Éxodo 34

Kuyapäkuq kashqanta Tayta Dios wilashqan

Deuteronomio 10.1-5

1Moiséstami Tayta Dios nirqan: <<Punta kaqtanöla ishkay parara rumikunata ruray. Say pararakunamannami pakishqayki rumicho qelqashqätano yapay qelqashaq. 2Kamarikuy noqa kaykashqä Sinaí jirkaman waray tuta wisämunaykipaq. 3Qamwan pipis ama shamunqasu. Saynöpis Sinaí jirkapa pipis ama purinqasu. Say jirkapa uyshata ni cabrata ni wäkata pipis ama misikunqasu>>.

4Sayno niptinmi punta kaqtano ishkay parara rumikunata Moisés rurarqan. Saypita waraynin tutami Tayta Dios nishqanno ishkan parara rumita apakurkur Sinaí jirkaman wisarqan. 5Jirkacho kaykaptinnami pukutaycho Tayta Dios urarkamur jutin Yahweh kashqanta wilarqan. 6Jutinta wilarmi Moiséspa nawpanpa päsashpan nirqan:

<<¡Yahweh! ¡Yahweh!

Kuyapäkuq y perdonakuq Diosmi kä.

Imapitapis juklaqa mana rabyakuqmi kä.

Seqaypa kuyakuqmi kä.

Promitishqätaqa imaypis cumplïmi.

7Waranqanpa waranqanpa runakuna maysika kayaptinpis kuyapämi.

Mana cäsukamar jusalikuyaptinpis perdonämi.

Jusalikuyta mana kachariqkunatami isanqa castigä kikinta, surinta, wilkanta y shurukta wilkantapis>>.#Éxo. 20.5-6; Núm. 14.18; Deut. 5.9-10; 7.9-10.

8Sayno niptinmi jinan höra Moisés qonqurpakurqan urkunpis pasaman töpashqanyaq. Nirkurmi Tayta Diosta adorashpan 9nirqan: <<Tayta Dios, rasunpaypa kuyapämashpaykiqa mana kachaypa walkiykayälämay. Kay runakunaqa mana wiyakuqmi kaykäyan. Sayno kayaptinpis lutankunata rurar jusalikuyashqäkunata perdonaykayälämay. Nirkur herenciayki kayänäpaq shuntakayälämay>>.#34.9 Runakunapa herencian kaykan chakra, wayi, qellay o uywakunami. Tayta Diospa herencianmi isanqa kaykan payta cäsukuqkuna.

Israel runakunawan Tayta Dios pactuta yapay rurashqan

Deuteronomio 7.1-5

10Moisés sayno niptinmi Tayta Dios nirqan: <<Manakamashqaykita awnirmi pactuta kanan rurashun. May nacionchöpis ni may markachöpis mana rikayashqan milagrukunatami nawpaykikunacho rurashaq. Espantaypaq rurashqä milagrukunata rikarmi wakin nación runakunapis qamkunata yanapashqäta musyayanqa.

11<<Kanan tantiyasishqäkunata shumaq wiyakuy. Qamkunapa nawpaykipitami qarqushaq amorreo runakunata, cananeo runakunata, heteo runakunata, ferezeo runakunata, heveo runakunata y jebuseo runakunatapis.

12<<Täyänaykipaq kaq nacionman chäyashpayki saycho taq runakunawan ima pactutapis ama rurayankisu. Pactuta rurarqa mana ali costumbrinkunatami yachakuyanki. 13Say runakunapa sacrificiuta rupasikuyänan altarninkunata juchusiyanki y adorayashqan wankakunatapis shaluriyanki. Asera diösata adorayänanpaq jawiyashqan qerukunatapis seqtariyanki.#Deut. 16.21. 14Saycho taq runakunapa diosninkunamanqa ama qonqurpakunkisu ni adorayankisu. Noqalami Tayta Diosniki kaykä. Juk dioskunata adorayaptikiqa fiyupami rabyakü.

15<<Sayno kaykaptinqa say nacioncho taq runakunawan ima pactutapis ama rurayankisu. Paykunawan pactuta rurayaptikiqa diosninkunapaq fiestata rurayashqanmanmi pushayäshunki. Sayman aywarqa qamkunapis ofrendayashqan mikuyninkunata mikur diosninkunata adoraykuyankiman 16o warmi surinkunawanpis surikikunata majasakäsiyankiman. Majasakäsiyaptikiqa diosninkunata adorananpaq shakyäsiptin surikikuna adorarpis adoraykuyanmanmi.

17<<Ima metalpitapis fundir dioskunata ama rurayankisu.#Éxo. 20.4; Lev. 19.4; Deut. 5.8; 27.15.

Israel runakuna fiestakunata rurayänanpaq tantiyasishqan

Éxodo 23.14-19; Deuteronomio 16.1-17

18<<Imanöpis rurayänaykipaq nishqänöla Levadüraynaq Tantata Mikuna fiestata imaypis rurayashpayki#Éxo. 12.14-20; Lev. 23.6-8; Núm. 28.16-25. qanchis junaq levadüraynaq tantata mikuyanki. Abib killacho Egiptupita yarqayämushqaykita yarparmi Abib killacho say fiestata rurayanki.

19<<Qechpa olqu kaqkunaqa noqapami kaykäyan. Saymi wäkapa, uyshapa y cabrapa punta kaq wawankuna orqu yurirqa noqapa kaykan.#Éxo. 13.2. 20Ashnupa punta wawan orqu yuriptinqa trukanta noqa Tayta Diospaq apayämunki juk carnishta o malta cabrata. Trukanta mana apayämushpaykiqa kunkanta pakiriyanki wanukunanpaq.#Éxo. 13.13. Saynöla qechpa surikipa trukantapis noqa Tayta Diospaq ofrendata apayämunki.#Núm. 3.39-51. Adorayämänaykipaq shamurqa ama jinaylaqa shayämunkisu.

21<<Soqta junaq aruyanki. Murupakuy tiempu kaptinpis y cosëcha tiempu kaptinpis lapanta jitaykur qanchis kaq junaqchöqa jamayanki.#Éxo. 20.9-10; 23.12; 31.15; 35.2; Lev. 23.3; Deut. 5.13-14.

22<<Semäna fiestatapis#34.22a Semäna fiestapa jukaq jutinmi Saki Mikuy Cosëcha fiesta kaykan. Sayta musyanaykipaq liyinki Éxo. 23.16. rurayanki punta cosechayashqayki trïguta noqa Tayta Diospaq apaykur.#Lev. 23.15-21; Núm. 28.26-31. Saynöla wata ushanancho cosëcha shuntayta ushaskir Cosëcha Ushay fiestatapis rurayanki.#34.22b Cosëcha Ushay fiestapa jukaq jutinmi Ramäda fiesta kaykan. Sayta musyanaykipaq liyinki Deut. 16.13.#Lev. 23.39-43.

23<<Say kimsa fiestakunata rurayänaykipaqqa cada watacho lapan olqu kaqkuna adoramaq shayämunqa.#Éxo. 23.14-17. 24Cada watacho kimsa kuti noqa Tayta Diosta adoramaq shayämushqaykiyaq manami pipis chakraykita duëñu tukunqasu. Sayno mana duëñu tukunanpaqmi tänaykipaq kaq nacionpita saycho taq runakunata qarqushaq.

25<<Uywakunata noqapaq sacrificiuta rupasirqa yawartawan levadürayuq tantata talurkur ama rupasiyankisu. Saynöpis Pascua fiestapaq#Éxo. 12.10. rurayashqayki mikuy pusuqtaqa ama waraynin junaqpaq churayankisu.

26<<Murupakuyashqaykipita primiciata wayïman apayämunki.#Deut. 26.2.

<<Cabra malwapa aysantapis mamanpa lichinwan ama yanuyankisu>>.#Deut. 14.21.

27Saypitami Moisésta Tayta Dios nirqan: <<Nishqä leykunata kanan qelqay. Say leykunachömi qelqaranqa qamwanpis y Israel mayikikunawanpis pactu rurashqä>>.

28Imatapis mana mikuypa ni mana upuypami chusku chunka (40) junaq chusku chunka (40) paqas saycho Tayta Dioswan Moisés karqan. Saychömi pararakunaman qelqarqan Israel runakunawan Tayta Dios pactu rurashqanta. Say qelqashqankunami chunka mandamientukuna kaykan.

Moiséspa qaqlan chipipishqan

29Nirkurnami Sinaí jirkapita Moisés kutirqan ishkan parara rumikunata apakurkur. Say pararakunachömi Israel runakunawan Tayta Dios rurashqan pactu qelqaraykarqan.#Éxo. 34.28. Kutir Moisés manami cuentata qokurqansu Tayta Dioswan parlamushqanpita qaqlan chipipiykashqanta. 30Qaqlan chipipiykaqta rikarmi Aarónpis y Israel runakunapis Moiséspa nawpanman witiyta mansariyarqan. 31Saymi Aarónta y Israel runakunapa mandaqninkunata qayaykur Moisés parlaparqan. 32Saypitami wakin Israel runakunapis Moiséspa nawpanman witiyarqan. Witiykuyaptinmi wilaparqan Sinaí jirkacho Tayta Dios nishqankunata.

33Wilaparkurnami Moisésqa vëluwan qaqlanta sapakurqan. 34Tayta Diospa nawpanman parlaq aywarmi shukutaraykashqanta Moisés imaypis jorquq. Parlashqanpita yarqurnami Tayta Dios nishqankunata Israel runakunata wilapaq. 35Wilapaptinmi Israel runakuna rikayaq Moiséspa qaqlan fiyupa chipipiykaqta. Saymi qaqlanta Moisés sapakuq Tayta Dioswan parlaq kutishqanyaq.#2Cor. 3.7-16.

Currently Selected:

Éxodo 34: qvhB

Highlight

Copy

Compare