Éxodo 31

Sagrädu Tolduta rurayänanpaq Bezaleeltawan Aholiabta akrashqan

Éxodo 35.30-35

1 Tayta Dios mastapis Moisésta nirqan: 2<<Uripa surin y Hurpa wilkan Bezaleelta noqami akrashkä. Judá trïbupitami pay kaykan. 3Bezaleelman Espïritüta kachamurmi habilidäta qoshkä. Saymi ima ruraytapis shumaq yachan. 4Qoripita, qellaypita y broncipita kuyaylapaq kaqkunata rurananpaqpis habilidänin kanmi. 5Kuyaylapaq rumikunatapis laqlayta yacharmi sararäkunanta shumaq rurar kamaraqla kananpaq siguran. Saynölami qerupitapis rurayta yachan y tukuy niraq kuyaylapaqkunata ruran. 6Payta yanapänanpaqmi Dan trïbupita Ahisamacpa surin Aholiabta churashkä. Saynölami nishqäkunata rurasinaykipaq qamkunacho kaq lapan yachaq runakunatapis habilidäta qoshkä. 7Paykunami rurayanqa Tinkunansi Tolduta, Pactu Babulta, Pactu Babulpa sapananta y Tinkunansi Toldupa lapan manëjunkunatapis. 8Saynöpis rurayanqa mësata manëjuntinta, qoripita candelabruta manëjuntinta, inciensuwan qoshnisikuna altarta, 9sacrificiuta rupasina altarta manëjuntinta y jatun lavatoriutapis jamakunantinta. 10Saynöpis rurayanqa Aarón jatikunanpaq sagrädu mödanata y surinkuna jatikuyänanpaq kaq mödanakunatapis. 11Saynöpis rurayanqa sagrädu aceitita y Tinkunansi Toldupaq inciensuta. Qamta yäsishqänölami lapantapis rurayanqa>>.

Jamay junaqpaq tantiyasishqan

Éxodo 35.1-3

12 Tayta Dios mastapis Moisésta nirqan: 13<<Israel runakunata wilanki jamay junaqta respitayänanpaq. Jamay junaqmi imaypis señal kanqa qamkunapaq y qamkunapita miraqkunapaqpis. Saymi say junaqta respitar tantiyayanki santu kayänaykipaq qamkunata akrashqäta. 14Jamay junaq sagrädu kaptinmi lapayki respitayanki. Say junaqta mana respitaq kaqtaqa wanusiyanki. Say junaqcho ima aruytapis aruq kaqtaqa Israel runakunapita qarquyanki.

15<<Soqta junaqla aruyanki. Qanchis kaq junaqqa sagrädu kaptin jamayanki.#Éxo. 20.8-11; 23.12; 34.21; 35.2; Lev. 23.3; Deut. 5.12-14. Pipis jamay junaqcho aruq kaqqa wanusishqami kanqa. 16Sayno kaykaptinqa Israel runakuna imaypis jamay junaqta respitayanqa. Sayno respitarmi paykunawan pactu rurashqäta cumpliyanqa. 17Jana pasatapis kay pasatapis soqta junaqcho kamarkurmi qanchis junaqcho jamarqä. Saymi Israel runakuna cäsukayämashqanta musyanäpaq say junaq señal kanqa>>.#Éxo. 20.11.

18Sinaí jirkacho Moisésta tantiyarkasirmi ishkay parara rumikunaman dëdunwan qelqashqan mandamientunkunata Tayta Dios entregarqan. Say mandamientunkuna karqan paykunawan Tayta Dios rurashqan pactuta cumpliyänanpaqmi.

Currently Selected:

Éxodo 31: qvhB

Highlight

Copy

Compare