Génesis 42

Josépa wawqinkuna Egiptuman aywayashqan

1Egiptucho trïgu rantipä kaykashqanta musyaykurmi surinkunata Jacob nirqan: <<¿Imatataq kaycho ruraykäyanki jukniki jukniki rikapänakur? 2Egiptuman aywaqkunami wilayämash saycho trïgu rantipä kashqanta. Qamkunapis trïgu rantiq aywayay. Mana aywayaptikiqa ¿imata mikurtaq kawashun?>>#Hech. 7.12.

3Sayno niptinmi Josépa chunka wawqinkuna Egiptuman trïgu rantiq aywayarqan. 4Isanqa <<imapis surïta päsaykunmanchi>> nirmi Josépa wawqin Benjamín aywananta Jacob munarqansu.

5Saynöpami Israelpa#42.5 Israelqa Jacobpa jukaq jutinmi karqan. surinkuna trïgu rantiqkunawan walkinakur Egiptuman chäyarqan. Intëru Canaánchömi fiyupa muchuy karqan.

6Egipto nacionpa gobernadornin karmi maysay nacionpita trïgu rantiq aywaqtapis José rantikuq. Saymi Josépa wawqinkuna trïgu rantiq chaykur urkunkunapis pasaman töpashqanyaq nawpanman qonqurpakuykuyarqan. 7Wawqinkunata rikaskir juklami José reqiskirqan. Reqiykarpis mana reqiq tukurmi ayaq shiminpa tapur nirqan: <<¿Maypitataq qamkuna kaykäyanki?>>

Sayno tapuptinmi niyarqan: <<Taytay, noqakuna Canaánpitami trïgu rantiq shayämushkä>>.

8José reqiptinpis wawqinkunaqa manami reqiyarqansu. 9Say hörami José yarparkurqan paykunapaq imano sueñushqantapis.#Gén. 37.5-10. Saymi nirqan: <<Qamkuna kaykäyanki musyapakuqmi. Saymi kay nacionman maypa yaykayämunaykipaqpis rikapakuq shayämushkanki>>.

10Sayno niptinmi niyarqan: <<¡Manami, taytay! Noqakunaqa trïgu rantiqlami shayämushkä. 11Noqakuna lapäkunapis juk taytalapitami kaykäyä. Manami imaypis runapa markanta rikapakur puriyäsu>>.

12Sayno niyaptinmi José yapay nirqan: <<Qamkuna lulakuykäyankimi. Rasunpaypami kay nación imano kashqantapis rikapakuyänaykipaq shayämushkanki>>.

13Saymi paykuna niyarqan: <<Noqakuna juk taytalapita chunka ishkay wawqimi kaykäyä. Lapäkunapis Canaánchömi taykäyä. Shulka kaq wawqiläkunami papänïwan quëdamush. Juk wawqïkunami isanqa elaqash>>.

14Sayno niyaptinpis José nirqan: <<Nishqänöpis qamkuna rasunpaypami marka imano kashqantapis rikapakuq kaykäyanki. 15Kananmi musyashaq qamkuna rasun kaqta parlaykäyashqaykita o lulakuykäyashqaykitapis. Faraónpa jutincho jurashpämi nï: <Manami mayqaykipis kaypita aywayankisu shulka wawqikita kayman manaraq chäsimurqa. 16Wakinniki kaycho prësu quëdayashqaykiyaq mayqaykipis nunush wawqikita pushamuq kutiyay. Mana chäsimurqa rasunpaypami marka rikapakuq kaykäyanki>. Sayno kananpaq noqa nï Faraónpa jutincho jurashpämi>>.

17Sayno nirmi carcilcho kimsa junaq paykunata José wichqaräsirqan.

18Kimsa junaqchönami José nirqan: <<Tayta Diostami mansapakü. Saymi nishqäkunata rurayaptikiqa wanusiyäshaykisu. 19Rasunpaypa mana rikapakuq karqa juk wawqilaykita prësu kachaykuyay. Wakinnikiqa aylluykikuna mikuyänanpaq trïguta apakurkur aywayay. 20Nirkurna kutiyämunki shulka wawqikita pushakurkur. Saynöpami noqa musyashaq niyashqayki rasunpaypa kashqanta. Mana chäsimurqa wanuyankimi>>.

José sayno niptinmi paykuna awniyarqan.

21Nirkurnami kikinpura parlar niyarqan: <<Wawqinsita mana kuyapashqansipitami kayjinanpa nakaykansi. Kacharinansipaq sayjinanpa ruwakaykämashqapis manami kuyapaykurqansisu>>.

22Sayno niyaptinmi Rubén nirqan: <<Say wamrata imatapis mana rurayänaykipaq chunkapis nirqämi.#Gén. 37.21-22. Sayno nikaptïpis qamkuna manami cäsukayämarqaykisu. Kananqa kikinsipa jusansipitami nakaykansi>>.

23Egipto runakunapa idiömancho José parlapaptin juk runaraqmi wawqinkunata tantiyasirqan. Saymi musyayarqansu paykuna parlayashqanta José tantiyaykashqanta. 24Josénami fiyupa waqanashpan wawqinkunapita jukläman aywaykur waqarqan. Waqashqanpita kutiykurmi yapay parlaparqan. Nirkurnami Simeónta akraykur paykunapa nawpancho watasirqan.

25Saypitanami ashmayninta nirqan costalninkunaman trïguta winapänanpaq. Saynöpis nirqan trïgupa chanin qellayta costalninkunaman jatiparkunanpaq y mirkapatapis qepipänanpaq. José nishqannölami lapantapis rurarqan. 26Saymi ashnunkunaman trïguta chaqnakurkur#42.26 Wakin runakunaqa cargakurkur niyanmi. aywakuyarqan.

27Kutiykäyashqancho posädakurmi ashnunkunata trïguta qarapakunanpaq costalninta juknin kichapakurqan. Saychömi costalnin shimincho qellaynin winaraykaqta tarirqan. 28Saymi wawqinkunata nirqan: <<¡Kaychi kaylaqa! ¿Imanataq kay? ¡Pägashqä qellaytami costalnïman jatipaykamash!>>

Sayno niptinmi lapan mansakäyashpan suksukyarraq jukninpis jukninpis niyarqan: <<¿Imaykamannataq Tayta Dios kacharpamashkansi?>>

29Canaánman kutiykurmi Egiptucho ima päsashqankunatapis papäninta wilapar niyarqan: 30<<Egipto nacionpa mandaqnin runa ayaq shiminpami parlapäyämash. Say nación imano kashqantapis rikapakuq aywayashqätami payqa yarpash. 31Sayno niyämaptinmi noqakuna niyashkä ali runa kayashqäta y imaypis rikapakuq mana kayashqäta. 32Saynöpis wilayashkä juk taytalapita chunka ishkay wawqi kayashqätami. Saynöpis wilayashkä juk wawqï elaqashqanta y nunush kaqna qamwan kaycho quëdashqanta.

33<<Saymi niyämash: <Rasun kaqta parlaykäyashqaykita musyanäpaq juk wawqikita prësu kachaykuyay. Wakinniki isanqa aylluykikuna mikuyänanpaq trïguta apakurkur kutiyay. 34Shulka wawqikita chäsiyämuptikiraqmi musyashaq rikapakuq mana kayashqaykita. Sayraqmi wawqikita prësu sararashqäpita kachapäshayki. Saynöpami kay nacionman kutiyämuptiki pipis imatapis niyäshunkisu> >>.

35Sayno wilapaskir trïguta talipakuyashqanchömi costalninkunacho bolsawan qellayninkuna kaykaqta tariyarqan. Sayno tariykurmi kikinkunapis papäninpis pasakaqtaraq mansakäyarqan. 36Saypitami Jacob nirqan: <<Qamkuna surïkunata ushaskiyankinami. Josépis ni Simeónpis kannasu. Kananqa ¿Benjamíntanaku pushayta munaykäyanki? Sayno kaptin vïdäpis vïdanataqku>>.

37Sayno niptinmi Rubén nirqan: <<Benjamínta pusharqa kikïmi kutisimushaq, papä. Payta mana kutisimuptïqa ishkan surïkunata wanurasinki>>.

38Saymi Jacob nirqan: <<Surïta pushayänaykipaq manami kachapäyäshaykisu. Wawqin José wanukush kaptin say mamapitaqa pay japalannami kaykan. Aywaykäyaptiki imapis päsaptin ¿imatataq qamkuna rurayanki? Sayno kaptinqa qamkunapa cuentaykipaqmi lakikuypita wanushaqpis>>.

Currently Selected:

Génesis 42: qvhB

Highlight

Copy

Compare