Éxodo 38

Broncipita altarta rurashqan

Éxodo 27.1-8

1Saynöpis sacrificiuta rupasina altarta acacia qerupitami Bezaleel rurarqan. Say altarpa anchuyninpis larguyninpis karqan ishkay metru ishkay chunka pisqa centïmetrumi (2.25). Altuyninnami karqan juk metru ishkay chunka pisqa centïmetru (1.25). 2Chuskun esquïnankunachömi waqratano rurarqan. Say waqrakuna altarwan say piëzalami kayarqan. Altarpa jananta y rurintapis bronciwanmi enchaparqan. 3Saynöpis altarpaq uchpa shuntakunata, tenäzakunata, trinchikunata, tazonkunata, kanalakunata y lapan manëjukunatapis broncipitami rurarqan. 4Saynölami rejïllantapis broncipita ruraykur altar rurinman churarqan. Saymi altarpa chawpincho say rejïlla quëdarqan. 5Saynöpis chusku arguëllakunata broncipita fundiykurmi rejïllapa chuskun esquïnaman tanaparqan. Say arguëllakunami kayarqan umrukuyänan qerukunata päsasinanpaq. 6Altar wintukuna ishkay qerukunatapis acaciapita ruraykurmi bronciwan enchaparqan. 7Say qerukunatami altarpa ishkanlächo kaykaq arguëllankunapa päsasirqan saywan wintuyänanpaq. Say altar karqan tablapita rurash y sapanaynaqmi.

Broncipita lavatoriuta rurashqan

Éxodo 30.18

8Maylakuyänanpaqnami lavatoriutapis jamakunantinta broncipita rurarqan.#Éxo. 30.18. Sayta rurarqan Tinkuna Toldu patiucho aruq warmikunapa espëjunkunapitami.#38.8 Say wisanqa espëju manami vidriupitasu karqan, sinöqa chipikyaykaq broncipitami.

Sagrädu Toldupa patiunta rurashqan

Éxodo 27.9-19

9Saynölami Tinkuna Toldupa patiuntapis rurarqan. Say patiuta jiruruypa saparänanpaqmi cortïnata awarqan llanula puskash lïnu jïlupita. Sur kaqläpami larguynin karqan chusku chunka pisqa (45) metru. 10Patiupa cada lädunpaqnami ishkay chunka (20) jorconkunata broncipita rurarqan. Jorconkuna jawiräkunantapis broncipita ishkay chunkatami rurarqan. Ganchunkunatapis arguëllankunatapis qellaypitami rurarqan.

11Norti kaqläpapis patiupa cortïnan chusku chunka pisqa (45) metrumi karqan. Jorconninkunatapis y jawiräkunantapis ishkay chunkatami (20) broncipita rurarqan. Ganchunkunatapis arguëllankunatapis qellaypitami rurarqan.

12Inti jeqanan kaqläpanami cortïnapa larguynin karqan ishkay chunka ishkay metru pulan (22.5). Jorconninkunatapis y jawiräkunantapis chunkatami rurarqan. Ganchunkunatapis arguëllankunatapis qellaypitami rurarqan.

13Inti jeqamunan kaqläpami cortïnapa larguynin karqan ishkay chunka ishkay metru pulan (22.5). 14Sayläpami punku karqan. Punkupita isuq kaqläpami karqan qanchis metru cortïna. Cortïnata sararänanpaqmi rurarqan kimsa jorconkunata cada ünunta jawiräkunantawan. 15Saynölami punkupita aluq kaqlämanpis qanchis metru cortïnata churarqan. Say cortïnata sararänanpaqmi kimsa jorconkunata cada ünunta jawiräkunantawan rurarqan.

16Patiu intërunpa kaykaq cortïnakunaqa llanula puskash lïnu jïlupitami karqan. 17Patiucho kaykaq lapan jorconkunapa jawiräkunanpis broncipitami karqan. Cortïnata sarisinanpaq ganchunkunapis arguëllankunapis qellaypita rurashqami karqan. Jorconkunapa puntankunapis qellaywan enchapashqami karqan. Patiupa lapan jorconninkunapa arguëllankunapis qellaypitami karqan.

18Patiu punkunta saparaq cortïnatanami llanula puskash lïnu jïlupita y azul, granäti y puka milwa jïlukunapita rurarqan. Say cortïna kuyaylapaq kananpaqmi shumaq bordayarqan. Larguyninmi karqan esqun metru. Patiupa wakin cortïnankunanölami say cortïnapapis anchuynin karqan ishkay metru ishkay chunka pisqa centïmetru (2.25). 19Say punkupaqmi chusku jorconkunata jawiräkunantawan broncipita rurarqan. Cortïnata sararänanpaqmi ganchunkunata y arguëllankunata qellaypita rurarqan. Jorconkunapa puntankunatapis qellaywanmi enchaparqan. 20Sagrädu Tolduta ichisinanpaq estäcankuna y patiupa jorconninkunapa estäcankunapis broncipitami karqan.

Sagrädu Tolduta rurayänanpaq aykata shuntayashqanpis

21Saypitami Aarónpa surin Itamarta Moisés nirqan: <<Tayta Diospa Pactu Toldunpaq aykata shuntashqansitapis levitakunawan listata rurayay>>.

Nishqannölami aykata shuntayashqantapis listata rurayarqan.

22Judá trïbupita Uripa surin y Hurpa wilkan Bezaleelmi lapantapis rurarqan Moisésta Tayta Dios nishqannöla. 23Bezaleeltami yanaparqan Ahisamacpa surin Aholiab. Aholiab karqan Dan trïbupitami. Paypa habilidänin karqan imatapis kuyaylapaqkunata rurananpaqmi. Saynöpis yacharqanmi azul, granäti y puka milwa jïlukunapita y llanula puskash lïnu jïlupita imaykatapis bordayta.

24Tinkuna Sagrädu Toldutawan manëjunkunata rurananpaq runakuna apayashqan qori karqan esqun pachak soqta chunka pisqa (965) kïlu kimsa chunka (30) grämuyuqmi. Saykunatami pësayarqan Tinkuna Sagrädu Tolducho kaykaq pësakunawan.

25Qellayta shuntayashqan karqan kimsa waranqa kimsa pachak chunka esqun (3,319) kïlu pisqa pachak ishkay chunka pisqa (525) grämuyuqmi. Saykunatami pësayarqan Tinkuna Sagrädu Tolducho kaykaq pësakunawan. Say qellay karqan censash kaqkuna pägayashqanmi.#Éxo. 30.11-16. 26Ishkay chunka (20) watayuqpita janamanmi runakunata censayarqan. Saymi lapan censash kaqkuna kayarqan soqta pachak kimsa waranqa pisqa pachak pisqa chunka (603,550) runakuna. Cada ünunmi pulan siclo qellayta pägayarqan. Saykunatami pësayarqan Tinkuna Sagrädu Tolducho kaykaq pësakunawan.#Éxo. 30.11-16; Mat. 17.24. 27Say shuntayashqan qellaymi kimsa waranqa kimsa pachak (3,300) kïlu karqan. Say qellaywanmi Tinkuna Toldupa marcunkunapa jawiräkunanta y rurincho kaq cortïnata sararaq jorconkunapa jawiräkunantapis rurarqan. Pachaktami (100) say jawiräkunanta fundirqan. Saymi cada jawiräkunanta fundirqan kimsa chunka kimsa (33) kïlu qellaypita. 28Wakin kaq qellaywanmi rurayarqan patiupa cortïnanta sararänanpaq ganchunkunata y jorconkunapa puntancho arguëllakunatapis. Saynöpis say qellaywanmi jorconkunapa puntanta enchaparqan.

29Tinkuna Sagrädu Toldupaq apayashqan broncipis karqan ishkay waranqa kimsa pachak kimsa chunka soqta (2,336) kïlu chusku pachak (400) grämuyuqmi. 30Say apayashqan broncipitami rurayarqan Tinkuna Toldu punkun ichiraq jorconkunapa jawiräkunanta, altarta, altarpa rejïllanta y altarpa manëjunkunatapis. 31Saynöpis broncipitami rurayarqan Sagrädu Toldu patiuta tumaraq jorconkunapa jawiräkunanta y punkupa jorconninkunapa jawiräkunantapis. Saynöpis broncipitami rurayarqan Sagrädu Toldupa y patiunpa jorconninkunata sararaq estäcankunatapis.

Currently Selected:

Éxodo 38: qvhB

Highlight

Copy

Compare