Éxodo 33

Israel runakuna aywar sïguiyänanpaq Moisésta tantiyasishqan

1 Tayta Dios mastapis Moisésta nirqan: <<Kananqa Egiptupita jorqamushqayki runakunata pusharkur ayway Abrahamta,#Gén. 12.7. Isaacta#Gén. 26.3. y Jacobta#Gén. 28.13. promitishqä nacionman. Say naciontami promitirqä paykunapita miraqkunata entreganäpaq. 2Qamkunata yanapäyäshunaykipaqmi angilnïta kachamushaq. Sayman chäyaptikinami cananeo runakunata, amorreo runakunata, heteo runakunata, ferezeo runakunata, heveo runakunata y jebuseo runakunatapis qarqushaq. 3Yakunöraq aska lichipis abëjapa mishkinpis kashqan nacionman aywayay. Mana cäsukuq kayaptikimi qamkunawan aywashaqsu. Qamkunawan aywarqa usharpis ushaykuyäshaykimi>>.

4 Tayta Dios sayno nishqanta Moisés wilaptinmi Israel runakuna fiyupa lakikuyashpan ali mödanata ni alhäjakunatapis jatikuyarqannasu. 5Sayno lakikuyarqan Moisésta Tayta Dios kayno nish kaptinmi: <<Qamkunaqa mana wiyakuq runakunami kaykäyanki. Saymi qamkunawan juk rätulapis aywarqa usharpis ushayküman. Alhäjaykikunata ni ali mödanaykikunatapis ama jatikuyaynasu. Qamkunata imano castiganäpaq kashqantapis nirkurnami yarpachakushaq>>.

6Sayno niptinmi Horeb#33.6 Horeb jirka y Sinaí jirka saylami kaykan. jirkapita aywakuyashqanpita pasa alhäjankunata ni ali mödanankunatapis Israel runakuna jatikuyarqannasu.

Tinkuna Tolducho Moiséswan Tayta Dios parlashqan

7Israel runakunapa campamentunpita mas karu niraqchömi juk tolduta Moisés ichisirqan. Saytami jutisirqan Tinkuna Toldu jutin kananpaq.#33.7 Kay Tinkuna Tolduqa manami campamentu chawpincho kaq Tinkuna Toldusu, sinöqa jukmi. Pipis Tayta Diosta ashiyta munarqa say toldumanraqmi aywayaq.

8Moisés sayman aywaptinmi Israel runakuna toldunkuna punkunman ichiykur rikaräyaq Tinkuna Toldu rurinman yaykushqanyaq. 9Moisés yaykuptinmi say toldu punkuman ichiraykaq pukutay urämuq. Nirkurmi Moiséswan Tayta Dios parlashqanyaq toldu punkucho pukutay ichiraq. 10Say toldu punkucho pukutay ichiraykaqta rikarmi lapan runakuna toldunkuna punkulanpita Tayta Diosta adorayaq. 11Amïgunwan runa parlaqnömi Moiséswan Tayta Dios parlayaq. Sayno parlarkurmi campamentuman Moisés kutiq. Moisésta yanapaq maqta Josuémi isanqa Tinkuna Toldulacho mana yarquypa täkuq. Josué karqan Nunpa surinmi.

Tayta Diospa qaqlanta Moisés rikayta munashqan

12 Tayta Diostami Moisés nirqan: <<Kay runakunata pushanäpaqmi nimashkanki, Taytay. Isanqa manami nimashkankisu pï walkimänanpaq kashqantapis. Saynöpis nimashkanki amïguyki kaptï kuyapämashqaykitami. 13Rasunpaypa kuyapämashpaykiqa imata yarpashqaykitapis wilaykamay. Saynöpami kuyapaykäyämashqaykita tantiyashaq. Ama qonqaykulaysu kay runakunata kikiki akrashqaykita Taytay>>.

14Saymi Tayta Dios nirqan: <<Kikïmi walkishayki. Noqami jamayta qoshayki>>.#Mat. 11.28-29.

15Sayno niptinmi Moisés nirqan: <<Mana walkiyämänayki kaptinqa kaypita ama jorqayämaysu. 16Mana walkiyämaptikiqa ¿imanöpata musyayäshaq noqakunata kuyapäyämashqaykita? Saynöpis ¿imanöpata musyayäshaq wakin casta runakunapita noqakunata mas kuyayämashqaykita?>>

17Niptinmi Tayta Dios nirqan: <<Amïgü kaptikimi kuyapashpä manakamashqaykino qamkunata walkiyäshayki>>.

18Saymi Moisés nirqan: <<Taytay, ruwakuläshayki. Kikikitami rikayta munaykä>>.

19Sayno niptinmi Moisésta Tayta Dios nirqan: <<Kuyapashqä kaqtami kuyapä. Perdonayta munashqä kaqtami perdonä. Saymi nawpaykipa päsar kuyapäkuq kashqäta musyasishayki. Saynöpis jutï Yahweh kashqantami wilashayki. 20Isanqa qaqläta manami rikankimansu. Pipis qaqläta rikaq kaqqa wanunqami>>.#Rom. 9.15.

21Mastapis Tayta Dios nirqan: <<Qaqa jananman wisarkamur nawpächo ichiray. 22Nawpaykipa päsarmi qaqa kicharaykaqman yaykasishayki. Nirkurmi makïwan saparkushayki päsashqäyaq. 23Päsaskir makïta jorquriptïmi waqtalätana rikamanki. Qaqlätaqa manami rikankisu>>.

Currently Selected:

Éxodo 33: qvhB

Highlight

Copy

Compare