqan. 9Saymi Oseasta Tayta Dios nirqan: <<Surikita jutisiy Lo-ammi#1.9 Lo-ammi ninanqa manami noqapasu ninanmi. jutin kananpaq. Say jutin kanqa Israel runakuna noqapa manana kayashqanta tantiyakuyänanpaqmi. Mananami noqapis paykunapa Diosninnasu kashaq>>.

Israel runakuna alina kawayänanpaq nishqan

10 10 (2.1) <<Saypitanami Israel runakunata yanapäshaq saysikaman mirayänanpaq.

Lamar kuchuncho aqushanöraqmi yupaytapis mana atipaypaq saysikaq kayanqa.#Gén. 22.17.

<Paykunaqa manami noqapanasu> nishqä partichöpis runakuna niyanqa:

<Paykunaqa imayyaqpis kawaq Tayta Diospa wamrankunami kaykäyan>.#Rom. 9.25-26.

11 11 (2.2) Saymi Judá nación runakuna y Israel nación runakuna juk nacionlana kayanqa.

Mandaqnin reytapis juklaylatanami churayanqa.

Maysay nacionkunacho kayashqanpita kutiyaptinmi kushikuypaq kanqa.

Say junaqtami jutisiyanqa Jezreel#1.11 Jezreel ninanqa Diosmi murun ninanmi. Sayno nin Israel runakunata muruman tinkusirmi. Israel runakunata nacionninman kutisir askaqman mirayänanpaq kamakäsirmi chakraman muruta muruqno Tayta Dios kanqa. jutin kananpaq.

Currently Selected:

Oseas 1: qvhB

Highlight

Copy