Deuteronomio 9
9
Canaánman yaykuyaptin Tayta Dios yanapänanpaq promitishqan
1Saypita mastapis Moisés nirqan: <<Israel runakuna, shumaq wiyayämay. Jordán mayuta simpäyashpayki munayyuq runakuna täyashqan nacionmanmi yaykuyanki. Say runakuna qamkunapita mas askaqmi kaykäyan. Markankunapis jatunmi y altuyaq murallashqami kaykan. 2Musyayashqaykinöpis paykuna Anacpita miraq karmi jatusaq runakuna kaykäyan. Saymi paykunapaq runakuna nikäyan: <¿Piraqchi ichipanman Anacpita miraq jatusaq runakunataqa?>
3<<Sayno kaptinpis Tayta Dios nawpaykikunatami aywanqa nina ushaqnöpis paykunata ushakäsinanpaq. Promitishqannölami yanapäyäshunki paykunata vincir jukla asulayänaykipaq. 4Sayno yanapäyäshuptiki cuidä shonquykikunacho niyankiman: <Cäsukuq kashqansipitami Tayta Dios say runakunata ushakäsish> nir. Manami cäsukuq kayashqaykipitasu ushakäsinqa, saypa trukanqa say runakuna jusalikuyman umankuna churakash kayashqanpitami. 5Yapaymi qamkunata nï: Manami cäsukuq kayashqaykipitasu say nacionta Tayta Dios entregayäshunki, saypa trukanqa saycho taq runakuna jusalikuyman umankuna churakash kayashqanpitami. Saynöpami cumplinqa unay ayllunsikunata promitishqanta. 6Shumaq tantiyakuyay. Manami cäsukuq kayashqaykipitasu say ali nacionta Tayta Dios qoyäshunki, saypa trukanqa say runakuna jusasapa kayashqanpitami. Qamkunapis mana wiyakuq runakunami kaykäyanki>>.
Qoripita turïtuta rurayashqan
Éxodo 31.18—32.35
7<<Tayta Diosta sunyaq jirkacho rabyanäsiyaptiki castigayäshushqaykita imaypis ama qonqäyaysu. Egiptupita yarqayämushqaykipita kayman chäyämushqaykiyaqpis manami payta cäsukuyashkankisu. 8Horeb jirkachöpis rabyanäsiyaptikimi ushakäsiyäshunaykipaqna kaykarqan. 9Jirkacho kashqäyaqmi sayno rabyanäsiyarqayki.
<<Say jirkaman wisarqä Tayta Dios qamkunawan pactu rurashqanta parara rumikunacho qelqaraykaqta chaskimuqmi. Saychömi qoyämurqä chusku chunka (40) junaq y chusku chunka paqas imatapis mana mikuypa y yakutapis mana upuypa.#Éxo. 24.18. 10Say jirka chakincho shuntaraykäyaptikimi nina rupaykaqpita Tayta Dios parlamurqan. Lapan parlamushqankunatami ishkay parara rumikunaman dëdunwan qelqaykur say jirkacho entregamarqan. 11Saycho entregamarqan chusku chunka junaq y chusku chunka paqas cumplirkuptinmi. Tay ishkay parara rumikunachömi qamkunawan pactu rurashqan qelqaraykarqan. 12Entregamarmi nimarqan: <Kay jirkapita jukla kutiy. Egiptupita jorqamushqayki Israel runakuna jusalikuymanmi churakäyash. Manapis aykälata qonqaykayämarmi qoripita ïduluta ruraykur adoraykäyan>.
13<<Mastapis Tayta Dios nimarqan: <Rikashkämi Israel runakuna pasaypa mana wiyakuq kayashqanta. 14Paykunapa favornin ama sharkuynasu. Jutinkunapis qonqakänanpaqmi paykunata kanan ushakäsishaq. Qamlapitanami miranqa jatun nación rikakuyashqanyaq. Qampita miraqkuna Israel runakunapitapis mas askaqmi kayanqa>.
15<<Sayno nimaptinmi Tayta Dios rurashqan pactu ishkay parara rumikunacho qelqaraykaqta apakurkur rupaykaq jirkapita urämurqä. 16Chämurmi qamkunata tarirqä Tayta Diosninsita rabyanäsir qoripita rurash turïtuta adoraykäyaqta. Sayno rurar manaraqpis aykätami pay nishqanta qonqaykuyarqayki. 17Saymi rabyashpä say ishkay parara rumikunata qamkunapa nawpaykicho pasaypa shaluqpaq saqtariykurqä.
18<<Saypitanami puntaman yapay kutir Tayta Diospa nawpanman lätakuykur lakish ruwakurqä. Puntatanölami chusku chunka junaq y chusku chunka paqas imatapis mana mikuypa ni yakutapis mana upuypa qoyämurqä. Sayno qoyämurqä payta rabyanäsir jusalikuyashqaykipitami. 19Tayta Dios fiyupa rabyakur ushakäsiyäshunaykipaq kashqanta yarparmi pasaypa mansakarqä. Sayno kaptinpis ruwakuptïmi ushakäsiyäshunaykipa trukan kuyapäyäshurqayki. 20Tayta Dios fiyupa rabyakur Aaróntapis wanusiytami munarqan. Mana wanusinanpaq ruwakuptïmi paytapis kuyaparqan. 21Qoripita rurayashqayki turïtutapis ninamanmi qaykurqä. Nirkurmi ñuchu aqaykur Horeb puntapita urämuq yakuman winarqä.
22<<Saynölami Tayta Diosta rabyanäsiyarqayki Taberacho,#Núm. 11.1-3. Masahcho#Éxo. 17.1-7. y Kibrot-hataavachöpis.#Núm. 11.31-34. 23Cades-barneaman#Núm. 13.25—14.38. chaykurpis Tayta Diosninsi nishqanta#Deut. 1.21. mana criyiyashpaykimi payta cäsukuyarqaykisu. Saymi yaykuyarqaykisu qoykuyäshunaykipaq kaykaq nacionman.#Núm. 13.31; Deut. 1.26; Heb. 3.16. 24Reqishqäpita pasami Tayta Diosta mana cäsukuq runakuna kaykäyanki. 25Saymi mana ushakäsiyäshunaykipaq ruwakur chusku chunka junaq y chusku chunka paqas Tayta Diospa nawpancho lakish lätararqä. 26Ruwakurmi nirqä: <Tayta Dios, herenciaykipaq akrashqayki runakunata ama ushakaykasilaysu. Podernikiwanmi Egiptupita pushamushkanki. 27Sirvishuqniki Abrahamta, Isaacta y Jacobta promitishqaykita yarpashpayki Israel runakunata jusalikuyashqanpita perdonaykulay. 28Mana perdonaptikiqa Egipto runakuna musyayashpanmi niyanqa: <<Promitishqan nacionman chäsiyta Tayta Dios manami kamäpakushsu>>.
<< <Saynölami niyanqa: <<Israel runakunapa contran kashpanmi sunyaq jirkaman apaykur ushakäsish>>.
29<< <Imano karpis Israel runakunaqa kuyashqayki herenciaykimi kaykäyan. Kikikimi Egiptucho nakaykäyaptin podernikiwan jorqamushkanki> >>.
Currently Selected:
Deuteronomio 9: qvhB
Highlight
Copy
Compare
Share
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
