Éxodo 39

Cürakunapa mödanankunata rurayashqan

1Moisésta Tayta Dios nishqannölami Tinkuna Sagrädu Tolduman cüra yaykunanpaq mödanata rurayarqan azul, granäti y puka milwa jïlukunapita. Saynölami Aarónpaq sagrädu mödanatapis rurayarqan.

Efodta rurashqan

Éxodo 28.6-14

2 Efodta rurayarqan qori jïlupita, azul, granäti y puka milwa jïlukunapita y llanula puskash lïnu jïlupitapis. 3Qoripita jïluta rurayänanpaqmi qorita takaypa llapshasarkur llanulata rutuyarqan. Say jïlupita, azul, granäti y puka milwa jïlukunapita y llanula puskash lïnu jïlupitami efodta shumaq awayarqan.

4Efodpa ishkan kuchunchömi tirantikunata rurayarqan umrunman shawananpaq. 5Wachkuwan efodqa say piëzalami karqan. Saytapis rurayarqan qori jïlupita, azul, granäti y puka milwa jïlukunapita y llanula puskash lïnu jïlupitami. Lapanta rurayarqan Moisésta Tayta Dios nishqannölami.

6Saynöpis ónice rumikunata kamarishpanmi sararänanta qoripita ruraykur sigurayarqan. Nirkurnami sëlluta rumipita ruraqno say rumikunaman Israelpa surinkunapa jutinkunata qelqayarqan. 7Say rumikunatami efodpa tirantinkunaman churapäyarqan Israel trïbukunapa jutinkunata imaypis yarparänanpaq. Lapan saykunata rurayarqan Moisésta Tayta Dios nishqannölami.

Pectoralta rurayashqan

Éxodo 28.15-30

8Saynölami kuyaylapaq awash pectoraltapis rurayarqan. Efodta rurayashqannölami qori jïlupita, azul, granäti y puka milwa jïlukunapita y llanula puskash lïnu jïlupitapis rurayarqan. 9Pectoralta rurarkurmi doblayarqan bolsano cuadrädu kananpaq. Larguyninpis anchuyninpis ishkay chunka ishkay (22) centïmetrumi karqan. 10Pectoral jananmannami churayarqan chusku fïla kuyaylapaq rumikunata. Punta kaq fïlamanmi churayarqan sárdica rumita, topacio rumita y carbunclo rumita. 11Ishkay kaq fïlamanmi churayarqan esmeralda rumita, zafiro rumita y diamanti rumita. 12Kimsa kaq fïlamanmi churayarqan jacinto rumita, ágata rumita y amatista rumita. 13Chusku kaq fïlamanmi churayarqan berilo rumita, ónice rumita y jaspe rumitapis. Say rumikuna mana yarqunanpaqmi qoriwan sararänanta ruraykasir sigurayarqan. 14Fïlakunaman churayashqan rumikuna karqan chunka ishkaymi. Sayno chunka ishkay karqan Israelpa surinkuna chunka ishkay kayaptinmi. Cada rumimanmi juk surinpa jutinta qelqayarqan rumipita rurash sëlluno kananpaq.

15Saynöpis pectoralpaq cordonkunata qori jïlupitami piltayarqan. 16Nirkurmi rumikunata sigurayänanpaq ishkay sararaqkunata y ishkay taksha arguëllakunata qoripita rurayarqan. Say arguëllakunatami tanayarqan pectoralpa jana kaq ishkan esquïnanman. 17Nirkurnami say arguëllakunaman qoripita piltash cordonta päsasiyarqan. 18Cordonpa ishkan puntankunatanami sigurayarqan umruncho kaq sararänankunaman. Sayqa qasqunchömi#39.18 Wakin runakunaqa pëchunchömi niyan. watararqan. 19Saynöpis ishkay taksha arguëllakunata qoripita ruraykurmi pectoralpa ura kaq kuchunkunaman churayarqan. Say arguëllakuna pectoral rurincho karmi efod janancho karqan. 20Saynöpis ishkay taksha arguëllakunata qoripita ruraykurmi efodpa wachkun janaläninman churayarqan. Saykunami efodpa tirantinkunacho kar pectoralpa costüranman tinkurarqan. 21Pectoralpa y efodpa arguëllankunata azul cordonwanmi watayarqan efodpita mana yarqukänanpaq. Lapanta rurayarqan Moisésta Tayta Dios nishqannölami.

Cürapa wakin mödanankunata rurayashqan

Éxodo 28.31-43

22Saynölami efodpa rurinman jatikunanpaq azul jïlupita sotänata awayarqan. 23Uman yaykunanpaq kunkayuqta ruraykurmi sotänapa kunkan mana rachikänanpaq rebëtita jirapäyarqan. Say rebëtitaqa qara casäcapa rebëtintanömi jirapäyarqan. 24Sotänapa ura kuchunpami llanula puskash lïnu jïluwan y azul, granäti y puka milwa jïlukunawan granädatano bordayarqan. 25Saynölami say kuchunpa qoripita rurash campanillakunatapis churayarqan. Saynöpami sotäna kuchunman granädakunata y qori campanillakunata tumaypa churayarqan. 26Say sotänachömi intëru kuchunpa tumaypa karqan juk granäda, juk qori campanilla, juk granäda, juk qori campanilla. Moisésta Tayta Dios nishqannölami Tinkuna Tolduman yaykur jatikunanpaq say sotänata rurayarqan.

27Aarónpaq y surinkunapaqmi tünicakunatapis llanula puskash lïnu jïlupita awayarqan. 28Saynöpis llanula puskash lïnu jïlupitami rurayarqan görrata, görrapa adornunkunata y calzoncïllukunatapis. 29Wachkuntapis awayarqan llanula puskash lïnu jïlupita y azul, granäti y puka milwa jïlukunapitami. Awaykurmi wachkuman kuyaylapaqta bordayarqan. Lapanta rurayarqan Moisésta Tayta Dios nishqannölami.

30Saynölami qoripita sagrädu vinchatapis ruraykur rumipita rurash sëlluno kananpaq sayman qelqayarqan: <<Tayta Diospa karmi santu>> nir. 31Moisésta Tayta Dios nishqannölami say vinchata azul cordonwan görraman watapäyarqan.

Sagrädu Tolduta rurar ushayashqan

Éxodo 35.10-19

32Saynömi Tinkuna Sagrädu Toldu rurayta ushayarqan. Israel runakunaqa lapantapis rurayarqan Moisésta Tayta Dios nishqannölami. 33Nirkurmi Sagrädu Toldu y lapan manëjunkunata Moisésman apayarqan. Saymi apayarqan Sagrädu Toldupaq rurayashqan ganchukunata, marcukunata, travesäñukunata, jorconkunata, jawiräkunanta, 34Tinkuna Tolduta qatananpaq pukaman tiñish uysha pirqashta, fïnu qarakunata, babulta saparaq cortïnata, 35Pactu Babulta, babul wintukuna qerukunata, babulpa sapananta, 36mësata, mësapa manëjunkunata, Tayta Diospa nawpancho churaränanpaq kaq tantata, 37qoripita rurayashqan candelabruta, candelabrupa puntankunaman churayänanpaq kaq mechërukunata, candelabrupa manëjunkunata, aksi ratananpaq aceitita, 38qoripita rurash altarta, sagrädu aceitita, mushkuq inciensuta, Tinkuna Toldupa punkunta saparaq cortïnata, 39broncipita rurash altarta, broncipita rurash rejïllata, altar wintukuna qerukunata, altarpa manëjunkunata, lavatoriuta jamakunantinta, 40patiupa cortïnankunata, patiupa jorconninkunata, jorconkunapa jawiräkunanta, patiupa punkunta saparaq cortïnata, patiupa estäcankunata waskantinta y Tinkuna Sagrädu Toldupa lapan manëjunkunatapis. 41Saynöpis apayarqan Tinkuna Sagrädu Tolducho cüra jatikunanpaq kaq mödanata. Say mödanakunaqa karqan cüra Aarónpa sagrädu mödanankuna y surinkuna jatikuyänanpaq mödanakunami.

42Moisésta Tayta Dios nishqannölami Israel runakuna lapantapis rurayarqan. 43Tayta Dios nishqanno lapantapis rurayashqanta rikarmi Moisés paykunata bendicionta qorqan.

Currently Selected:

Éxodo 39: qvhB

Highlight

Copy

Compare