Éxodo 32

Qoripita turïtuta rurayashqan

Deuteronomio 9.6-29

1Jirkapita Moisés mana mayakämuptinmi Israel runakuna Aarónta niyarqan: <<Egiptupita jorqamaqninsi Moisés manami yurimunsu. Manami musyansisu ima päsashqantapis. Sayno kaykaptinqa juk diosta ruramuy nawpansita aywar pushamänansipaq>>.#Hech. 7.40.

2Sayno niyaptinmi Aarón nirqan: <<Warmiki y surikikuna jatiräyashqan qori zarcïllukunata shuntayämuy>>.

3Saymi jatiräyashqan qori zarcïllukunata Aarónman lapanpis apayarqan. 4Aarónnami say qorita sulurkasir taksha turïtuta fundirqan.#Hech. 7.41. Sayta rikaykurmi lapan niyarqan: <<¡Israel runakuna, kaymi Egiptupita jorqamaqninsi diosninsi kaykan!>>

5Sayta rikarmi turïtupa nawpancho juk altarta Aarón rurarqan. Nirkurmi Israel runakunata nirqan: <<Waray junaqmi Tayta Diospa jutincho fiestata rurashun>>.

6Saymi waraynin tuta saka sakala sharkur uywakunata pishtar rupasina sacrificiukunata y jawka kawakuy sacrificiukunatapis rupasiyarqan. Nirkurmi jamaykur mikuyarqan y upyayarqan. Kushikurmi jukninpis jukninpis lutala jusalikuyarqan.#1Cor. 10.7.

7Saymi Moisésta Tayta Dios nirqan: <<Kay jirkapita jukla kutiy. Egiptupita jorqamushqayki Israel runakuna jusalikuymannami churakaskiyash. 8Manapis aykälata qonqaykayämarmi qoripita turïtuta ruraykur adoraykäyan. Saynöpis sacrificiukunata rupasirmi nikäyan: <¡Israel runakuna, kaymi Egiptupita jorqamaqninsi diosninsi kaykan!> >>

9Mastapis Moisésta Tayta Dios nirqan: <<Noqa rikashkämi Israel runakuna pasaypa mana wiyakuq kayashqanta. 10Paykunapa favornin ama sharkuynasu. Sayno fiyupa rabyanäsiyämashqanpitami paykunata ushakäsishaq. Qamlapitanami jatun nación rikakuyashqanyaq mirayanqa>>.

11Sayno niptinmi Tayta Diospa rabyaynin päsananpaq ruwakur Moisés nirqan: <<Tayta Dios, munayyuq kashqaykita pïmaytapis musyasishpaykimi Israel runakunata Egiptupita jorqamurqayki. Sayno jorqaykämurqa Israel runakunapa contran ama sayjinanpa rabyakuykulaysu. 12Ushakäsiptikiqa Egipto runakunami niyanqa: <Sunyaq jirkacho ushakäsinan kashqami kay nacionpita jorqush>. Sayno mana parlaykäyänanpaq ama ushakaykasilaysu. Saypa trukanqa jusalikuyashqanpita perdonaykulay, Taytay. 13Sirvishuqniki Abrahamta, Isaacta y Israelta#32.13 Israelqa Jacobpa jukaq jutinmi kaykan. promitishqaykita yarpaykulay. Paykunatami nirqayki: <Noqami qamkunapita miraqkunata ali rikashaq qoyllarkunanöraq aska kayänanpaq.#Gén. 22.16-17. Promitishqänölami paykunata qoykushaq intëru kay jalqakunata y raqrakunata imayyaqpis herenciankuna kananpaq> >>.#Gén. 17.8; 26.4.

14Sayno Moisés ruwakuptinmi Tayta Dios kuyapashpan Israel runakunata ushakäsirqannasu.#Núm. 14.13-19.

15Nirkurnami jirkapita urämushpan Moisés apamurqan ishkay parara rumikunata. Say pararakunachömi Israel runakunawan Tayta Dios rurashqan pactu ishkan lädunpa qelqash karqan. 16Say pararakunataqa kikin Tayta Diosmi puesturqan. Saycho qelqaraykaqkunataqa kikin Tayta Diosmi qelqarqan.

17Runakuna büllata ruraykaqta wiyarmi Moisésta Josué nirqan: <<Guërracho maqanakur qaparäyashqannöraqmi campamentupita wiyakaykämun>>.

18Niptinmi Moisés nirqan: <<Manami vincir kushikuyashqansu ni vincish kar waqayashqansu wiyakaykämun, sinöqa fiestata rurar cantayashqanmi>>.

19Israel runakunapa campamentunman charmi Moisés rikarqan qoripita rurash turïtuta y runakuna tushuykäyaqta. Sayta rikaykurmi fiyupa rabyakur apamushqan pararakunata pakiqpaq saqtariykurqan. 20Nirkurnami qoripita rurash turïtuta ninaman jitaykurqan. Saypitanami ñuchu aqaykur yakuman winashpan say yakutana Israel runakunata upusirqan.

21Aaróntanami Moisés nirqan: <<Israel runakuna ¿imanayäshushkankitaq kayjinanpa jusalikaykasinaykipaq?>>

22Sayno niptinmi Aarón nirqan: <<Ama rabyakuykulaysu, taytay. Kikikipis musyankimi kay runakuna imaypis jusalikuylaman uman churakash kayashqanta. 23Paykunami niyämash: <Diosnïkunata rurapäyämay kaypita pushamänansipaq. Egiptupita jorqamaqninsi Moisésta ima päsashqantapis manami musyansisu>. 24Saymi nirqä qorita sararaqkuna qorinta apayämunanpaq. Apayämuptinmi ninaman winaptï turïtu rikakush>>.

25Sayno niptinmi Moisés tantiyarqan Israel runakuna jusalikuyänanpaq Aarón jusayuq kashqanta. Saynöpis yarpachakur nirqan: <<Kananqa Israel runakunata jamurpar contrankuna manakaqmanchir churayanqa>>.

26Saymi campamentu yaykunaman aywar Israel runakunata Moisés nirqan: <<Mayqaykipis Tayta Diosta cäsukuyta munaq kaqqa noqa kaykashqäman shuntakäyämuy>>.

Sayno niptinmi levitakuna Moisés kaykashqanman lapan shuntakäyarqan.

27Paykunatami Moisés nirqan: <<Tayta Diosmi nin: <Lapayki campamentu juk kuchunpita jukaq kuchunyaq espädaykiwan runakunata wanusiyanki aylluyki kaptinpis, vecïnuyki kaptikipis, amïguyki kaptinpis> >>.

28Saymi Moisés nishqanno rurar say junaq runakunata wanusiyarqan kimsa waranqatano (3,000).

29Saypitanami levitakunata Moisés nirqan: <<Tayta Diosta cäsukurmi qamkuna surikikunapa y aylluykikunapa contranpis sharkuyashkanki. Saymi kanan junaq Tayta Dios churayäshushkanki payta imaypis sirviyänaykipaq>>.

Israel runakunapaq Tayta Diosta Moisés manakushqan

30Saypita waraynin junaqmi Israel runakunata Moisés nirqan: <<Qamkuna seqaypami jusalikuyashkanki. Kananqa yapaymi Tayta Dios kaqman kutishaq. Capazchir qamkunapaq manakuptï perdonayäshunkimanpis>>.

31Sayno nirmi Tayta Dios kaykashqan jirkaman kutiykur Moisés ruwakurqan: <<Qoripita diosninta rurayashpan Israel runakuna seqaypami jusalikuyash. 32Saymi perdonaykunaykipaq ruwakulä, Taytay. Mana perdonarqa libruykicho#Sal. 69.28; Apoc. 3.5. qelqaraykaq jutïtapis börrariykulay>>.

33Sayno niptinmi Tayta Dios nirqan: <<Noqata mana cäsukamaq kaqpa jutilantami librüpita börrashaq. 34Kanan kutishpayki runakunata promitishqä nacionman pushay. Walkishunaykipaq angilnïmi puntaykita aywanqa. Sayno kaptinpis Israel runakuna jusalikuyashqanqa manami saylachösu usharanqa, sinöqa castiganä junaq chämuptinnami paykunata castigashaq>>.

35Nishqannölami Israel runakunata Tayta Dios fiyu qeshyawan castigarqan. Sayno castigarqan Aarón rurapashqan turïtuta adorayashqanpitami.

Currently Selected:

Éxodo 32: qvhB

Highlight

Copy

Compare